Mmamaa Ɛzulolɛ Ka Wɔ—Di Nganeɛ Mɔɔ Ɛte Kɛ Ɛnrɛhola La Azo
1. Duzu ati a bie mɔ ɛnyɛ Baebolo ɛzukoalɛ ɛ?
1 Ɛnyɛ Baebolo ɛzukoalɛ ɔluakɛ ɛnlɛ anwodozo kɛ ɛbahola wɔayɛ ye kpalɛ la ati ɔ? Mekɛ bie, tete nɔhalɛ azonvolɛ mɔɔ le kɛ Mosisi nee Gyɛlɛmaya la dele nganeɛ kɛ bɛnrɛhola bɛ gyima ne yɛ. (Ade. 3:10,11; 4:10; Gyɛ. 1:4-6) Ɛhye ati, menli ta te nganeɛ zɛhae. Kɛzi yɛbahola yɛali zo ɛ?
2. Duzu ati a ɔnle kɛ yɛyɛ azua nu daselɛlilɛ gyima ne ala na yɛgyakyi Baebolo ɛzukoalɛ gyima ne yɛmaa awie mɔ ɛ?
2 Bɛmaa yɛhakye kɛ Gyihova ɛmmaa yɛnyɛ debie mɔɔ bo yɛ anwosesebɛ zo la. (Edw. 103:14) Yemɔti, gyima mɔɔ yɛlɛ kɛ ‘yɛmaa menli arayɛ ɛdoavolɛma,’ na ‘yɛahilehile bɛ’ la le mɔɔ yɛbahola yɛayɛ a. (Mat. 28:19, 20) Gyihova anva nwolɛ adenle ne ammaa bɛdabɛ mɔɔ bɛlɛ anwubielɛ anzɛɛ ahyɛlɛdeɛ dɔɔnwo wɔ yɛ avinli la angomekye. (1 Kɔl. 1:26, 27) Yemɔti, ɔnle kɛ yɛyɛ azua nu daselɛlilɛ gyima ne ala na yɛgyakyi Baebolo ɛzukoalɛ gyima ne yɛmaa awie mɔ.
3. Kɛzi Gyihova ɛziezie yɛ ɛmaa Baebolo ɛzukoalɛ gyima ne ɛ?
3 Gyihova Maa Yɛfɛta: Gyihova a maa yɛfɛta kɛ ɛdoavolɛma a. (2 Kɔl. 3:5) Ɔdua ye ahyehyɛdeɛ ne azo ɔkile yɛ Baebolo nu nɔhalɛ mɔɔ menli mɔɔ ze nwoma kpalɛ bɔbɔ wɔ ewiade ye anu la ɛnze la. (1 Kɔl. 2:7, 8, NW) Yemaa bɛyɛ adenle mɔɔ Kilehilevolɛ Kpole ne, Gyisɛse, luale zo hilehilele la anwo kɛlɛtokɛ amaa yɛazukoa, na ɔdua asafo ne azo ɔmaa yɛkɔ zo yɛnyia ndetelɛ. Bieko, Gyihova ɛmaa yɛnyia ninyɛne mɔɔ yɛbava yɛahilehile Baebolo ne la. Yemaa yɛnyia mbuluku mɔɔ le kɛ Baebolo ne Kilehile buluku ne mɔɔ maa yɛnwu nɔhalɛ ne kpalɛ wɔ adenle sikalɛ mɔɔ ɔ bo ɛdelɛ ɛnyɛ se azo la. Baebolo ɛzukoalɛ ɛnyɛ se kɛmɔ bie a yɛdwenle kɛ ɔde la.
4. Duzu ati yɛkola yɛnyia anwodozo kɛ Gyihova baboa yɛ a?
4 Ɔlua Gyihova moalɛ zo, Mosisi nee Gyɛlɛmaya holale yɛle bɛ gyima ne. (Ade. 4:11, 12; Gyɛ. 1:7, 8) Yɛkola yɛsɛlɛ Gyihova kɛ ɔboa yɛdayɛ noko. Baebolo ɛzukoalɛ biala mɔɔ yɛkɛyɛ, kɛ ɔde ye biala la, le adenle mɔɔ yɛdua zo yɛkile awie Gyihova anwo nɔhalɛ ne, na ɛhye sɔ Nyamenle anye. (1 Dwɔn 3:22) Yemɔti, fa yɛ wɔ bodane kɛ ɛbayɛ Baebolo ɛzukoalɛ gyima ne, mɔɔ le daselɛlilɛ gyima ne foa mɔɔ yɛ anyelielɛ na ɔmaa ahunlundwolɛ kpole la bie.