Mɔɔ Gyihova Ɛyɛ Amaa Yealie Alesama Yeavi Ɛtane Nee Ewule Nu La

1-2. (a) Ɛtane kile duzu, na kɛ ɔkɛyɛ na yɛali ɛtane nwo zo konim ɛ? (Eza nea “Edwɛkɛ Mɔɔ Bɛhilehile Nu.”) (b) Duzu a yɛbazuzu nwo wɔ edwɛkɛ ɛhye nee edwɛkɛ gyɛne mɔɔ wɔ Ɛzinzalɛ Arane ɛhye anu la anu a? (Eza nea “Kengavolɛma Ɛyɛ Ye Nzonlɛ” mɔɔ wɔ magazine ɛhye anu la.)

ASOO ɛkpondɛ kɛ ɛnwu kɛzi Gyihova Nyamenle kulo wɔ la ɔ? Adenle kpalɛ mɔɔ ɛbalua zo wɔanwu mualɛ ne la ɛne: Sukoa mɔɔ yeyɛ amaa yealie wɔ yeavi ɛtane nee ewule nu la anwo debie. Ɛtanea le kpɔvolɛ atisesebɛ mɔɔ ɛ ngomekye ɛnrɛhola ɔ nwo zo konim di a. Yɛ muala yɛyɛ ɛtane kenle ko biala, yɛɛ ɛtane ti a yɛwu a. (Wlo. 5:12) Gyihova ɛbɔ yɛ ɛwɔkɛ kɛ ɔbalie yɛ yeavi ɛtane nee ewule nu bɔkɔɔ! Nɔhalɛ nu, yɛbahola yɛali ɛtane nee ewule zo konim bɔkɔɔ!

² Wɔ ɛvolɛ kɛyɛ 6,000 la anu, Gyihova Nyamenle ɛlɛboa alesama yeamaa bɛaho bɛatia ɛtane. Duzu ati ɔ? Ɔluakɛ ɔkulo yɛ. Ɔvi alesama mɔlebɛbo ne amuala, ɛnee ɔkulo bɛ, ɔti yeyɛ biala mɔɔ ɔbahola la kɛ ɔboa bɛ wɔ bɛ konle ɛhye anu. Nyamenle ze kɛ ɛtane fa yɛ kɔ ewule nu, na ɔngulo kɛ yɛwu. Ɔkpondɛ kɛ yɛtɛnla aze dahuu. (Wlo. 6:23) Mɔɔ ɔkulo kɛ ɛnyia la ɛne. Wɔ edwɛkɛ ɛhye anu, yɛbazuzu kpuya nsa anwo: (1) Kɛzi Gyihova maanle alesama mɔɔ le ɛtanevolɛma la nyianle anyelazo ɛ? (2) Duzu a alesama mɔɔ dɛnlanle aze wɔ tete ne la yɛle amaa bɛazɔ Gyihova anye a? (3) Duzu a Gyisɛse yɛle amaa yealie alesama a?

KƐZI GYIHOVA MAANLE ALESAMA MƆƆ BƐLE ƐTANEVOLƐMA LA NYIANLE ANYELAZO Ɛ?

3. Kɛzi yɛ awovolɛ mɔɔ limoa la rayɛle ɛtanevolɛma ɛ?

³ Mɔɔ Gyihova bɔle nrenyia nee raalɛ mɔɔ bɛlimoa la, ɛnee ɔkulo kɛ bɛ nye die. Ɔmaanle bɛ awuke kɛnlɛma bie, ɔhanle bɛ ɔbɔle nu kɛ agyalɛma na ɔmaanle bɛ gyima mɔɔ yɛ anyelielɛ. Ɔhanle kɛ bɛwo bɛyi azɛlɛ ne na bɛziezie azɛlɛ ye kɔsɔɔti azo bɛmaa ɔyɛ paladaese kɛ Yidɛn tola ne la. Ɔmaanle bɛ mɛla kokye ala. Na ɔbɔle bɛ kɔkɔ kɛ saa bɛanli mɛla zɔhane azo, na bɛ nye fuu bɛdwazo bɛtia ye a, bɛ ɛtane zɔhane bamaa bɛawu. Yɛze mɔɔ zile a. Anwumabɔvolɛ atisesebɛ bie mɔɔ ɛnlɛ Nyamenle anzɛɛ bɛ nwo ɛlɔlɛ la razɔle bɛ nleanle amaa bɛayɛ ɛtane. Adam nee Yive noko yɛle mɔɔ anwumabɔvolɛ ne hanle la. Bɛanlie bɛ Ze ne mɔɔ lale ɛlɔlɛ ali hilele bɛ la bɛanli, emomu bɛyɛle ɛtane. Kɛ mɔɔ yɛze la, Gyihova edwɛkɛ ne rale nu. Ɔvi mekɛ zɔhane mɔɔ ba la, ɛnee ɔwɔ kɛ bɛgyinla mɔɔ vi bɛ ɛtane ne anu ɛra la anloa: bɛbɔle ɔ bo kɛ bɛyɛ mrelera, na nzinlii bɛwule. Awieleɛ bɔkɔɔ ne, bɛziale bɛhɔle ndɛtɛlɛ nu.—Gyn. 1:​28, 29; 2:​8, 9, 16-18; 3:​1-6, 17-19, 24; 5:5.

4. Duzu ati a Gyihova kyi ɛtane na ɔboa yɛ ɔmaa yɛko yɛtia ɛtane a? (Wulomuma 8:​20, 21)

⁴ Gyihova maanle bɛhɛlɛle alɔbɔlɛ edwɛkɛ zɔhane bɛdole ɛkɛ amaa yeaboa yɛ. Ɛhye boa yɛ maa yɛte deɛmɔti ɔkyi ɛtane la abo. Ɛtane tete yɛ nee yɛ anwuma Selɛ ne avinli na ɔfa yɛ ɔkɔ ewule nu. (Aye. 59:2) Ɛhye ati a Seetan, atuadelɛnli ne mɔɔ vale ngyegyelɛ ɛhye mɔ amuala rale la anye die ɛtane nwo na ɔsi menli adua ɔmaa bɛyɛ ɛtane la. Bie a ɔnyianle adwenle kɛ ɔlile konim kpole wɔ Yidɛn tola ne anu. Noko yeande kɛzi Gyihova lɛ ɛlɔlɛ kpole la abo. Nyamenle angakyi bodane anzɛɛ adwenle mɔɔ ɔlɛ ɔmaa Adam nee Yive abozoamra la ɛlɛ. Ɔkulo alesama abusua ne kpalɛ, ɔti ɛkɛ ne ala ɔmaanle bɛ muala bɛnyianle anyelazo. (Kenga Wulomuma 8:​20, 21.) Ɛnee Gyihova ze kɛ Adam nee Yive abozoamra bie mɔ bahulo ye na bɛakpondɛ ye moalɛ amaa bɛaho bɛatia ɛtane. Na kɛmɔ ɔle bɛ Ze nee bɛ Bɔvolɛ la ati, ɔbamaa bɛanyia adenle bɛalua zo bɛabikye ye na bɛalie bɛ bɛavi ɛtane nee ewule nu. Duzu a Gyihova bayɛ amaa ɛhye mɔ amuala ayɛ boɛ a?

5. Mekɛ boni a Gyihova limoale hanle anyelazo mɔɔ alesama lɛ la anwo edwɛkɛ a? Kilehile nu. (Gyɛnɛsese 3:15)

⁵ Kenga Gyɛnɛsese 3:15. Gyihova limoale hanle anyelazo mɔɔ alesama lɛ la anwo edwɛkɛ wɔ mekɛ mɔɔ ɔhanle mɔɔ ɔbado Seetan la. Nyamenle hanle dole ɛkɛ ne kɛ ‘ralɛ’ bie a bamaa anyelazo ɛhye ara nu a. Ralɛ ɛhye babɛtɛ Seetan na yeazɛkye ye gyima biala. (1 Dwɔn 3:8) Noko ralɛ ne banwu amaneɛ wɔ gyimalilɛ ɛhye anu. Seetan baha ye yeamaa yeawu. Yemɔ bamaa Gyihova ali nyane kpole kpalɛ. Noko awieleɛ bɔkɔɔ ne, nvasoɛ bara zɔhane nyanelilɛ ne azo ɔluakɛ, bɛbalie alesama dɔɔnwo bɛavi ɛtane nee ewule nu.

KƐZI ALESAMA MƆƆ DƐNLANLE AZE TETE NE LA HOLALE YƐLE MƆƆ SƆ GYIHOVA ANYE LA Ɛ?

6. Duzu a mrenyia mɔɔ lɛ diedi le kɛ Ebɛle nee Nowa la yɛle amaa bɛabikye Gyihova a?

⁶ Mɔɔ mekɛ ɛlɛkɔ la, Gyihova hilele kɛzi alesama bahola abikye ye la anu ngyikyi ngyikyi. Wɔ Yidɛn atuadelɛ ne anzi, Ebɛle mɔɔ le Adam nee Yive ara nrenyia mɔɔ tɔ zo nwiɔ la a le dasanli mɔɔ limoale nyianle Gyihova anu diedi a. Kɛmɔ Ebɛle kulo Gyihova na ɔkulo kɛ ɔyɛ mɔɔ sɔ ɔ nye na ɔbikye Ye la ati, ɔbɔle afɔle ɔmaanle Ye. Ɛnee Ebɛle le mboaneneavolɛ, ɔti ɔhunle ye mboane mralɛ ne mɔ bie ɔbɔle afɔle ɔmaanle Gyihova. Duzu a Gyihova yɛle wɔ nwo a? Ɔ nye “zɔle Ebɛle nee ye afɔlebɔlɛ ne.” (Gyn. 4:4) Menli mɔɔ bɛkulo Gyihova na bɛlɛ ye nu anwodozo, mɔɔ bie a le Nowa la bɔle afɔle zɛhae mɔ bie na Gyihova liele dole nu. (Gyn. 8:​20, 21) Kɛmɔ Gyihova liele afɔlebɔlɛ ɛhye mɔ dole nu la ati, ɔmaanle ɔlale ali kɛ alesama mɔɔ le ɛtanevolɛma la bahola anyia ɔ nyunlu ɛlolɛ na bɛabikye ye.b

7. Ebileham nyianle ɛhulolɛ kɛ ɔfa ɔ ra yeabɔ afɔle, duzu a yɛsukoa yɛfi nu a?

⁷ Gyihova hanle hilele Ebileham mɔɔ lɛ diedi kpole la kɛ ɔyɛ debie bie mɔɔ yɛ se kpalɛ la—yemɔ a le kɛ ɔva ɔdaye mumua ne ɔ ra Ayezeke ɔbɔ afɔle ɔmaa ye. Ye biala anu Ebileham nwunle kɛ ɛnee ɛhye ɛnla aze fee. Noko ɔdiele mɔɔ Gyihova hanle la. Na mɔɔ Ebileham yɛle kɛ ɔku ɔ ra ne ala la, Nyamenle maanle ɔgyakyile. Mɔɔ Ebileham yɛle la kilehile menli mɔɔ lɛ diedi la nɔhalɛ titili bie—yemɔ a le kɛ, Gyihova banyia ɛhulolɛ kɛ ɔbava ye kulovolɛ Ralɛ ne yeabɔ afɔle, ɔluakɛ ɔkulo alesama kpole kpalɛ.—Gyn. 22:​1-18.

8. Duzu a ɛnee afɔle ngakyile ne mɔ mɔɔ Mɛla ne maa bɛbɔ la gyi ɛkɛ ne maa a? (Lɛvitikɔso 4:​27-29; 17:11)

⁸ Ɛvolɛ ɛya dɔɔnwo anzi, Mɛla mɔɔ bɛvale bɛmaanle Yizilayɛma la maanle bɛbɔle afɔle ngakyile bɛkpɔdale Nyamenle menli ne ɛtane ne mɔ. (Kenga Lɛvitikɔso 4:​27-29; 17:11.) Ɛnee afɔlebɔlɛ ɛhye mɔ gyi ɛkɛ ne maa afɔlebɔlɛ kpole bie mɔɔ ɔbalie alesama yeavi ɛtane nu bɔkɔɔ la. Nyamenle sunsum ne maanle ye ngapezoma hɛlɛle kɛ ralɛ ne mɔɔ bɛbɔ ɔ nwo ɛwɔkɛ la, mɔɔ nzinlii ɔlale ali kɛ ɔle Nyamenle Ara titili bie la, banwu amaneɛ na bɛahu ye. Bɛbahu ye kɛ boane mɔɔ bɛlɛfa bɛabɔ afɔle la. (Aye. 53:​1-12) Wɔmɔ nea o: Gyihova bayɛ ngyehyɛleɛ yeamaa bɛava ye kulovolɛ Ralɛ ne bɛabɔ afɔle amaa yealie alesama—mɔɔ ɛdawɔ noko ɛboka nwo la—yeavi ɛtane nee ewule nu!

DUZU A GYISƐSE YƐLE AMAA YEALIE ALESAMA YEAVI ƐTANE NU A?

9. Duzu a Dwɔn Sɔnevolɛ ne hanle wɔ Gyisɛse anwo a? (Hibuluma 9:22; 10:​1-4, 12)

⁹ Wɔ ɛvolɛ 29 Y.M., Nyamenle sonvolɛ Dwɔn Sɔnevolɛ ne nwunle Gyisɛse na ɔhanle kɛ: “Nea, Nyamenle Boaneralɛ ne mɔɔ ɔbaye ɛtane yeavi ewiade la ɛne!” (Dwɔn 1:29) Edwɛkɛ ɛhye mɔɔ sunsum ne maanle Dwɔn hɛlɛle la maanle ɔlale ali kɛ Gyisɛse a le ralɛ ne mɔɔ bɛhanle ɔ nwo edwɛkɛ bɛdole ɛkɛ ne mekɛ tendenle la. Ɛnee ɔbabɔ afɔle ne mɔɔ bɛbɔle nwolɛ ɛwɔkɛ la. Akee alesama mɔɔ le ɛtanevolɛma la nyianle anyelazo mɔɔ gyi ye kpundii la—bɛbali ɛtane nwo zo konim bɔkɔɔ.—Kenga Hibuluma 9:22; 10:​1-4, 12.

10. Kɛzi Gyisɛse hilele kɛ ɔrale kɛ ‘ɔbavɛlɛ ɛtanevolɛma’ ɛ?

¹⁰ Gyisɛse vale ye adwenle ziele menli mɔɔ ɛtane ɛmaa adwenleadwenle ɛdɔ bɛ nwo la anwo zo titili na ɔdole ɛsalɛ ɔvɛlɛle bɛ kɛ bɛrayɛ ye ɛdoavolɛma. Ɛnee ɔze kɛ ɛtane a maa alesama nwu amaneɛ a. Ɔti ɔboale mrenyia nee mraalɛ mɔɔ ɛnee bɛlie duma kɛ bɛle ɛtanevolɛma la. Ɔluale ndonwo zo ɔhilehilele nu kɛ: “Menli mɔɔ te kpɔkɛ la ɛngyia ayileyɛvolɛ nwo, emomu menli mɔɔ ɛnde kpɔkɛ la a hyia bie a.” Ɔdoale zolɛ kɛ: “Membale kɛ mebavɛlɛ ɛtanevolɛma na tɛ tenlenema ɔ.” (Mat. 9:​12, 13) Na zɔhane a amgba Gyisɛse yɛle a. Mɔɔ raalɛ bie vale ɔ nye monle kyikyile ɔ gyakɛ anwo la, ɔdendɛle kɛnlɛma ɔhilele ye na ɔvale ye ɛtane ɔhyɛle ye. (Luku 7:​37-50) Gyisɛse hanle nɔhalɛ edwɛkɛ bie mɔɔ hyia la hilele Samɛleanli raalɛ bie ɔnva nwo kɛ ɛnee ɔze kɛ ɔbɔ ɛbɛlatane la. (Dwɔn 4:​7, 17-19, 25, 26) Nyamenle maanle Gyisɛse tumi bɔbɔ kɛ ɔye ngyegyelɛ mɔɔ vi ɛtane kɔsɔɔti anu ba, mɔɔ yemɔ a le ewule la ɔvi ɛkɛ. Kɛzi ɔyɛle ye ɛ? Gyisɛse dwazole mrenyia nee mraalɛ yɛɛ ngakula nee mgbanyinli vile ewule nu.—Mat. 11:5.

11. Duzu ati a alesama mɔɔ ɛnee le ɛtanevolɛma la bikyele Gyisɛse a?

¹¹ Ɔnyɛ nwanwane kɛ bɛdabɛ mɔɔ ɛnee ɛtane ɛlɛbu bɛ kɔme la holale bikyele Gyisɛse la. Ɔlale ahunluyelɛyelalɛ ali ɔhilele bɛ na ɔhilele kɛ ɔze nyane mɔɔ bɛlɛdi la. Ɛnee bɛnzulo kɛ bɛbabikye ye na bɛaha bɛ edwɛkɛ bɛahile ye. (Luku 15:​1, 2) Gyisɛse hanvole menli ɛhye mɔ wɔ diedi mɔɔ bɛlale ye ali la anwo na ɔmaanle bɛ nwolɛ ahatualɛ. (Luku 19:​1-10) Mɔɔ ɔyɛle la maanle bɛnwunle kɛzi ɔ Ze noko se anwunvɔne la. (Dwɔn 14:9) Ɔluale ye edwɛkɛ nee ye nyɛleɛ zo ɔhilele kɛ ɔ Ze ne mɔɔ lɛ ahunluyelɛyelalɛ na ɔse anwunvɔne la kulo menli na ɔkulo kɛ ɔboa awie biala ɔmaa ɔdi ɛtane nwo zo konim. Gyisɛse boale ɛtanevolɛma maanle bɛnyianle ɛhulolɛ kɛ bɛbahakyi bɛ ɛbɛlabɔlɛ na bɛali ɔ nzi.—Luku 5:​27, 28.

12. Duzu a Gyisɛse hanle ye wɔ ɔdaye mumua ne ye ewule nwo a?

¹² Ɛnee Gyisɛse ze mɔɔ la ɔ nyunlu a. Ɔhanle ɔhilele ye ɛdoavolɛma ne wɔ mekɛ ngakyile nu kɛ bɛbaye ye bɛamaa na bɛahu ye wɔ baka zo. (Mat. 17:22; 20:​18, 19) Ɛnee ɔze kɛ ye afɔlebɔlɛ ne baye ɛtane avi ewiade kɛ mɔɔ Dwɔn bɔle ye nolo na ngapezoma ne hanle dole ɛkɛ ne la. Eza ɛnee Gyisɛse ze kɛ ɔfa ye ngoane ne ɔbɔ afɔle ɔwie a, ɔbahwe “menli ngakyile kɔsɔɔti” yeara ɔ nwo. (Dwɔn 12:32) Saa alesama mɔɔ le ɛtanevolɛma la die Gyisɛse to nu kɛ bɛ Awulae na bɛdi ɔ gyakɛ anzi a, bɛbahola bɛayɛ mɔɔ sɔ Gyihova anye la. Saa bɛyɛ ye zɔ a, awieleɛ bɔkɔɔ ne ‘bɛbalie bɛ bɛavi ɛtane nu.’ (Wlo. 6:​14, 18, 22; Dwɔn 8:32) Ɔti Gyisɛse lale akɛnrasesebɛ ali na ɔvile ye ɛhulolɛ nu ɔwule nyane nyane nu.—Dwɔn 10:​17, 18.

13. Adenle boni a Gyisɛse luale zo wule a, na duzu a ye ewule ne maa yɛnwu ye wɔ Gyihova Nyamenle anwo a? (Eza nea nvoninli ne.)

¹³ Bɛyele Gyisɛse bɛmaanle, akee bɛhyele ye, bɛbɔle ye aholoba, bɛbɔle ye somolɛ na bɛhilele ye nyane. Sogyama vale ye hɔle ɛleka mɔɔ bɛkahu ye la na bɛbɔle ye baka nu. Mekɛ mɔɔ ɔlɛfa nɔhalɛlilɛ yeagyinla nyane ɛhye mɔ amuala anloa la, ɛnee Awie bie wɔ ɛkɛ mɔɔ ɔlɛdi nyane kpole a. Yemɔ a le Gyihova Nyamenle. Ɔlɛ tumi kpole yɛɛ ɛnee ɔkola ɔdie ɔ Ra ne ɔfi amaneɛnwunlɛ zɔhane anu, noko yeanyɛ. Duzu ati ɔ? Duzu a bamaa Selɛ mɔɔ lɛ ɛlɔlɛ la ayɛ zɔ a? Ɔkulo yɛ la ati ɔ. Gyisɛse hanle kɛ: “Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle, amaa awie biala mɔɔ kɛla ye ali kɛ ɔlɛ diedi wɔ ye nu la bɛanzɛkye ye na yeanyia dahuu ngoane.”—Dwɔn 3:16.

14. Duzu a Gyisɛse afɔlebɔlɛ ne maa ɛnwu ye a?

¹⁴ Gyisɛse afɔlebɔlɛ ne a le daselɛ titili mɔɔ maa yɛnwu kɛzi Gyihova kulo Adam nee Yive abozoamra kpole la a. Ɔkile kɛzi Gyihova kulo wɔ la. Ɔyɛle biala mɔɔ ɔbahola la, ɔgyinlanle debie mɔɔ yɛ nyane kpalɛ la anloa amaa yealie wɔ yeavi ɛtane nee ewule nu. (1 Dwɔn 4:​9, 10) Amgba ɔkulo kɛ ɔboa yɛ nuhua ko biala ɔmaa ɔko ɔtia ɛtane na ɔdi zolɛ konim!

15. Duzu a ɔwɔ kɛ yɛyɛ amaa yɛanyia Nyamenle ɛkpɔnedeɛ ahyɛlɛdeɛ ne azo nvasoɛ a?

¹⁵ Nyamenle ahyɛlɛdeɛ ne, mɔɔ le ɔ Ra kokye ne ɛkpɔnelɛ afɔlebɔlɛ ne maa yɛkola yɛnyia ɛtanefakyɛ. Noko amaa Nyamenle ava yɛ ɛtane ahyɛ yɛ la, ɔwɔ kɛ yɛyɛ debie. Duzu debie ɔ? Dwɔn Sɔnevolɛ ne nee Gyisɛse Kelaese mumua ne buale kpuya ɛhye: “Bɛnlu bɛ nwo, ɔluakɛ anwuma Belemgbunlililɛ ne ɛbikye.” (Mat. 3:​1, 2; 4:17) Ɔti saa amgba yɛkulo kɛ yɛko yɛtia ɛtane na yɛbikye yɛ anwuma Selɛ ne mɔɔ lɛ ɛlɔlɛ la a, debie titili mɔɔ ɔwɔ kɛ yɛyɛ la a le kɛ yɛbanlu yɛ nwo. Noko saa bɛka kɛ yɛnlu yɛ nwo a ɔkile duzu, na kɛzi ɔboa yɛ ɔmaa yɛko yɛtia yɛ sinlidɔlɛ ɛ? Edwɛkɛ mɔɔ doa zo la babua kpuya ɛhye.