Asafo Dapɛne Debiezukoalɛ Ngyehyɛleɛ Fofolɛ
1, 2. Ɔvi January 2009 mɔɔ kɔ la, nzenzaleɛ boni a bɛbayɛ ye wɔ debiezukoalɛ ngyehyɛleɛ ne anu a?
1 Ewiade amuala mediemayɛlɛ ne dele nolobɔlɛ mɔɔ yɛ anyelielɛ la wɔ April 21-27, 2008, dapɛne ne anu. “Ɔvi January 1, 2009 mɔɔ kɔ la, bɛbayɛ Asafo Buluku Ɛzukoalɛ ne wɔ mekɛ ko ne ala mɔɔ bɛlɛyɛ Teokelase Ɛzonlenlɛ Sukulu nee Ɛzonlenlɛ Nyianu ne la. Bɛbahakyi Asafo Buluku Ɛzukoalɛ ne duma bɛayɛ ye Asafo Baebolo Ɛzukoalɛ.”
2 Dapɛne Debiezukoalɛ Ngyehyɛleɛ: Mekɛ dodo mɔɔ bɛbava bɛayɛ debiezukoalɛ ɛhye mɔɔ edwɛne nee asɔneyɛlɛ boka nwolɛ la bayɛ dɔnehwele 1 mitini 45. Bɛbava edwɛne nee asɔneyɛlɛ bɛabɔ debiezukoalɛ ne abo (Mit. 5), na bɛava Asafo Baebolo Ɛzukoalɛ ne bɛadoa zolɛ (Mit. 25). Yemɔ anzi bɛbayɛ Teokelase Ɛzonlenlɛ Sukulu ne (Mit. 30). Akee bɛbado edwɛne (Mit. 5) bɛava bɛabɔ Ɛzonlenlɛ Nyianu ne (Mit. 35) abo. Bɛbava edwɛne nee asɔneyɛlɛ (Mit. 5) bɛakpɔne debiezukoalɛ ne. Amaa bɛahola bɛaziezie bɛ nwo bɛamaa debiezukoalɛ ɛhye mɔ la, bɛbava Asafo Baebolo Ɛzukoalɛ, Teokelase Ɛzonlenlɛ Sukulu nee Ɛzonlenlɛ Nyianu ne anwo ngyehyɛleɛ bɛara Yɛ Belemgbunlililɛ Gyima ne anu siane biala.
3. Kɛzi bɛbayɛ Asafo Baebolo Ɛzukoalɛ ne ɛ?
3 Asafo Baebolo Ɛzukoalɛ: Bɛbayɛ debiezukoalɛ ɛhye kɛmɔ bɛyɛ Watchtower Ɛzukoalɛ ne la. Ɔngyia kɛ bɛsia bɛti dapɛne ne mɔɔ ɛpɛ nu la debiezukoalɛ ne anu bɛfa bɛbɔ ɔ bo. Emomu, ɔwɔ kɛ bɛka edwɛkɛ sikalɛ bɛfa bɛbɔ ɔ bo. Ɛhye bamaa mediema kɔsɔɔti anyia mekɛ dɔɔnwo ava amaa mualɛ sikalɛ. Ebianutɛnlavolɛ ne banlea ahyehyɛ amaa asafo nu kpanyinli gyɛne ayɛ debiezukoalɛ ɛhye dapɛne biala.
4. Ngakyile boni a bɛbayɛ ye wɔ Ɛzonlenlɛ Nyianu ne anu a?
4 Ɛzonlenlɛ Nyianu: Bɛnrɛhakyi kɛzi bɛyɛ Ɛzonlenlɛ Nyianu ne la, noko bɛbade gyimalilɛ ne azo. Bɛbava mitini nnu bɛabɔ nolo. Ɔwɔ kɛ bɛkola bɛfa mekɛ ɛhye bɛbɔ nolo mɔɔ hyia la na bɛkenga ɔfese ne ngɛlata bie mɔ. Ɔngyia kɛ bɛkenga ninyɛne mɔɔ bɛta bɛbɔ nwolɛ nolo mɔɔ le kɛ daselɛlilɛ ngyehyɛleɛ, ɛkɛ ne ɛziezielɛ, ɛzukoa mgbondabulɛ nee ngɛlata mɔɔ bɛta bɛnyia bɛfi ɔfese ne ɛkɛ ne la wɔ bama ne azo, emomu bɛbava bɛabɔ nolobɔlɛ ɛleka ne bɛamaa mediema agenga. Ɔwɔ kɛ mediema mɔɔ lɛ gyimalilɛ wɔ nu la siezie bɛ nwo kpalɛ na bɛdi mekɛ nee adehilelɛ mɔɔ bɛva bɛmaa la azo.
5. Dapɛne ne mɔɔ maanzinli zo neavolɛ ne kɛra la anu, kɛzi bɛbayɛ asafo debiezukoalɛ ngyehyɛleɛ ne ɛ?
5 Maanzinli zo Neavolɛ Ɛkpɔlalɛ: Bɛnrɛhakyi maanzinli zo neavolɛ dapɛne ngyehyɛleɛ ne. Wɔ Dwɛkɛ, bɛbayɛ Teokelase Ɛzonlenlɛ Sukulu ne nee Ɛzonlenlɛ Nyianu ne na bɛwie a bɛado edwɛne. Akee maanzinli zo neavolɛ ne bamaa mitini 30 ɛdendɛlɛ. Kɛmɔ bɛyɛ ye kɛkala wɔ mekɛ mɔɔ ɔkɛra la, bɛbaye kenle ko bɛazie ɛkɛ bɛava bɛayɛ Asafo Baebolo Ɛzukoalɛ ne, bɛwie a bɛado edwɛne na maanzinli zo neavolɛ ne amaa ɛzonlenlɛ ɛdendɛlɛ. Bɛbava edwɛne nee asɔneyɛlɛ bɛakpɔne debiezukoalɛ ne.
6. Ekpunli zo neavolɛ ne gyima a le boni?
6 Daselɛlilɛ Nyianu: Mgbanyima eku ne bakpa ekpunli zo neavolɛma kɛ bɛnlea daselɛlilɛ ekpunli ngakyile zo na bɛkpɔla mediema mɔɔ wɔ ekpunli ne mɔ anu la. Saa ɔhyia kɛ sonvolɛ yɛ gyima ɛhye a, bɛbavɛlɛ ye “ekpunli zo sonvolɛ.”
7. Duzu a yɛ nye la kɛ yɛbanyia wɔ yɛ asafo dapɛne debiezukoalɛ ne anu a?
7 Kɛmɔ bɛhile la, yɛbanyia adenle yɛadie ngilehilelɛ mɔɔ bamaa yɛanyia sunsum nu aleɛ dɔɔnwo yɛali la. Ɛhye bamaa yɛayɛ nolobɔlɛma nee kilehilevolɛma mɔɔ bɔ mɔdenle mɔɔ bɛtete yɛ bɛmaa ɛzonlenlɛ gyima mɔɔ so ma dɔɔnwo la.—Ɛfɛ. 4:13, 14; 2 Tem. 3:17.
8. Saa yɛ nuhua ko biala siezie ɔ nwo a, kɛzi ɔbaboa yɛ nee awie mɔ ɛ?
8 Saa yɛdumua yɛsukoa na yɛahɔ debiezukoalɛ ɛhye mɔ a, ɔbamaa yɛava yɛ adwenle yɛazie edwɛkɛtitile mɔɔ bɛbazi zolɛ wɔ debiezukoalɛ biala anu la azo. Yɛ muala yɛbanyia adenle yɛamaa mualɛ mɔɔ bamaa yɛamaa yɛ nwo anwosesebɛ la. (Wulo. 1:11, 12; Hib. 10:24) Ɔwɔ kɛ yɛfa yɛsie yɛ nye zo kɛ yɛmaa ‘yɛ anyuhɔlɛ ne ala ali,’ ɔlua kɛzi ‘yɛkilehile Nyamenle edwɛkɛ ne kpalɛ la’ azo.—1 Tem. 4:15; 2 Tem. 2:15.
9. Kpɔkɛ boni a yɛbɔ a, na duzu ati ɔ?
9 Yɛ nye die nzenzaleɛ kpole ɛhye mɔɔ bɛyɛ wɔ asafo dapɛne debiezukoalɛ ngyehyɛleɛ ne anu la anwo. Ɔrɛla ye kɛ yɛ muala yɛbahɔ zo yɛava adehilelɛ ɛhye mɔɔ ‘akɛlɛ nɔhavo nee nrɛlɛbɛvolɛ ne’ ɛva ɛmaa yɛ la yɛali gyima na yɛabikye yɛ Mboaneneavolɛ Kpole ne mekɛ mɔɔ ɔlɛsiezie yɛ yɛamaa “amaneɛnwunlɛ kpole” ne mɔɔ akee ɛbikye la.—Mat. 24:21, 45; Hib. 13:20, 21; Yek. 7:14.