Ɛbabɔ Baebolo Ɛzukoalɛ Bo Wɔ October Anu Ɔ?
1. Buluku boni a yɛbava yɛamaa wɔ October a?
1 Buluku mɔɔ yɛbava yɛamaa wɔ October la a le Watchtower nee Awake! magazine. Amaa yɛahɔ zo yɛaboa menli mɔɔ anye kɛlie nwo la, bɛha bɛhile yɛ kɛ yɛva trate ne mɔɔ se Ɛkulo kɛ Ɛnwu Nɔhalɛ ne Ɔ? la yɛmaa na yɛbɔ mɔdenle yɛva yɛbɔ Baebolo ɛzukoalɛ bo. Kɛ ɔkɛyɛ na yɛayɛ zɔ wɔ mekɛ mɔɔ yɛlɛyɛ sia kɔkpɔla la ɛ?
2. Kɛzi yɛbahola yɛava Nwu Nɔhalɛ ne trate ne yɛabɔ Baebolo ɛzukoalɛ bo wɔ mekɛ mɔɔ yɛkɛyɛ sia kɔkpɔla wɔ menli mɔɔ liele magazine la ɛkɛ ɛ?
2 Kɛzi Bɛfa Trate Ne Bɛdi Gyima La: Yɛbahola yɛaha kɛ: “Magazine ne mɔɔ menvale memanle wɔ la tu menli mɔɔ wɔ ɛzonlenlɛ kɔsɔɔti anu la folɛ kɛ bɛzukoa Baebolo ne. [Fa Nwu Nɔhalɛ ne trate ne maa suamenle ne na kenga kpuyia ne mɔ mɔɔ wɔ zo la kile ye.] Kpuyia ngɛnlɛma mɔɔ Baebolo ne ye ɔ nloa maa ɔyɛ anyelielɛ la bie mɔ a wɔ ɛke la. Asoo wɔbiza ɛhye mɔ anu bie ɛlɛ?” Suamenle ne ye ɔ nloa wie a, fa trate ne na bɛbɔ nu bɛye ye kpuyia ne ko anloa, na kenga ngɛlɛlera ne mɔ mɔɔ bɛhile wɔ ɛkɛ la anu ko. Akee kilehile nuhua kɛ, ɛhye le mɔɔ Baebolo ne kilehile la anwo neazo ekyi bie ala, na fa Baebolo ne Kilehile buluku ne maa ye. Akee yɛbahola yɛ nee ye azuzu tile mɔɔ ɔkɛkpa ɔkɛvi nuninyɛne ne anu la ɛdendɛkpunli ne mɔɔ lumua la anwo. Anzɛɛ yɛbahola yɛabuke ɛleka mɔɔ deɛ mɔɔ yɛzuzule nwolɛ wɔ trate ne anu la anwo edwɛkɛ dɔɔnwo wɔ la. Edwɛkɛ mɔɔ yɛbahola yɛava yɛali gyima la bie mɔ a wɔ ɛke la:
● Asoo Nyamenle dwenle yɛ nwo amgba? (m. 9-11, ɛden. 6-10)
● Asoo konle nee amaneɛnwunlɛ bo bapɛ? (m. 12, ɛden. 12-13)
● Saa yɛwu a yɛkɔ ni? (m. 59-60, ɛden. 7-8)
● Asoo anyelazo bie wɔ ɛkɛ maa mɔwuamra? (m. 71, ɛden. 13-15)
● Kɛzi ɔwɔ kɛ meyɛ asɔne na Nyamenle adie ɛ? (m. 166-167, ɛden. 5-8)
● Kɛzi mebanyia anyelielɛ wɔ ɛbɛlabɔlɛ nu ɛ? (m. 9, ɛden. 4-5)
3. Kɛzi yɛbahola yɛanlea gyinlabelɛ ne anwo na yɛahakyi kɛzi yɛbayɛ debiezukoalɛ ne la ɛ?
3 Nɔhalɛ nu, saa gyinlabelɛ ne ati yɛangola yɛambɔ Baebolo ɛzukoalɛ bo wɔ Baebolo ne Kilehile buluku ne anu na yɛangile ye kɛzi bɛsukoa ye la wɔ mekɛ mɔɔ lumua mɔɔ yɛkɛyɛ sia kɔkpɔla la a, yɛbahola yɛayɛ ngyehyɛleɛ na dahuu yɛadoa adwelielilɛ ne azo. Saa yɛnea kɛzi ahenle anye die edwɛkɛ ne anwo la a, yɛbahola yɛ nee ye azuzu kpuyia dɔɔnwo mɔɔ wɔ trate ne anu la anwo fane dɔɔnwo kolaa na yɛabɔ buluku ne ɛzukoalɛ bo. Ɔrɛla ye kɛ yɛbava trate ɛhye mɔɔ boa kpalɛ la yɛali gyima wɔ October yɛava yɛabɔ Baebolo ɛzukoalɛ bo na yɛaboa menli mɔɔ lɛ ahonle kpalɛ la yɛamaa ‘bɛanwu nɔhalɛ ne.’—Dwɔn 8:31, 32.