Kilehile Nɔhalɛ Ne

Ɔvi September mɔɔ kɔ la, yɛbava edwɛkɛ mɔɔ yɛbaha la neazo fofolɛ mɔɔ bɛfɛlɛ ye “Kilehile Nɔhalɛ Ne” yɛaboka Yɛ Ɛbɛlabɔlɛ Nee Yɛ Ɛzonlenlɛ Nyianu Buluku ne anwo. Yɛ bodane a le kɛ yɛbagyinla kpuya nee ngɛlɛlera bie azo yɛazi Baebolo nu nɔhalɛ edwɛkɛ titili bie azo.

Saa yɛnwu kɛ ahenle anye die nwo a, yɛbahola yɛava mbuluku anzɛɛ yɛaye vidio mɔɔ wɔ jw.org azo la yɛahile ye amaa yɛazia yɛahɔ ye ɛkɛ ne bieko. Ɔwɔ kɛ yɛbɔ mɔdenle yɛsia yɛkɔ ɛkɛ ne ndɛndɛ amaa yɛadoa adawubɔlɛ ne azo. Edwɛkɛ fofolɛ ɛhye mɔɔ yɛbaha la nee sukoavo gyimalilɛ ne gyi Duzu A Baebolo Ne Kola Kilehile Yɛ A? buluku ne tile ne sikalɛpɛlɛ ne azo. Yɛbahola yɛanyia kpuya nee ngɛlɛlera gyɛne mɔɔ baboa yɛ yeamaa yɛayɛ sia kɔkpɔla anzɛɛ yɛalua Baebolo ne ala azo yɛayɛ debiezukoalɛ.

Ngoane adenle ne le kokye ala. (Mt 7:13, 14) Kɛmɔ yɛka edwɛkɛ ne yɛkile menli ngakyile mɔɔ wɔ asɔne ngakyile nu la ati, ɔwɔ kɛ yɛka Baebolo nu nɔhalɛ ne mɔɔ bamaa awie biala anye alie nwolɛ la. (1Te 2:4) Saa yɛsukoa edwɛkɛtile ngakyile mɔɔ gyi Baebolo ne azo la kpalɛ na yɛnyia anyuhɔlɛ wɔ kɛzi yɛkilehile “Nyamenle nɔhalɛ edwɛkɛ ne kpalɛ” la anu a, yɛ anyelielɛ bayɛ kpole na nɔhalɛ ne mɔɔ yɛkilehile awie mɔ la bazo ma.​—2Te 2:15.