Ɛvolɛ 2009 Gyihova Alasevolɛ Maangyeba Nyianu
1. (a) Saa yɛkɔ nyianu kenle nsa ne amuala a, nyilalɛ boni a yɛbanyia a? (b) Ngyehyɛleɛ boni a ɔwɔ kɛ yɛyɛ ye kɛkala a?
1 Yɛ kɔsɔɔti yɛ nye la ɛvolɛ 2009 maangyeba nyianu ne nee adenle fofolɛ mɔɔ yɛbanyia yɛ nee yɛ gɔnwo mɔ mɔɔ ye Gyihova ayɛlɛ, na ‘bɛze bɛ sunsum nu ɛhyialɛdeɛ’ ayia nu la ade. (Mat. 5:3) Mekɛ mɔɔ Gyihova kenle ne ɛlɛbikye ndɛndɛ la, yɛsi bɛ nuhua ko biala ahonle kɛ ɔhɔ kenle nsa ne amuala bie amaa bɛanyia Keleseɛnema agɔnwolɛvalɛ nee sunsum nu anwosesebɛmanlɛ kɛnlɛma mɔɔ bamaa yɛagyinla kpundii wɔ diedi ne anu la anu nvasoɛ kpalɛ. (Zɛf. 1:14) Maa kilehilevolɛma nee gyimamenle ne mɔ ɛnwu ye kɛ nyianu ne le wɔ ɛzonlenlɛ ne foa mɔɔ anwo hyia a. Fa akɛnrazilɛ yɛ wɔ ngyehyɛleɛ ndɛndɛ na sɛlɛ Gyihova ɛkɛ ne nyilalɛ; na ɔbaboa wɔ.—Aye. 50:10.
2. Maanle maanle avinli nyianu ne anu debie boni a yɛ nye bahola ala ye ade wɔ ɛvolɛ ɛhye nyianu ne bie mɔ abo a?
2 Maanle Maanle Avinli Nyianu: Kɛmɔ bɛze la, bɛbayɛ maanle maanle avinli nyianu wɔ Accra na menli vi Abolokyi, Afeleka Avinli nee Adɔleɛ bara bie. Kɛmɔ Accra ala a bɛbayɛ maanle maanle avinli nyianu ne wɔ ɛkɛ la ati, asafo mɔɔ bɛhile kɛ bɛbahɔ bie la angomekye a bahola ahɔ ɛkɛ a. Saa yɛdi adehilelɛ ɛhye azo a ɔnrɛmaa menli ne ɛnrɛhyele zo. (1 Kɔl. 14:40; Hib. 13:17) Noko akee, bɛbade maanle maanle avinli ɛdeɛ ne nganeɛ wɔ ɛleka ngakyile. Kumasi nee Takoradi nyianu ne bade mɔɔ bɛlɛyɛ ye wɔ Accra la. Bɛbaha gyima mɔɔ edwɛkpatɛlɛvolɛma ɛlɛyɛ la anwo edwɛkɛ na yɛbanyia adenle yɛadie anwubielɛ yɛavi maanle ngakyile nu. Duzu a ɔwɔ kɛ yɛyɛ na yɛanyia ɛvolɛ ɛhye nyianu ne anwo ngyehyɛleɛ mɔɔ bɛlɛyɛ la anu nvasoɛ dɔɔnwo ɛ?
3. Kɛ ɔkɛyɛ na yɛala Keleseɛnema ɛlɔlɛ ali yɛahile asafo ne anu amra bie mɔ ɛ?
3 Boa Awie Mɔ Maa Bɛhɔ Bie: Menli mɔɔ wɔ bɛ asafo ne anu la bie mɔ hyia moalɛ na bɛahɔ nyianu ne bie ɔ? Saa ɛboa awie mɔ ɛmaa bɛkɔ bie a, ɔkile kɛ ‘ɛndwenle ɛ ngomekye wɔ boɛyɛlɛ nwo, na ɛdwenle ɛ gɔnwo mɔ noko ɛdeɛ nwo.’— Fel. 2:4.
4. Duzu ati a ɔnle kɛ ɔyɛ se ɔmaa yɛ kɛ yɛkɛzɛlɛ adenle kɛ yɛkɔ nyianu ɛhye mɔɔ hyia la ɛ?
4 Ɔdwu mekɛ ne bie a mediema twenlehwenle bɛ bo aze kɛ bɛ nee bɛ gyimamenle kɛdendɛ, na bɛdwenle kɛ bɛ gyimamenle ɛnrɛmaa bɛ adenle kɛ bɛhɔ nyianu ne bie. Noko, saa ɔba ye kɛ bɛkɔ ɛzɛne anzɛɛ atɔfolɛlielɛ bie a, ɔnyɛ bɛ se kɛ bɛkɛha bɛkɛhile bɛ gyimamenle ne. Ɔwɔ kɛ yɛbiza yɛ nwo kɛ: Saa bɛlɛgya yɛ gɔnwo mɔɔ yɛkulo ye edwɛkɛ la wɔ ɛleka bie a, yɛnrɛzɛlɛ adenle yɛnrɛvi yɛ gyimamenle ɛkɛ ne kɛ yɛkɔ ye atɔfolɛlielɛ ne bie ɔ? Na saa yɛnwu kɛ ɔ nye ɛnlie nwolɛ a, yɛnrɛvi ɛbulɛ nu yɛnrɛmaa ɔnrɛnwu kɛzi ɔhyia kɛ yɛkɔ la ɔ? Nɔhalɛ nu, ɔhyia kpalɛ kɛ Gyihova kɛhilehile yɛ wɔ nyianu ne abo tɛla kɛ yɛkɛhɔ anyelielɛ debie bie abo la! Saa yɛdie yɛdi bɔkɔɔ kɛ yɛkɔ nyianu ne a ɔbaboa yeamaa yɛanyi wɔ sunsum nu a, ɔnrɛyɛ se kɛ yɛkɛzɛlɛ gyimamenle adenle kɛ ɔmaa yɛnyia mekɛ yɛva yɛhɔ nyianu ne. (Gye. 1:7, 8) Maa bɛnwu ye kɛ nyianu ne boka wɔ ɛzonlenlɛ ne anwo dahuu. Ɛbahola wɔalie wɔali kɛ Gyihova bayila mɔdenle mɔɔ ɛlɛbɔ kɛ ɛfa Belemgbunlililɛ ne wɔalumua la azo. —Mat. 6: 33.
5. Duzu ati a bɛmaa yɛ anwosesebɛ kɛ yɛhɔ yɛ nyianu ɛdeɛ ne bie ɛ?
5 Nyianu Fofolɛ Ɛhɔlɛ: Amaa bɛanwu kɛ mediema banyia ɛleka adɛnla, anyia mbuluku, dabelɛ nee mɔɔ bokɛboka nwo la, bɛlɛmaa wɔ anwosesebɛ kɛ ɛhɔ nyianu mɔɔ bɛhile kɛ wɔ asafo ne ɛhɔ la bie. Saa gyinlabelɛ bie ati, ɔwɔ kɛ ɛkɔ nyianu wɔ ɛleka gyɛne a, nea kɛlata ɛhye mukelɛ 6 na nwu kenle nee ɛleka mɔɔ bɛbayɛ bɛ la.
6. Mekɛ boni a asafo bie bahola ahɔ maangyeba nyianu gyɛne a?
6 Asafo mɔɔ bɛwɔ namule nu la bie mɔ, ninyɛne mɔɔ le kɛ aneɛ, adenle tendenle yɛɛ kale nwo edwɛkɛ maa ɔfɛta kɛ bɛkɔ nyianu wɔ ɛleka gyɛne. Asafo mɔɔ bɛwɔ gyinlabelɛ ɛhye anu la bahola ahɔ maangyeba nyianu gyɛne. Ɔngyia kɛ bɛkɛlɛ bɛbiza adenle bɛfi ɔfese ne ɛkɛ. Noko akee, asafo mɔɔ kɛbɔ kpɔkɛ kɛ ɔkɔ maangyeba nyianu gyɛne la ɔwɔ kɛ bɔ maanzinli zo neavolɛ ne amaneɛ amaa yeanyɛ ngyehyɛleɛ kɛ ɔbarakpɔla bɛ wɔ dapɛne ne mɔɔ bɛnle ɛkɛ ne la anu. Ɔbayɛ kpalɛ noko kɛ bɛkɛlua address ne mɔɔ wɔ mukelɛ 6 la azo bɛkɛbɔ nyianu ne mɔɔ bɛbahɔ la Nyianu Kɔmatii ne amaneɛ.
7. Duzu a ɔwɔ kɛ menli mɔɔ li bɛ nyunlu la nea boɛ wɔ nwolɛ a?
7 Kale: Ɔwɔ kɛ mediema mɔɔ bɛva kale nwo ngyehyɛleɛ bɛwula bɛ sa nu la nea kɛ kale mɔɔ bɛbayɛ nwolɛ ngyehyɛleɛ la le kpalɛ mɔɔ esiane biala ɛnle nwolɛ a. Ɔwɔ kɛ mgbanyima ne mɔ noko nea kɛ kale ne ɛnrɛva menli dɔɔnwo mɔɔ bo zo na bɛnrɛbu bɛ nye bɛnrɛgua Siza mɛla zo.
8, 9. Kɛzi bɛdi Room Request kɛlata nwo gyima na bɛfa bɛnwa ɛ?
8 Dabelɛ: Yɛlɛfa Room Request ngɛlata yɛanwa asafo biala. Saa ɛkulo kɛ menli mɔɔ nea nyianu ne azo la maa wɔ ɛleka maa ɛda a, di Room Request kɛlata ne ko anwo gyima, na fa maa asafo kɛlɛhɛlɛvolɛ ne ɛnleɛnlea nu na ɔva ɔnwa ɛleka mɔɔ ɛbahɔ nyianu ne la. Saa bɛbayɛ nyianu dɔɔnwo wɔ sua ne azo a, kile nyianu ne mɔɔ ɛbahɔ la kenle ne. ƆNLE kɛ bɛfa Room Request ngɛlata nee nyianu gyɛne anwo edwɛkɛ bɛnwa ɔfese ne mɔɔ wɔ Accra la.
9 Saa nolobɔlɛnli mɔɔ lɛ ngyianlɛ titile la fa Room Request kɛlata ba a, ɔwɔ kɛ Asafo Ɛzonlenlɛ Kɔmatii ne fa adehilelɛ mɔɔ wɔ kɛlata ne azo la suzu ye gyinlabelɛ ne anwo. Bɛyɛ ngyehyɛleɛ ɛhye bɛmaa nolobɔlɛma mɔɔ anwo ɛnlɛ edwɛkɛ nee bɛ mra mɔɔ bɛ subane le kpalɛ la angomekye.
10. Saa bɛsokoɛ yɛ wɔ awie sua nu a, kɛzi yɛkola yɛda ye ali kɛ yɛle nyɛvolɛ kpalɛ mɔɔ anye sɔ debie a?
10 Dabelɛ ne bie mɔ wɔ awie mɔ sua nu. Ɔbahola yeayɛ yɛ mediema anzɛɛ awie mɔ gyɛne sua nu. Bɛva sua ɛhye mɔ bɛmaa wɔ nyianu mekɛ ne anu ALA. Menli mɔɔ bahɔ sua ɛhye mɔ anu la ɔwɔ kɛ nea kɛ bɛ nee bɛ mra ne mɔ bavi ɛbulɛ nu bɛ nee suamenle ne adɛnla, na bɛnrɛneɛnlea suamenle ne ninyɛne nu anzɛɛ bɛnrɛzɛkye ye debie, bɛnrɛvo bɛnrɛgyinla mbia zo anzɛɛ bɛnrɛwolo sua biala mɔɔ bɛanva bɛammaa bɛ la anu. Yɛbahola yɛali yɛ sua ne anu eni na yɛamaa ɛkɛ ne ade alehyenlɛ biala yɛava yɛahile kɛ yɛbu debie. Saa suamenle ne mɔ nwu ngyegyelɛ bie a, ɔwɔ kɛ bɛbɔ adiema ne mɔɔ nea dabelɛ zo wɔ nyianu ne abo la amaneɛ, na ɔ nye balie kɛ ɔkɛboa. Saa yɛle nyɛvolɛ kpalɛ a, yɛnrɛnlea kɛ yɛ suamenle kɛyɛ debie biala kɛmaa yɛ kɛ asɛɛ bɛwɔ ɛkɛ kɛ bɛsonle yɛ.
11. Saa yɛla hotɛle anzɛɛ nyɛvolɛsua nu a, kɛzi yɛkola yɛda Keleseɛnema ɛlɔlɛ ali na yɛbu awie mɔ ɛ?
11 Saa ɛkulo kɛ ɛda hotɛle anzɛɛ nyɛvolɛsua bie anu a, kakye kɛzi ɔhyia kɛ ɛdua wɔ ɛbɛla, ɛdendɛlɛ nee tɛladeɛ zo ɛdi daselɛ kɛnlɛma la. Yɛngulo kɛ yɛda subane bie ali mɔɔ kile kɛ yɛmbu menli mɔɔ bɛye bɛ kɛ bɛmaa yɛ aleɛ anzɛɛ bɛziezie yɛ sua nu la. Ɔwɔ nuhua kɛ yɛtua bɛ kakɛ ɛdeɛ, noko ɔwɔ kɛ yɛbu gyimayɛvoma ɛhye mɔ na yɛdi bɛ eni. Ɛhye maa bɛnwu kɛ saa ɛfa Gyihova menli ɛto bɛdabɛ mɔɔ bɛnde Baebolo ne abo mɔɔ bɛnlɛ ɛlɔlɛ na bɛmbu awie mɔ la anwo a, bɛle ngakyile.
12. (a) Duzu a ɔwɔ kɛ menli mɔɔ bahɔ nyianu ne la fa kɔ kenle nsa ne amuala a, na duzu ati ɔ? (b) Duzu a yɛbahola yɛava ewiazo ɛnwomenlelielɛ mekɛ ne yɛayɛ a, na kɛzi ɛhye baboa yɛ ɛ?
12 Ewiazo Ɛnwomenlelielɛ: Kɛyɛ ɛvolɛ dɔɔnwo anu, akɛlɛ nɔhavo ne ɛmaa yɛ anwosesebɛ kɛ yɛde aleɛ mɔɔ yɛdi wɔ nyianu bo la azo. Ɛhye bamaa yɛahwe yɛ adwenle yɛazie ninyɛne mɔɔ hyia kpalɛ, mɔɔ le yɛ abusua ne mɔɔ yɛboa yɛamaa bɛadwu ɛkɛ ne ndɛ alehyenlɛ biala na yɛadie edwɛkɛ ne boɛ la azo. Ɛhye ati a bɛlɛka bɛahile menli mɔɔ bahɔ nyianu ne la kɔsɔɔti kɛ bɛva aleɛ mɔɔ anu ɛnyɛ ɛlomboɛ la bɛvi sua nu bɛhɔ na bɛli bɛnlo wɔ ewiazo ɛnwomenlelielɛ mekɛ ne anu la. Ɛhye bamaa yɛanyia mekɛ yɛadɛnla nyianu ne abo wɔ ewiazo ɛnwomenlelielɛ mekɛ ne anu, na yɛ nee menli mɔɔ wɔ ɛkɛ la ava agɔnwolɛ. Saa yɛfa yɛ adwenle yɛsie debie ekyi bie azo na yɛanli aleɛ dɔɔnwo a ɔbamaa yɛ nye ala ɛkɛ wɔ ewiazo. Kɛmɔ menli dɔɔnwo ɛnrɛla ekyi na bɛabɔ ewiazo gyimalilɛ ne abo la ati, bɛmaa yɛnlea aleɛ dodo mɔɔ yɛbali wɔ ɛnwomenlelielɛ mekɛ ne anu la boɛ. Kɛmɔ yɛkɔ debiezukoalɛ wɔ Belemgbunlililɛ Asalo a yɛyɛ la, yɛnli aleɛ wɔ mekɛ mɔɔ nyianu ne ɛlɛkɔ zo la. Saa yɛmaa ewiazo aleɛ ne yɛ ekyi a, ɔmaa yɛnyia anyezɔlɛ yɛmaa sunsum nu ninyɛne mɔɔ hyia la na yɛkile ɛbulɛ yɛmaa ɛzonlenlɛ nwo ngyehyɛleɛ nee sunsum nu aleɛ mɔɔ bɛlɛfa bɛamaa la.—Kenga Luku 10:42.
13. (a) Ɛleka boni mɔ a bɛbahyia menli mɔɔ kɛdu bɛ nwo kɛmaa la ɛ? (b) Ndenle boni azo a wɔyɛ kɛ ɛbaboa wɔamaa nyianu ne ali munli a?
13 Fi Ɛhulolɛ Nu Tu Ɛ Nwo Maa: Bɛlɛyɛ nyianu ne a, mediema dɔɔnwo tu bɛ nwo maa na bɛboa bɛmaa gyimalilɛ ɛleka ne mɔ gyima kɔ zo pɛpɛɛpɛ. Menli mɔɔ die nyɛvolɛ mɔɔ wɔ kpɔda ne abo nee ɛleka mɔɔ bɛfa kale bɛsie la maa yɛ ɛleka yɛtɛnla na bɛsinza yɛ ahale ne mɔ wɔ alehyenlɛ ne anu. Gyimalilɛ Ɛleka mɔɔ nea maa bɛsiezie ɛkɛ ne bɔkɔbɔkɔ maa ɔ nee duma mɔɔ yɛlie kɛ yɛyɛ yɛ ninyɛne bɔkɔbɔkɔ yɛ ko la nea kɛ ɛleka ne kɛyɛ kɛnlɛma kɛdɛla kɛmɔ ɛnee ɔde la. Yɛbahola yɛaboa gyimalilɛ ɛleka ɛhye anzɛɛ ɛleka gyɛne ɔ? Asoo ɛbadu ɛ nwo wɔamaa na ɛ nee ɛ mediema ‘abɔ nu azonle’? (Zɛf. 3:9) Saa Tunwomaa Gyimalilɛ ɛleka ne ɛtɛyele yɛ bɔbɔ a, yɛ muala yɛbahola yɛanyia tunwomaa sunsum na yɛamaa yɛ nye ala ɛkɛ ne kɛ yɛbasesa ewula na yɛanlea kɛ alehyenlɛ biala ɛleka mɔɔ yɛde la bayɛ bɔkɔbɔkɔ.
14. Duzu a ɔwɔ kɛ yɛmaa nwolɛ kyia yɛ wɔ mekɛ mɔɔ yɛlɛsiezie yɛ nwo yɛahɔ ɛvolɛ 2009 maangyeba nyianu ne la ɛ?
14 Gyima Mɔɔ Wula Nyamenle Anyunlunyia: Saa yɛda sunsum nu ma ne ali wɔ yɛ debie biala anu, na yɛnea kɛzi yɛ nee menli mɔɔ yɛ gyima wɔ hotɛle nee menli gyɛne mɔɔ wɔ nyianu sua ne azo tendɛ la boɛ a, yɛboa yɛmaa Gyihova menli duma kpalɛ mɔɔ bɛlie la tɛnla ɛkɛ na yɛkoati kɛ yɛkɛdenda awie mɔ agyakɛ anu. (1 Kɔl. 10:31; 2 Kɔl. 6:3, 4) Ɔrɛla ye kɛ wɔ nyianu ne ɛhɔlɛ nee wɔ nyɛleɛ bawula Nyamenle anyunlunyia wɔ ndenle ɛhye mɔ azo wɔ ɛvolɛ 2009 maangyeba anzɛɛ maanle maanle avinli nyianu ne abo!—1 Pita 2:12.
[Ɛlɛka wɔ mukelɛ 3]
Gyimalilɛ Mekɛ:
Kule (Maanle Maanle Avinli Nyianu Ala)
Ewia zo 1:20 kɔdwu nɔsolɛ 4:55
Yalɛ nee Folɛ
Nwonlomɔ 9:20 kɔdwu nɔsolɛ 4:55
Molɛ
Nwonlomɔ 9:20 kɔdwu nɔsolɛ 4:00
[Ɛlɛka wɔ mukelɛ 5]
Bɔ Ɔ Bo Yɛ Nyianu Ne Anwo Ngyehyɛleɛ Ɛnɛ
• Yɛ ngyehyɛleɛ kpalɛ amaa wɔahola wɔahɔ kenle ne amuala.
• Sɛlɛ adenle fi wɔ gyimamenle ɛkɛ kɛkala.
• Bɔ ɔ bo siezie nyianu ne anwo ezukoa mɔɔ hyia la.
• Kenle ko biala fa ewiazo aleɛ mɔɔ nuhua ɛnyɛ ɛlomboɛ nee nzule mɔɔ ɛbanlo la amaa wɔanvi nyianu ne abo kɛ ɛkadɔ aleɛ nee nzule.
• Yɛ ngyehyɛleɛ amaa wɔ abusua ne KƆSƆƆTI ahɔ nyianu ne amuala.