Tie Na Sukoa
1. Duzu ati a ɔbahyia mɔdenlebɔlɛ amaa yɛadie na yɛazukoa wɔ maangyeba nyianu ne abo ɛ?
1 Ɔnrɛhyɛ ɛvolɛ 2013 maangyeba nyianu ne babɔ ɔ bo. Bɛyɛ gyima dɔɔnwo bɛva bɛziezie nyianu ngyehyɛleɛ mɔɔ bali ewiade amuala ɛzonlenlɛ gyima ne ngyianlɛ nwo gyima la. Asoo wɔyɛ ngyehyɛleɛ mɔɔ bamaa wɔahɔ kenle nsa nyianu ne amuala la? Ninyɛne dɔɔnwo kola twehwe adwenle wɔ nyianu mgbole bo, yemɔti ɔhyia mɔdenlebɔlɛ na wɔahola wɔadie gyimalilɛ ne kpalɛ. Kɛmɔ yɛtɛnla aze yɛkyɛ yɛtɛla debiezukoalɛ bo la ati, ɔwɔ kɛ yɛkola yɛtie edwɛkɛ ne mekɛ tendenle. Bieko, adendulɛ nee ninyɛne gyɛne bahola amaa ɛvɛlɛ aha yɛ. Duzu a baboa yɛ yeamaa yɛ nye ala ɛkɛ amaa yɛahola yɛadie na yɛazukoa ɛ?—Mɛla 31:12.
2. Kɛ ɔkɛyɛ na yɛaziezie yɛ ahonle yɛamaa nyianu ne ɛ?
2 Kolaa Na Nyianu Ne Abɔ Ɔ Bo La: Bɛfa nyianu gyimalilɛ ne bɛgua yɛ Intanɛte gyimalilɛ ɛleka, www.jw.org, bɛfa ɛdendɛlɛ biala edwɛkɛtile yɛɛ nwolɛ ngɛlɛlera titile ko anzɛɛ nwiɔ bɛboka nwo. Saa yɛkola yɛkɔ Intanɛte zo, na yɛdumua yɛneɛnlea a ɔbaboa yeamaa yɛziezie yɛ ahonle yeamaa mɔɔ bɛbaha la. (Ɛzl. 7:10) Bɛlɛyɛ Abusua Ɛzonlenlɛ a, bɛbahola bɛaye mekɛ bie bɛazie ɛkɛ bɛava bɛazuzu nyianu ne anwo amaa bɛ nye ala ye ade ɔ?
3. Duzu a baboa yɛ yeamaa yɛadie edwɛkɛ kpalɛ a?
3 Nyianu Ne Ɛlɛkɔ Zo A: Saa ɔkɛyɛ boɛ a yɛbahola yɛalumua yɛahɔ ɛleka mɔɔ bɛyɛ bɛ nwo boɛ la kolaa na nyianu ne abɔ ɔ bo. Ɔwɔ kɛ mgbanyinli fa bɛ mra ngakula kɔ ɛleka mɔɔ bɛyɛ bɛ nwo boɛ la wɔ mekɛ mɔɔ gyimalilɛ ne ɛlɛkɔ zo la. Nua wɔ fonu ne amaa yeandwehwe wɔ kɛ ɛvɛlɛ anzɛɛ ɛva text ɛmaa awie mɔ wɔ mekɛ mɔɔ gyimalilɛ ne ɛlɛkɔ zo la. Saa ɔnle kɛ ɛnlua wɔ fonu ne a, ɔwɔ kɛ ɛfa ɛto ɛleka mɔɔ awie fɛlɛ wɔ a ɔnrɛgyegye awie mɔ la. Saa ɛlɛfa moba mɔɔ le kɛ kɔmputa la wɔali gyima wɔ gyimalilɛ ne abo a, yɛ ye mɔɔ ɔnrɛgyegye awie mɔ la. Gyimalilɛ ne ɛlɛkɔ zo a mmadi aleɛ anzɛɛ mmano nzule. (Nolo. 3:1) Maa ɛ nye ɛhɔ tendɛvolɛ ne anwo zo. Saa bɛlɛkenga ngɛlɛlera bie a, buke wɔ Baebolo ne na di ɔ nzi. Kɛlɛ edwɛkɛ sikalɛ bie mɔ fa sie.
4. Kɛzi awovolɛ bahola aboa bɛ mra bɛamaa bɛadie na bɛazukoa ɛ?
4 Yɛkulo kɛ yɛ mra noko tie na bɛsukoa. Mrɛlɛbulɛ 29:15 ka kɛ: “Kakula mɔɔ bɛkɛdu ɔ nwo bɛkɛhyɛ ye la gua ɔ nli anyunlu aze.” Ɛhye ati, ɔle kpalɛ kɛ mbusua badɛnla ɛleka ko amaa awovolɛ anlea kɛ bɛ mra ne mɔ ɛlɛtie gyimalilɛ ne tɛla kɛ bɛbadendɛ, bɛava text bɛamaa, anzɛɛ bɛaluolua nu la. Ɔwɔ kɛ bɛyɛ ɛhye mekɛ biala yɛɛ mekɛ mɔɔ bɛlɛyɛ drama ne la. Saa bɛle ngakula somaa mɔɔ bɛnrɛde mɔɔ bɛlɛka la amuala abo bɔbɔ a, ɔwɔ kɛ bɛtete bɛ bɛmaa bɛtɛnla aze koonwu.
5. Kɛmɔti a nvasoɛ wɔ zo kɛ yɛsia yɛneɛnlea nyianu ngyehyɛleɛ ne anu a, na kɛ ɔkɛyɛ na yɛayɛ zɔ ɛ?
5 Bɛkpɔne Nyianu Ne Kenle Ko Biala A: Mmamaa ɔkyɛ na wɔala. Da ndɛ na die ɛ menle kpalɛ. Ɛsuzu mɔɔ ɛdele la anwo kpalɛ a ɔbaboa wɔ yeamaa wɔahakye ye dahuu. Ɛhye ati, ɔbayɛ kpalɛ kɛ bɛbava mekɛ ekyi bɛazuzu nyianu ne anwo nɔsolɛ biala kɛ abusua la. Saa ɛ nee ɛ gɔnwo mɔ kɔ aleɛlilɛleka a, duzu ati a ɛnva edwɛkɛ ekyi mɔɔ ɛhɛlɛle la ɛngɔ na ɛnga nuhua ko anzɛɛ nwiɔ mɔɔ ɛ nye liele nwolɛ kpalɛ la anwo edwɛkɛ ɛngile bɛ ɛ? Saa bɛkpɔne nyianu ne na bɛba sua nu a, bɛbahola bɛava mekɛ ekyi bɛazuzu edwɛkɛ ne anwo wɔ bɛ Abusua Ɛzonlenlɛ ne anu kɛ abusua la na bɛanwu kɛzi bɛbava bɛali gyima la. Eza bɛbahola bɛaye mekɛ bɛazie ɛkɛ dapɛne biala bɛava bɛazuzu buluku fofolɛ biala mɔɔ bɛyele la foa bie anwo.
6. Asoo mɔɔ hyia ala a le kɛ yɛbahɔ nyianu ne? Kilehile nu.
6 Ɛkponledolɛ biala bodane a le kɛ ɔmaa bɛanyia aleɛ bɛali na bɛanyia zolɛ nvasoɛ. Yɛbahola yɛaha edwɛkɛ ko ne ala wɔ sunsum nu aleɛ mɔɔ bɛbava bɛamaa yɛ wɔ maangyeba nyianu ne abo la anwo. Ɔrɛla ye kɛ yɛbahɔ biala bie, yɛadie ye kpalɛ na yɛava mɔɔ yɛkɛzukoa la yɛabɔ yɛ ɛbɛla.