Duzu A Baebolo Ne Kola Kilehile Yɛ A?​—Kɛzi Bɛfa Bɛdi Gyima La

Kilehile Yɛ buluku ne nee Baebolo Ne Kilehile buluku ne le ko. Mbuluku ɛhye mɔ mɔɔ yɛfa yɛkilehile la ka nɔhalɛ ko ne ala wɔ adenle ko ne ala azo. Noko akee, Kilehile Yɛ ne abo ɛdelɛ ɛnyɛ ɛse yɛɛ ndelebɛbo wɔ nu. Bɛyɛ bɛmaa bɛdabɛ mɔɔ ɔyɛ se kɛ bɛbade Baebolo Ne Kilehile ne abo la. Kɛ anrɛɛ ɛbanwu mokanwo wɔ nu la, awieleɛ edwɛkɛ wɔ Kilehile Yɛ ne anu mɔɔ kilehile edwɛkɛkpɔkɛ bie mɔ nee ngilehilelɛ mɔɔ wɔ edwɛkɛ titili ne anu la anu. Mukenye kpuya anzɛɛ ndinu ɛlɛka ɛnle adile ne mɔ abo. Emomu, ɔpɛ Baebolo nu nɔhalɛ ne mɔɔ bɛhilehile nu wɔ edwɛkɛ titili ne anu la sikalɛ wɔ ye awieleɛ. Kɛ mɔɔ Baebolo Ne Kilehile de la, yɛbahola yɛava Kilehile Yɛ buluku ne yɛamaa mekɛ biala saa bɔbɔ tɛ yemɔ a yɛlɛfa yɛamaa wɔ siane ne anu a. Kɛ ɔkɛyɛ na yɛava ninyɛne mɔɔ yɛ anyelielɛ mɔɔ wɔ Kilehile Yɛ ne anu la yɛali gyima wɔ mekɛ mɔɔ yɛlɛyɛ Baebolo ɛzukoalɛ la ɛ?

SIKALƐPƐLƐ: Wɔ menli dɔɔnwo afoa nu, kɛzi yɛkenga ɛdendɛkpunli ne na yɛabiza kpuya ne mɔɔ wɔ Baebolo Ne Kilehile buluku ne anu la boa bɛ kpalɛ. Noko, fa ye kɛ sukoavo ne ɛnde aneɛ ne anzɛɛ ɔnze kenga kpalɛ. Saa ɔba ye zɔ a, ɛbahola wɔava Kilehile Yɛ buluku ne wɔayɛ debiezukoalɛ ne. Akee ɛbahola wɔava tile sikalɛpɛlɛ ne wɔayɛ debiezukoalɛ ne na wɔamaa sukoavo ne anwosesebɛ kɛ ɔdaye ɔgenga edwɛkɛ titili ne. Bɛkola bɛfa mitini kɛyɛ 15 bɛsukoa Baebolo nu nɔhalɛ ne wɔ debiezukoalɛ ko biala anu. Kɛmɔ edwɛkɛ dɔɔnwo mɔɔ wɔ edwɛkɛ titili ne anu la ɛnle sikalɛpɛlɛ ne anu la ati, ɔwɔ kɛ kilehilevolɛ ne siezie ɔ nwo kpalɛ, ɔmaa sukoavo ne ngyianlɛ tɛnla ye adwenle nu. Saa kilehilevolɛ ne fa edwɛkɛ titili ne yɛ debiezukoalɛ ne a, ɔbahola yeava sikalɛpɛlɛ ne yeayɛ ndinu.

AWIELEƐ EDWƐKƐ: Kɛzi bɛhyehyɛ edwɛkɛkpɔkɛ nee ngilehilelɛ wɔ edwɛkɛ titili ne anu la, zɔhane ala a ɔde wɔ awieleɛ edwɛkɛ ne anu a. Kilehilevolɛ ne bahola azi kpɔkɛ kɛ ɔ nee ye bazuzu awieleɛ edwɛkɛ ne mɔɔ wɔ Kilehile Yɛ buluku ne anu la anwo wɔ debiezukoalɛ ne anu.