Boa Menli Maa Bɛdie Nyamenle
1. Brohyua boni mɔ a bɛyele wɔ “Nyamenle Belemgbunlililɛ Ɛrɛla!” Maangyeba Nyianu ne abo a, na duzu ati a nvasoɛ wɔ brohyua ɛhye mɔ azo ɛ?
1 Wɔ “Nyamenle Belemgbunlililɛ Ɛrɛla!” Maangyeba Nyianu ne abo, bɛyele brohyua fofolɛ nwiɔ mɔɔ se, Tie Nyamenle Na Nyia Dahuu Ngoane nee mɔɔ ɔ bo ɛdelɛ ɛnyɛ se mɔɔ se, Tie Nyamenle la ali. Kɛmɔ nuhua edwɛkɛ ne anzo la ati, ɔmaa bɛkola bɛkile ɔ bo ndɛndɛ. Nɔhalɛ nu, bɛliele bɛdole nu kɛ bɛhile Tie Nyamenle Na Nyia Dahuu Ngoane abo bɛhɔ aneɛ 431 anu.
2. Nwane mɔ a banyia brohyua ɛhye mɔ azo nvasoɛ a?
2 Nwane mɔ a brohyua ɛhye mɔ baboa bɛ titile a? Suzu edwɛkɛ ɛhye mɔ mɔɔ ta kɔ zo wɔ ewiade amuala la anwo nea:
• Nolobɔlɛnli mɔɔ nee suamenle bie ɛlɛdi adwelie, bie a mekɛ mɔɔ lumua anzɛɛ ɔlɛyɛ sia kɔkpɔla la, ɔnwu kɛ suamenle ne ɛnze nwoma, anzɛɛ ɔnze kenga kpalɛ.
• Nolobɔlɛnli bie ɛlɛka edwɛkɛ ne ahile menli mɔɔ ka aneɛ mɔɔ yɛhile yɛ mbuluku ne ekyi abo wɔ nu anzɛɛ yɛtɛkilele bie abo wɔ nu la. Anzɛɛ menli dɔɔnwo mɔɔ wɔ azɛlɛsinli ne anu la ɛngola ɛngenga aneɛ mɔɔ bɛka la.
• Nolobɔlɛnli ka edwɛkɛ ne kile mumule sonla mɔɔ wɔ ye azɛlɛsinli ne anu la.
• Awovolɛ kulo kɛ ɔkilehile ɔ ra kakula mɔɔ ɛtɛnwunle ɛgengalɛ la nɔhalɛ ne.
3. Kɛzi bɛyɛle Tie Nyamenle brohyua ne ɛ?
3 Kɛzi Bɛyɛ Brohyua Ne Mɔ La: Edwɛkɛ ekyi bie ala a wɔ Tie Nyamenle ne anu a, ɔta ɔyɛ edwɛkɛ sikalɛ nee nwolɛ Ngɛlɛlera mɔɔ wɔ mukelɛ ne abo mɔɔ si edwɛkɛtitile ne mɔ azo la. Kɛmɔti ɛ? Fa ye kɛ awie ɛmaa wɔ brohyua ne bie wɔ aneɛ mɔɔ ɛngola ɛngenga la anu, bie a ɛnnwu ninyɛne mɔɔ bɛhɛlɛ ye wɔ nu la. Saa nuhua nvoninli ne mɔ le ngɛnlɛma bɔbɔ a, asoo ɛ nye balie nwolɛ? Kyɛkyɛ, ɛ nye ɛnrɛlie nwo. Zɔhane ala a mbuluku mɔɔ bɛhɛlɛ nu la maa menli mɔɔ ɛnze kenga la ahonle tu a. Ɛhye ati, bɛyɛ nvoninli ngɛnlɛma wɔ mukelɛ biala anu na bɛva debie mɔɔ bamaa bɛanwu nvoninli ko biala la bɛboka nwolɛ.
4. Kɛzi bɛyɛ le Tie Nyamenle Na Nyia Dahuu Ngoane brohyua ne ɛ?
4 Nvoninli mɔɔ wɔ Tie Nyamenle ne anu la ko ne ala a wɔ Tie Nyamenle Na Nyia Dahuu Ngoane ne noko anu a. Bɛyɛ kɛ yɛ nee menli mɔɔ ɛnze kenga kpalɛ anzɛɛ ɛlɛsukoa ɛgengalɛ la bazukoa. Kilehilevolɛ ne noko bahola anlea brohyua ɛhye anu wɔ mekɛ mɔɔ ɔ nee awie ɛlɛsukoa Tie Nyamenle brohyua ne la. Ɛzukoalɛdeɛ mɔɔ wɔ mukelɛ nwiɔ biala ati zo bɛne zo, kpuyia mɔɔ bɛbua wɔ zɔhane mukelɛ ne mɔ anu la wɔ ɛkɛ. Bɛhɛlɛ edwɛkɛ nee ngɛlɛlera wɔ nvoninli ne mɔ anwo. Mukelɛ dɔɔnwo ɛlɛkɔ awieleɛ a, ɛlɛka mɔɔ bɛva edwɛkɛ bieko nee Ngɛlɛlera bɛgua mɔɔ saa sukoavo ne bɔ mɔdenle a bɛbahola bɛ nee ye azuzu nwo la wɔ ɛkɛ.
5. Mekɛ boni yɛɛ kɛzi yɛbava brohyua ɛhye mɔ yɛamaa ɛ?
5 Kɛzi Bɛfa Bɛdi Gyima La: Saa ɛkɔ daselɛlilɛ wɔ azua nu na ɛsuzu kɛ ɛyɛ zɔ a ɔle kpalɛ a, ɛbahola wɔava brohyua ne anu ko biala wɔamaa, saa tɛ brohyua bɔbɔ a bɛlɛfa bɛamaa wɔ zɔhane siane ne anu a. (Nea ɛlɛka ne mɔɔ se, “Kɛzi Yɛbava Yɛamaa La.”) Ɛbahola wɔava wɔamaa wɔ mekɛ mɔɔ ɛlɛyɛ sia kɔkpɔla ɔlua edwɛkɛ sikalɛ mɔɔ ɛbaha wɔahile anyelielɛnli ne kɛ ɛfa debie wɔahile ye na wɔava brohyua ne wɔamaa ye la azo.
6. Kɛzi yɛbava brohyua ɛhye mɔ yɛayɛ Baebolo ɛzukoalɛ ɛ?
6 Kɛmɔ kpuyia ɛmboka Tie Nyamenle brohyua ne anwo la ati, debiezukoalɛ ne ɛnrɛyɛ kpuyia nee mualɛ kɛmɔ yɛta yɛyɛ ye wɔ Baebolo ne Kilehile buluku ne anu la. Amaamuo biala anu menli anye die kɛ bɛkɛdie edwɛkɛ. Ɛhye ati, fa nvoninli ne kilehile edwɛkɛ mɔɔ wɔ Baebolo ne mɔɔ vi sunsum nu la anu. Kilehile deɛ mɔɔ bɛyɛ nwolɛ nvoninli la anu. Maa ɔyɛ anyelielɛ. Maa sukoavo ne ɛhile ye adwenle wɔ mɔɔ yenwu ye la anwo. Kenga ngɛlɛlera mɔɔ wɔ mukelɛ ne abo la na ɛ nee ye ɛzuzu edwɛkɛ ne anwo. Biza ye kpuyia maa ɔva ɔ nwo ɔwula debiezukoalɛ ne anu na nea kɛ ɔte mɔɔ ɔlɛsukoa la abo. Saa Tie Nyamenle Na Nyia Dahuu Ngoane ne a ɔlɛsukoa a, ɛ nee ye bɛgenga tɛkese nee ngɛlɛlera mɔɔ wɔ nvoninli ko biala mɔɔ bɛlɛsuzu nwolɛ la.
7. Kɛ ɔkɛyɛ na yɛaboa yɛ Baebolo sukoavo ne yɛamaa yeanyia anyuhɔlɛ ɛ?
7 Boa Sukoavo Ne Maa Ɔnyia Anyuhɔlɛ: Yɛlɛ anyelazo kɛ wɔ adwelielilɛ ne bamaa sukoavo ne anyia ɛhulolɛ kɛ ɔbazukoa kɛzi bɛkenga la amaa ɔdaye mumua ne yeazukoa Gyihova anwo nrɛlɛbɛ. (Mat. 5:3; Dwɔn 17:3) Yemɔti, saa Tie Nyamenle ne a bɛlɛfa bɛayɛ debiezukoalɛ ne a mekɛ ɛlɛkɔ la, bie a ɛbayɛ kɛ ɛkile sukoavo ne kɛzi bɛkenga la na wɔahakyi debiezukoalɛ ne wɔahɔ Tie Nyamenle Na Nyia Dahuu Ngoane brohyua ne anu. Ɔnva nwo brohyua biala mɔɔ bɛbazukoa la, sukoavo ne ɛnrɛhola ɛnrɛlie ɛzɔnenlɛ wɔ mekɛ mɔɔ bɛzukoa bɛwie la. Ɔwɔ kɛ ɛkakyi debiezukoalɛ ne ɛkɔ Baebolo ne Kilehile buluku ne anu anzɛɛ buluku gyɛne mɔɔ bamaa yeade Baebolo ne abo kpalɛ la.
8. Duzu ati a ɛ nye die brohyua fofolɛ ɛhye mɔ mɔɔ ɛbava wɔahɔ daselɛlilɛ la anwo ɛ?
8 Saa menli kulo kɛ bɛtɛnla aze dahuu a ɔwɔ kɛ bɛtie aleɛabo Belemgbunli ne. (Aye. 55:3) Na ɔle Gyihova ɛhulolɛdeɛ kɛ “menli kɔsɔɔti,” mɔɔ bɛdabɛ mɔɔ bɛnze kenga boka nwo la sukoa kɛzi bɛtie ye la. (1 Tem. 2:3, 4) Nea kɛzi yɛ nye ɛlie kɛ yɛnyia brohyua fofolɛ ɛhye mɔ mɔɔ yɛbava yɛahilehile menli yɛamaa bɛadie Nyamenle la!
[Ɛlɛka wɔ mukelɛ 3]
Kɛzi Yɛbava Yɛamaa La
Buke mukelɛ 2-3 kile suamenle ne, na ka kɛ: “Ɛkulo kɛ ɛtɛnla ewiade mɔɔ le kɛ ɛhye la anu ɔ? [Maa ɔbua.] Ngɛlɛlera ne bɔ ɛwɔkɛ kɛ [anzɛɛ buluku nwuanzanwuanza ɛhye ka kɛ] ɔnrɛhyɛ Nyamenle bamaa ewiade ɛhye ayɛ ɛleka mɔɔ le kɛnlɛma, anzondwolɛ wɔ, mɔɔ awie biala ɛnrɛli ehyia anzɛɛ anwo ɛnrɛdo ye la. Nea mɔɔ ɔwɔ kɛ yɛyɛ na yɛadɛnla ɛkɛ la. [Kenga Ayezaya 55:3, mɔɔ bɛha nwolɛ edwɛkɛ wɔ mukelɛ 3 ne anwuma ɛkɛ la.] Ɔka kɛ, ‘yɛrɛla’ Nyamenle ɛkɛ na ‘yɛdie’ ye. Noko kɛzi yɛtie Nyamenle ɛ?” Buke kɔ mukelɛ 4-5, na ɛ nee ye bɛzuzu mualɛ ne anwo. Saa ɔnlɛ alagye a, gyakyi brohyua ne maa ye na yɛ ngyehyɛleɛ sia kɔ na bɛzuzu mualɛ ne anwo.