Kpuya Mɔɔ Vi Kengavolɛma Ɛkɛ
Nwane a ɔwɔ kɛ ɔdi edwɛkɛ mɔɔ wɔ 2 Tɛsalonaekama 3:14 mɔɔ se bɛyɛ ahenle zɔhane nzonlɛ la anwo gyima a, asafo nu mgbanyima anzɛɛ asafo ne anu amra?
Ɛzoanvolɛ Pɔɔlo hɛlɛle hɔmaanle Kilisienema mɔɔ wɔ Tɛsalonaeka la kɛ: “Saa awie anli yɛ edwɛkɛ ne mɔɔ wɔ kɛlata ɛhye anu la azo a, bɛyɛ ahenle zɔhane nzonlɛ.” (2 Tɛs. 3:14) Yɛhanle ye dɛba kɛ adehilelɛ ɛhye fale asafo nu mgbanyima nwo. Ɛnee saa bɛtu adiema bie folɛ fane dɔɔnwo na ɔkpo kɛ ɔnrɛva Baebolo ngyinlazo ɔnrɛli gyima a, bie a mgbanyima ne mɔ bazi kpɔkɛ kɛ bɛmaa nwolɛ ɛdendɛlɛ bɛava bɛabɔ asafo ne kɔkɔ. Yemɔ anzi, nolobɔlɛma nee ahenle mɔɔ bɛyɛ ye nzonlɛ la ɛnrɛdu.
Noko yɛnwu kɛ ɔhyia kɛ yɛyɛ nzenzaleɛ. Kɛkala, yɛde ɔ bo kɛ Pɔɔlo folɛdulɛ zɔhane fale kpɔkɛ mɔɔ ɔwɔ kɛ Kilisienenli ko biala mɔɔ wɔ asafo ne anu la si wɔ tɛnlabelɛ bie mɔ anu la anwo. Ɔti nwolɛ ɛngyia kɛ asafo nu mgbanyima ne mɔ maa nwolɛ kɔkɔbɔlɛ ɛdendɛlɛ. Duzu ati a yɛyɛ nzenzaleɛ ɛhye a? Suzu deɛmɔti Pɔɔlo dule folɛ zɔhane la anwo.
Pɔɔlo nwunle kɛ ɛnee asafo ne anu amra bie mɔ “lua ye basabasa.” Ɛnee bɛlɛbu bɛ nye bɛagua folɛdulɛ mɔɔ vi Nyamenle ɛkɛ la azo. Mekɛ bie mɔɔ ɔhɔkpɔlale bɛ la, ɔvale mɛla ɛhye ɔmaanle bɛ: “Mɔɔ ɛngulo kɛ ɔyɛ gyima la, ɔnle kɛ ɔdi aleɛ.” Noko akee ɛnee bie mɔ ɛngulo kɛ bɛyɛ gyima bɛnea bɛ nwo wɔ mekɛ mɔɔ bɛlɛ anwosesebɛ bɛkola bɛyɛ zɔ la. Eza ɛnee bɛfa bɛ nloa bɛwulowula awie mɔ edwɛkɛ nu. Kɛzi ɛnee ɔwɔ kɛ Kilisienema nee bɛdabɛ mɔɔ bɛlua ye basabasa la di ɛ?—2 Tɛs. 3:6, 10-12.
Pɔɔlo hanle kɛ: “Bɛyɛ ahenle zɔhane nzonlɛ.” Giliki edwɛkɛkpɔkɛ ne kile kɛ bɛmaa bɛ nye ahɔ sonla ɛhye anwo kpalɛ. Pɔɔlo vale adehilelɛ ɛhye maanle asafo ne amuala, tɛ mgbanyima ne mɔ ala. (2 Tɛs. 1:1; 3:6) Ɔti saa Kilisienenli bie nwu kɛ ɔ diema diedinli bie ɛnli folɛdulɛ mɔɔ wɔ Baebolo ne anu la azo a, ɔbahola yeakpa kɛ ɔ nee ahenle zɔhane mɔɔ lua ye basabasa la ‘ɛnrɛdu.’
Asoo ɛhye kile kɛ ɔ nee ahenle bali ye kɛ asɛɛ bɛye ye bɛvi asafo ne anu la ɔ? Kyɛkyɛ, ɔluakɛ Pɔɔlo vale zɔle zo kɛ: “Bɛhɔ zo bɛdu ye folɛ kɛ adiema la.” Ɔti Kilisienenli bie bahola ɔ nee ahenle mɔɔ bɛyɛ ye nzonlɛ la adendɛ wɔ debiezukoalɛ bo na ɔ nee ye ahɔ daselɛlilɛ, noko bɛbahola bɛakpa kɛ bɛ nee ye ɛnrɛbɔ nu ɛnrɛyɛ ninyɛne gyɛne bie mɔ anzɛɛ ɛnrɛlielie bɛ nye. Duzu ati ɔ? Pɔɔlo hanle kɛ: “Amaa ɔ nyunlu agua aze.” Kɛmɔ bɛyɛ Kilisienenli ɛhye mɔɔ lua ye basabasa la nzonlɛ la ati, ye subane ne bamaa ɔ nyunlu agua aze na yeahakyi.—2 Tɛs. 3:14, 15.
Kɛzi Kilisienema bava folɛdulɛ ɛhye ali gyima ɛnɛ ɛ? Mɔɔ limoa, yɛkulo kɛ yɛnwu ye bɔkɔɔ kɛ subane mɔɔ ahenle ɛlɛda ye ali la kile kɛ amgba ‘ɔlua ye basabasa’ kɛ mɔɔ Pɔɔlo hanle la. Ɛnee tɛ bɛdabɛ mɔɔ asolo kɛzi bɛtete bɛ adwenle anzɛɛ asolo ninyɛne mɔɔ bɛkulo la ati, kɛzi bɛyɛ bɛ ninyɛne la le ngakyile fi kɛzi yɛyɛ yɛ ɛdeɛ nwo la anwo edwɛkɛ a Pɔɔlo ɛlɛka a. Yɛɛ ɛnee ɔnga bɛdabɛ mɔɔ bɛyɛ debie bɛmaa yɛli nyane la anwo edwɛkɛ. Emomu, mɔɔ ɛnee Pɔɔlo ɛlɛka nwolɛ edwɛkɛ titili la a le bɛdabɛ mɔɔ bɛ nye fuu bɛkpa kɛ bɛnrɛli folɛdulɛ mɔɔ vi Nyamenle ɛkɛ la azo la.
Ɛnɛ, saa yɛnwu kɛ adiema Kilisienenli bie ɛlɛyɛ anzosesebɛ zɛhaea bie a, yɛbazi kpɔkɛ kɛ yɛ nee ye ɛnrɛbɔ nu ɛnrɛyɛ ninyɛne bie mɔ anzɛɛ ɛnrɛlielie yɛ nye. Kɛmɔ ɛhye le yɛ ti anwo kpɔkɛzilɛ la ati, ɔnle kɛ yɛka nwolɛ edwɛkɛ yɛkile menli mɔɔ bɛnle yɛ abusua ne anu la. Eza yɛ nee ahenle badendɛ wɔ debiezukoalɛ bo anzɛɛ yɛ nee ye bahɔ daselɛlilɛ. Saa ɔkakyi ye subane a, yɛ nee ye badu bieko.
a Kɛ neazo la, bie a adiema Kilisienenli bie ɛngulo kɛ ɔbayɛ gyima yeanlea ɔ nwo ɔnva nwo kɛ ɔlɛ anwosesebɛ ɔyɛ zɔ, ɔbagyinla zo kyengye kɛ ɔgya awie mɔɔ ɛnle diedinli, anzɛɛ ɔbasalo edwɛkɛ bie mɔɔ kpakyekpakye menli nu anzɛɛ ɔsɛkye awie duma la. (1 Kɔl. 7:39; 2 Kɔl. 6:14; 2 Tɛs. 3:11, 12; 1 Tim. 5:13) Bɛdabɛ mɔɔ bɛkɔ zo bɛbɔ ɛbɛla zɛhae la “lua ye basabasa.”