Fa Sie Ɛ Nye zo kɛ Ɛbayɛ Baebolo Ɛzukoalɛ
1 “Bɛdo bɛ nye bɛnlea ɛya nu lɔ boɛ; nzoleɛ ɛbolo, na yedwu mɔɔ ɔwɔ kɛ bɛbu a.” (Dwɔn 4:35) Zɔhane edwɛkɛ ne mɔɔ Gyisɛse Kelaese hanle la fane gyinlabelɛ mɔɔ Keleseɛne azonvolɛ wɔ nu ɛnɛ la anwo bɔkɔɔ.
2 Bɛlɛnyia menli mɔɔ lɛ ahonle kpalɛ mɔɔ kulo kɛ bɛkilehile bɛ Gyihova ndenle la. Ɛhye da ali wɔ ɛdoavolɛma fofolɛ dodo mɔɔ bɛsɔne bɛ ɛvolɛ biala la anu. Saa ɛ nye die nwolɛ kpalɛ kɛ ɛbayɛ Baebolo ɛzukoalɛ a, duzu a ɛbahola wɔayɛ a?
3 Fa Sie Ɛ Nye Zo: Mɔɔ lumua la, fa sie ɛ nye zo kɛ ɛbabɔ ɔ bo wɔayɛ Baebolo ɛzukoalɛ. Mekɛ mɔɔ ɛlɛkɔ daselɛlilɛ la, kakye mɔɔ wɔva wɔzie ɛ nye zo la. Kɛmɔ ngilehilelɛ nee nolobɔlɛ boka yɛ Keleseɛne gyima ne anwo la ati, ɔwɔ kɛ yɛ muala yɛbɔ mɔdenle kɛ yɛbayɛ Baebolo ɛzukoalɛ dɔɔnwo.—Mat. 24:14; 28:19, 20.
4 Ninyɛne Mɔɔ Ɔwɔ Kɛ Ɛkakye: Ɔwɔ kɛ Belemgbunlililɛ nolobɔlɛma fi ahonle nu yɛ asɔne. Ɔdwu mekɛ ne bie a yɛyia menli mɔɔ ɛyɛ asɔne kɛ bɛkpondɛ sunsum nu moalɛ la. Nea nyilalɛ mɔɔ wɔ nu kɛ Gyihova kɛva yɛ kɛli gyima kɛmaa yɛkɛnwu menli ɛhye mɔ na yɛkɛhilehile bɛ a!—Hag. 2:7; Gyi. 10:1, 2.
5 Adiema raalɛ ko yɛle asɔne kɛ ɔkpondɛ Baebolo ɛzukoalɛ na akee ɔvale Ɛbahulo kɛ Ɛbanwu Dɔɔnwo Wɔavale Bible ne Anwo? tract ne ɔguale ye gyima nu ɛkɛ. Mekɛ mɔɔ raalɛ bie vale ko la, ɔgengale ye kɔsɔɔti na ɔbɔle ɔ bo kɛ ɔkɛlɛ yealie bie, adiema raalɛ ne nee ye dendɛle na ɔholale ɔbɔle Baebolo ɛzukoalɛ bo.
6 Nolobɔlɛma mɔɔ bɔ mɔdenle kpondɛ Baebolo ɛzukoalɛ na bɛyɛ la bɛaboa wɔ bɛamaa wɔayɛ Baebolo ɛzukoalɛ mɔɔ wɔva wɔzie ɛ nye zo la. Fa asɔneyɛlɛ kpondɛ bie na nyia moalɛ kɔsɔɔti mɔɔ wɔ ɛkɛ mɔɔ bamaa wɔahola wɔayɛ mɔɔ gyi ɛ nye zo la anu nvasoɛ. Bie a ɔnrɛhyɛ ɛdawɔ noko ɛbanyia anyelielɛ mɔɔ vi Baebolo ɛzukoalɛ ɛyɛlɛ nu ba la bie.