Mmatwehwenle Ɛ Bo Aze kɛ Ɛbayɛ Baebolo Ɛzukoalɛ!
1 Saa yɛbɔ mɔdenle yɛfa yɛ nwo yɛwula Nyamenle Belemgbunlililɛ ne anwo edwɛkpahanlɛ gyima ne anu a, ɔmaa ‘yɛyɛ menli mɔɔ ɔwɔ kɛ yɛyɛ bɛ boɛ la boɛ.’ (Mrɛ. 3:27) Edwɛkɛ kpalɛ biala ɛnle ɛkɛ mɔɔ yɛbahola yɛaha yɛahile alesama tɛla kɛ yɛbaha Nyamenle Belemgbunlililɛ ne mɔɔ bava asetɛnla kpalɛ ara la anwo edwɛkɛ yɛahile bɛ. Bie a ɛkola ɛdua mgbemgbɛne nu daselɛlilɛ anzɛɛ mbuluku mɔɔ ɛfa ɛmaa la azo ɛka mɔɔ Belemgbunlililɛ ne bayɛ la anwo edwɛkɛ ɛkile awie mɔ, duzu ati a ɛnva ɛnzie ɛnye zo kɛ ɛbayɛ Baebolo ɛzukoalɛ, saa ɛnyɛ bie a?
2 Ɔdwu mekɛ ne bie a, mɔɔ twe yɛ sia na ɔmmaa yɛngola yɛnyɛ Baebolo ɛzukoalɛ la a le kɛzi yɛte nganeɛ wɔ Baebolo ɛzukoalɛ ɛyɛlɛ nwo la. Bie mɔ ɛnyɛ Baebolo ɛzukoalɛ ɔboalekɛ bɛte nganeɛ kɛ bɛnfɛta anzɛɛ bɛnlɛ mekɛ. Nzuzulɛ ɛhye mɔ mɔɔ doɔdoa zo la baboa wɔ amaa wɔayɛ Baebolo ɛzukoalɛ.—Mat. 28:19; Gyi. 20:20.
3 Anwodozo Mɔɔ Yɛnlɛ: Bie a wɔ nwomazukoalɛ wɔ aze anzɛɛ debie bie ati ɛnlɛ anwodozo kɛ ɛbahola wɔayɛ Baebolo ɛzukoalɛ. Ɛnee Keleseɛnema azonvolɛ mɔɔ bɔ mɔdenle kpalɛ wɔ ɛvoya ne mɔɔ lumua la anu la “ɛnze nwoma” yɛɛ bɛmbu bɛ. Duzu a boale bɛ manle bɛholale bɛhilehilele menli fofolɛ nɔhalɛ ne ɛ? “Ɛnee bɛ nee Gyisɛse a . . . lua a.” (Gyi. 4:13) Bɛzukoale bɛvile Gyisɛse, Kilehilevolɛ Kpole ne mɔɔ bɛhɛlɛ ye ngilehilelɛ nee ye ndenle mɔɔ ɔfa zo ɔkilehile la anwo edwɛkɛ wɔ Baebolo ne anu la ɛkɛ. Saa wɔ nwomazukoalɛ wɔ aze bɔbɔ a, kɛkala ɛlɛsukoa Nyamenle nee ye atiakunlukpɔkɛ ne anwo debie na nwomazukoalɛ biala ɛnle ɛkɛ mɔɔ tɛla ɛhye a.—Aye. 50:4; 2 Kɔl. 3:5.
4 Ɛnee ɔdwu mekɛ ne bie a Gyihova dua ye ngapezoma anwo zo tea maanlebuvoma anzɛɛ menli gyɛne mɔɔ lɛ gyinlabelɛ kpole mɔɔ kɛyɛ ɛtane la. Ngapezoma ɛhye mɔ ko a le Emɔso mɔɔ ɛnee ye gyinlabelɛ wɔ aze la. Emɔso mumua ne hanle kɛ: “Menle Nyamenle kpɔmanvolɛ, yɛɛ menle Nyamenle kpɔmavolɛ ra. Meka mboane yɛɛ feege mbaka ɛnleanlɛ gyima yɛɛ meyɛ a.” (Emɔ. 7:14) Noko akee, Emɔso amkpo kɛ ɔbaha Gyihova ndɛnebualɛ edwɛkɛ ne yeahile ɛsɔfo Amazaya mɔɔ ɛnee sonle ɛnlankɛ ralɛ la. (Emɔ. 7:16, 17) Ɔwɔ kɛ yɛkakye kɛ Nyamenle gyima a yɛlɛyɛ a, yemɔti ɔbaboa yɛ yɛamaa yɛali munli na yɛahola yɛayɛ gyima ne mɔɔ yeva yewula yɛ sa nu la.—2 Tem. 3:17.
5 Alagye Mɔɔ Yɛnlɛ: Saa bɔbɔ ɛnlɛ alagye a, ɔbahola yeara ye kɛ wɔva mekɛ bie wɔzie ɛkɛ ne mɔɔ ɛfa ɛka edwɛkpa ne a. Baebolo ɛzukoalɛ mɔɔ ɛbayɛ la le ɛzonlenlɛ gyima ne foa mɔɔ yɛ anyelielɛ a. Ɔle nwolɛ adenle kpole kɛ ɛbanwu kɛ Gyihova Edwɛkɛ ne ɛlɛyɛ gyima wɔ awie mɔɔ wɔhilehile ye la asetɛnla nu. (Hib. 4:12) Saa yɛtu yɛ nwo yɛmaa yɛboa awie yɛmaa ‘ɔnwu nɔhalɛ ne a,’ Gyihova anye die (1 Tem. 2:4) Anwumabɔvolɛ ne mɔ bɔbɔ di fɛlɛko saa bɛnwu kɛ awie ɛhakyi ye subane dɛba ne na ɔlɛnyi sunsum nu a.—Luku 15:10.
6 Nyamenle ɛhulolɛdeɛ a le kɛ “menli kɔsɔɔti nwu nɔhalɛ ne na bɛnyia ngoane.” (1 Tem. 2:4) Nea nwolɛ adenle titile mɔɔ yɛlɛ kɛ yɛ nee Nyamenle bayɛ ko wɔ ye ɛhulolɛdeɛyɛlɛ nu, mɔɔ yɛndwehwenle yɛ bo aze kɛ yɛbayɛ Baebolo ɛzukoalɛ a!
[Debiezukoalɛ kpuyia ne mɔ]
1. Duzu a yɛyɛ a ɔbahile kɛ ‘yɛyɛ menli mɔɔ ɔwɔ kɛ yɛyɛ bɛ boɛ la boɛ’ ɛ?
2. Duzu a bahola ahwe yɛ azia mɔɔ ɔnrɛmaa yɛnrɛbɔ Baebolo ɛzukoalɛ bo a?
3. Duzu ati a yɛfɛta kɛ yɛkɛhilehile awie mɔ Baebolo ne a?
4. Duzu a yɛsukoa yɛfi Emɔso neazo ne anu a?
5. Duzu ati a, saa yɛnlɛ alagye bɔbɔ a, ɔwɔ kɛ yɛbɔ mɔdenle yɛyɛ Baebolo ɛzukoalɛ a?
6. Nwolɛ adenle boni a yɛlɛ kɛ yɛbayɛ Nyamenle ɛhulolɛdeɛ ɛ?