Ka Edwɛkɛ Ne Kile “Menli Muala”
1. Kɛzi edwɛkpakavolɛma mɔɔ bɔ mɔdenle la le kɛ dwinvolɛ mɔɔ ɛbe la ɛ?
1 Dwinvolɛ mɔɔ ze gyima kpalɛ la lɛ adwinli mbulalɛ dɔɔnwo, yɛɛ ɔze mekɛ nee kɛzi bɛfa ko biala bɛdi gyima la. Zɔhane ala a yɛlɛ mbuluku ngakyile mɔɔ boa yɛ ɔmaa yɛyɛ yɛ gyima kɛ edwɛkpakavolɛma a. Kɛ neazo la, bɛyɛ brohyua mɔɔ ka ninyɛne ngakyile nwo edwɛkɛ la kɛ bɛfa bɛaboa yɛ bɛamaa yɛaha edwɛkɛ ne yɛahile “menli muala.” (1 Kɔl. 9:22) Edwɛkɛ mɔɔ vea Yɛ Belemgbunlililɛ Gyima ɛhye anu la kile brohyua ɛhye mɔ bie, menli mɔɔ bɛyɛ bɛmaa bɛ nee kɛzi yɛbava brohyua ɛhye mɔ yɛamaa la.
2. Mekɛ boni a yɛbahola yɛava brohyua yɛamaa wɔ daselɛlilɛ nu a?
2 Mekɛ Mɔɔ Bɛfa Brohyua Bɛmaa: Dwinvolɛ fa ye mbulalɛ di gyima wɔ mekɛ mɔɔ baboa ye la. Zɔhane ala a yɛfa brohyua yɛdi gyima wɔ mekɛ mɔɔ yɛte nganeɛ kɛ ɔbaboa awie la, na tɛ siane mɔɔ bɛhile kɛ yɛva yɛmaa la angome ala. Kɛ neazo la, saa bɛka kɛ yɛva Baebolo ne Kilehile buluku ne yɛmaa wɔ maanle mɔɔ bɛnle Keleseɛnema na bɛ nye ɛnlie Baebolo ne anwo la a, ɔbayɛ kpalɛ kɛ yɛbava brohyua mɔɔ fɛta la yɛamaa, na saa awie kile nwolɛ anyelielɛ a nzinlii yɛava Baebolo ne Kilehile buluku ne yɛamaa ye.
3. Duzu ati a ɔwɔ kɛ yɛnwu kɛzi yɛbava yɛ mbuluku ne mɔ yɛali gyima wɔ daselɛlilɛ nu ɛ?
3 Ngɛlɛlera ne ka bɛdabɛ mɔɔ bɛbe wɔ bɛ gyima nu la anwo edwɛkɛ. (Mrɛ. 22:29) Nɔhalɛ nu, gyima biala anwo ɛngyia ɛndɛla “edwɛkpa ne anwo gyima nwuanzanwuanza ne.” (Wulo. 15:16, NW) Amaa yɛayɛ kɛ “gyimayɛvolɛ mɔɔ ɛnze ye gyima nwo nyiane” la, yɛbabɔ mɔdenle yɛava yɛ mbuluku ne mɔ yɛali gyima kpalɛ.—2 Tem. 2:15.