Adehilelɛ Maa Menli Mɔɔ Yɛ Ɛzonlenlɛ Nyianu Foa Ne Mɔ La
Ɔvi Yɛ Belemgbunlililɛ Gyima ɛhye azo mɔɔ kɔ la, bɛde edwɛkɛ mɔɔ wɔ Ɛzonlenlɛ Nyianu ngyehyɛleɛ ne anu la azo bɛyɛ ye sikalɛ. Adehilelɛ nee ngakyelɛ ne mɔ mɔɔ doɔdoa zo la bahilehile mɔɔ bɛhanle ye wɔ edwɛkɛ ne mɔɔ se, “Kɛzi Bɛsiezie Bɛ Nwo Bɛmaa Ɛzonlenlɛ Nyianu,” mɔɔ rale wɔ May 2009 Yɛ Belemgbunlililɛ Gyima ne anu la anu na yeamaa nuhua ala ɛkɛ.
◼ Ɛdendɛlɛ: Ɛhye kile ɛdendɛlɛ mɔɔ gyi edwɛkɛ mɔɔ bɛva bɛmaa la azo mɔɔ bɛnrɛbiza tievolɛma edwɛkɛ wɔ nu a. Ɔwɔ kɛ tendɛvolɛ ne fa ye adwenle sie edwɛkɛ mɔɔ baboa asafo ne kpalɛ la azo.
◼ Kpuyia Nee Mualɛ: Bɛbayɛ ɛhye kɛ Watchtower Ɛzukoalɛ ne la, foa ɛhye lɛ mukenye nee adwulaleɛ sikalɛ na bɛbabiza kpuyia wɔ ɛdendɛkpunli ne mɔ kɔsɔɔti anwo. Ɔnle kɛ ahenle mɔɔ banlea zo la tendɛ dɔɔnwo. Saa mekɛ wɔ nu a, bɛbagenga ngɛlɛlera titile ne mɔ. Ɔnle kɛ bɛkenga ɛdendɛkpunli ne mɔ, kyesɛ bɛhile kɛ bɛyɛ ye zɔ.
◼ Adawubɔlɛ: Ɛhye le ɛdendɛlɛ mɔɔ tievolɛma adawubɔlɛ boka nwo a. Ɔnle ɛdendɛlɛ ala yɛɛ ye kɔsɔɔti ɛnle kpuyia nee mualɛ.
◼ Yɛkile Nee Edwɛkɛbizebizalɛ: Adehilelɛ mɔɔ se bɛyɛ yɛkile la kile kɛ, ɔle adiema ne mɔɔ bɛva foa ne bɛwula ɔ sa nu la gyima kɛ ɔmaa bɛyɛ yɛkile wɔ nu; ɔnle kɛ ɔdaye mumua ne ɔyɛ yɛkile ne. Ɔwɔ kɛ ɔkpa mediema mɔɔ bɔ mɔdenle na bɛyɛ neazo kpalɛ la ɔmaa bɛyɛ, saa ɔkɛyɛ boɛ a ɔwɔ kɛ ɔdumua ɔyɛ ngyehyɛleɛ na ɔ nee bɛ yɛ nea. Ɔnle kpalɛ kɛ ɔkɛmaa nolobɔlɛma mɔɔ bɛle fofolɛ na bɛnlɛ anwubielɛ la kɛyɛ kɛzi ɔwɔ kɛ yɛyɛ gyima ne la anwo yɛkile, kɛ asɛɛ ɔmaa bɛanyia adenle bɛahɔ bamaa ne azo ala, noko akee ɔbahola yeamaa bie mɔ ayɛ suamenle. Nolobɔlɛma mɔɔ ɛlɛyɛ yɛkile bie la ɔwɔ kɛ bɔ mɔdenle nea tievolɛma anyunlu. Ɔwɔ kɛ menli mɔɔ bɛbabizebiza bɛ edwɛkɛ la kɔ bamaa ne azo tɛla kɛ bɛkɛdɛnla menli ne anu la. Ɔwɔ kɛ bɛdumua bɛyɛ yɛkile nee edwɛkɛbizebizalɛ foa ne mɔ bɛnea. Saa mekɛ ne ɛlɛkɔ na adiema bie kulo kɛ ɔte ye ɛdeɛ ne azo a, ɔnrɛmaa bɛnrɛgyakyi yɛkile anzɛɛ edwɛkɛbizebizalɛ ne mɔ. Ɔwɔ kɛ azonvolɛ dumua nwu mgbanyima avinli ngitanwodivolɛ ne anzɛɛ kpanyinli gyɛne kolaa na bɛakpa menli mɔɔ bɛbava bɛ bɛali gyima la.
Saa adehilelɛ titile bie wɔ foa bie anwo a, ɔwɔ kɛ bɛdi zo. Saa mediema yɛ Ɛzonlenlɛ Nyianu foa ne mɔ kɛmɔ bɛhile la a, bɛbaboa bɛamaa Ɛzonlenlɛ Nyianu ne ‘alua ndenle kpalɛ nee ngɛnlɛma zo ayɛ pɛpɛ.’—1 Kɔl. 14:40.