Ɛvolɛ 2008 Gyihova Alasevolɛ Maangyeba Nyianu
1. (a) Duzu ati a folɛ mɔɔ Pɔɔlo dule Hibulu Keleseɛnema la anwo hyia kpalɛ ɛnɛ ɛ? (Kenga Hibuluma 10: 24, 25.) (b) Adenle boni a ɛlɛba mɔɔ yɛbalua zo yɛava Pɔɔlo folɛdulɛ ne yɛali gyima a?
1 Ɛzoanvolɛ Pɔɔlo dule Hibulu Keleseɛnema folɛ kɛ bɛyia nu na bɛmaa bɛ nwo ngoko anwosesebɛ “titile” mekɛ mɔɔ bɛkola bɛnwu kɛ kenle ne ɛbikye la. (Hib. 10:24, 25, NW) Daselɛ dɔɔnwo kile kɛ “kenle ne” mɔɔ Pɔɔlo hanle nwolɛ edwɛkɛ la ɛbikye! Yemɔti yɛkpondɛ ndenle yɛalua zo yɛ nee yɛ mediema mrenya nee mraalɛ ayia nu yɛadie sunsum nu ngilehilelɛ mɔɔ bahile yɛ adenle wɔ “awieleɛ mekɛ” ɛhye mɔɔ ɛzulolɛ dɔɔnwo wɔ nu la anu. (2 Tem. 3:1) Yɛbanyia zɛhae adenle ne wɔ 2008 maangyeba nyianu ne mɔɔ ɛlɛba la anu.
2. (a) Duzu ati a ɔhyia kɛ ɛkɔ nyianu kenle nsa ne amuala la ɛ? (b) Kɛzi ɔwɔ kɛ yɛbɔ ɔ bo yɛboɔboa yɛ nwo wɔ nyianu ne anwo ɛ?
2 Kɔ Kenle Nsa ne Amuala: Yɛmaa wɔ anwosesebɛ kɛ kɔ kenle nsa ne amuala. Saa yɛangyakyi “kɛ yɛkɛhɔ yɛ nyianu ne” a, sunsum nu aleɛ kpalɛ mɔɔ hyia la ɛnrɛkpa yɛ ti. (Hib. 10:25) Bɔ ɔ bo boɔboa ɛ nwo ndɛndɛ. Saa nyianu ne kadwu zo la ɛ mra ne mɔ kɔ sukulu a, ka wɔ ngyehyɛleɛ ne anwo edwɛkɛ kile bɛ kilehilevolɛma ne. Bɔ wɔ gyimamenle amaneɛ ndɛndɛ amaa yeayɛ ngyehyɛleɛ biala mɔɔ hyia la.
3. Duzu ati a ɔnle kɛ ɔyɛ se ɔmaa yɛ kɛ yɛkɛzɛlɛ adenle kɛ yɛkɔ nyianu mɔɔ hyia la ɛ?
3 Ɔdwu mekɛ ne bie a mediema twenlehwenle bɛ bo aze kɛ bɛ nee bɛ gyimamenle kɛdendɛ, na bɛdwenle kɛ bɛ gyimamenle ɛnrɛmaa bɛ adenle kɛ bɛhɔ nyianu ne bie. Noko, saa ɔba ye kɛ bɛkɔ ɛzɛne anzɛɛ atɔfolɛlielɛ bie a, ɔnyɛ bɛ se kɛ bɛkɛha bɛkɛhile bɛ gyimamenle ne. Ɔwɔ kɛ yɛbiza yɛ nwo kɛ: Saa bɛlɛgya yɛ gɔnwo mɔɔ yɛkulo ye edwɛkɛ la wɔ ɛleka bie a, yɛnrɛzɛlɛ adenle yɛnrɛvi yɛ gyimamenle ɛkɛ ne kɛ yɛkɔ ye atɔfolɛlielɛ ne bie ɔ? Na saa yɛnwu kɛ ɔ nye ɛnlie nwolɛ a, yɛnrɛvi ɛbulɛ nu yɛnrɛmaa ɔnrɛnwu kɛzi ɔhyia kɛ yɛkɔ la ɔ? Nɔhalɛ nu, ɔhyia kpalɛ kɛ Gyihova kɛhilehile yɛ wɔ nyianu ne abo tɛla kɛ yɛkɛhɔ anyelielɛ debie bie abo la! Saa yɛdie yɛdi bɔkɔɔ kɛ yɛkɔ nyianu ne a ɔbaboa yeamaa yɛanyi wɔ sunsum nu a, ɔnrɛyɛ se kɛ yɛkɛzɛlɛ gyimamenle adenle kɛ ɔmaa yɛnyia mekɛ yɛva yɛhɔ nyianu ne. (Gye. 1:7, 8) Maa bɛnwu ye kɛ nyianu ne boka wɔ ɛzonlenlɛ ne anwo dahuu. Ɛbahola wɔalie wɔali kɛ Gyihova bayila mɔdenle mɔɔ ɛlɛbɔ kɛ ɛfa Belemgbunlililɛ ne wɔalumua la azo.—Mat. 6: 33.
4. Adenle boni azo a yɛbahola yɛazuzu awie mɔ anwo a?
4 Boa Awie Mɔ Maa Bɛhɔ Bie: Pɔɔlo eza bodole ɔ mediema ne mɔ kɛ ‘bɛdwenle bɛ nwo ngoko.’ (Hib. 10:24) Mediema mrenya nee mraalɛ mɔɔ ɛ nee bɛ wɔ Asafo Buluku Ɛzukoalɛ ko anu la hyia moalɛ na bɛahola bɛahɔ nyianu ne bie ɔ? Ɛbahola wɔaboa wɔ Baebolo sukoavoma wɔamaa bɛ nee wɔ ahɔ nyianu ne, saa bɔbɔ kenle ko ala a bɛbahola kɔ a? Saa ɛka nyianu ne anwo edwɛkɛ ɛkile ɛ nwo amra mɔɔ bɛnle diedima la a, to ɛsalɛ fɛlɛ bɛ kɛ bɛrɛla na ɛ nee bɛ ɛhɔ. Nyilalɛ dɔɔnwo bahola ara mɔdenle mɔɔ ɛbavi ɛlɔlɛ nu wɔabɔ la azo.
5. Duzu ati a bɛmaa yɛ anwosesebɛ kɛ yɛhɔ yɛ nyianu ɛdeɛ ne bie ɛ?
5 Nyianu Fofolɛ Ɛhɔlɛ: Amaa bɛanwu kɛ mediema banyia ɛleka adɛnla, anyia mbuluku, dabelɛ nee mɔɔ bokɛboka nwo la, bɛlɛmaa wɔ anwosesebɛ kɛ ɛhɔ nyianu mɔɔ bɛhile kɛ wɔ asafo ne ɛhɔ la bie. Saa gyinlabelɛ bie ati ɔwɔ kɛ ɛkɔ nyianu wɔ ɛleka gyɛne a, nea kɛlata ɛhye mukelɛ 6 na nwu kenle nee ɛleka mɔɔ bɛbayɛ bɛ la.
6. Mekɛ boni a asafo bie bahola ahɔ maangyeba nyianu gyɛne a?
6 Asafo mɔɔ wɔ namule nu la, ninyɛne mɔɔ le kɛ aneɛ, adenle tendenle yɛɛ kale nwo edwɛkɛ maa ɔfɛta kɛ bɛkɔ nyianu wɔ ɛleka gyɛne. Asafo mɔɔ wɔ gyinlabelɛ ɛhye anu la bahola ahɔ maangyeba nyianu gyɛne. Ɔngyia kɛ bɛkɛlɛ bɛbiza adenle bɛfi ɔfese ne ɛkɛ. Noko akee, asafo mɔɔ kɛbɔ kpɔkɛ kɛ ɔkɔ maangyeba nyianu gyɛne la ɔwɔ kɛ bɔ maanzinli zo neavolɛ ne amaneɛ amaa yeanyɛ ngyehyɛleɛ kɛ ɔbarakpɔla bɛ wɔ dapɛne ne mɔɔ bɛnle ɛkɛ ne la anu.
7. Duzu a ɔwɔ kɛ menli mɔɔ li bɛ nyunlu la nea boɛ wɔ nwolɛ a?
7 Kale: Ɔwɔ kɛ mediema mɔɔ bɛva kale nwo ngyehyɛleɛ bɛwula bɛ sa nu la nea kɛ kale mɔɔ bɛbayɛ nwolɛ ngyehyɛleɛ la le kpalɛ mɔɔ esiane biala ɛnle nwolɛ a. Ɔwɔ kɛ mgbanyima ne mɔ noko nea kɛ kale ne ɛnrɛva menli dɔɔnwo mɔɔ bo zo na bɛnrɛbu bɛ nye bɛnrɛgua Siza mɛla zo.
8. Kɛzi bɛdi Room Request kɛlata nwo gyima na bɛfa bɛnwa ɛ?
8 Dabelɛ: Yɛlɛfa Room Request ngɛlata yɛanwa asafo biala. Saa ɛkulo kɛ menli mɔɔ nea nyianu ne azo la maa wɔ ɛleka maa ɛda a, di Room Request kɛlata ne ko anwo gyima, na fa maa asafo kɛlɛhɛlɛvolɛ ne ɛnleɛnlea nu na ɔva ɔnwa ɛleka mɔɔ ɛbahɔ nyianu ne la. Saa bɛbayɛ nyianu dɔɔnwo wɔ sua ne azo a, kile nyianu ne mɔɔ ɛbahɔ la kenle ne. ƆNLE kɛ bɛfa Room Request ngɛlata nee nyianu gyɛne anwo edwɛkɛ bɛnwa ɔfese ne mɔɔ wɔ Accra la.
9. Ngyehyɛleɛ boni a bɛyɛ bɛmaa menli bie mɔ mɔɔ hyia moalɛ na bɛanyia dabelɛ la ɛ?
9 Saa nolobɔlɛnli mɔɔ lɛ ngyianlɛ titile la fa Room Request ba a, ɔwɔ kɛ Asafo Ɛzonlenlɛ Kɔmatii ne fa adehilelɛ mɔɔ wɔ kɛlata ne azo la suzu ye gyinlabelɛ ne anwo. Bɛyɛ ngyehyɛleɛ ɛhye bɛmaa nolobɔlɛma mɔɔ anwo ɛnlɛ edwɛkɛ nee bɛ mra mɔɔ bɛ subane le kpalɛ la.
10. Saa bɛsokoɛ yɛ wɔ awie sua nu a, kɛzi yɛkola yɛda ye ali kɛ yɛle nyɛvolɛ kpalɛ mɔɔ anye sɔ debie a?
10 Dabelɛ ne bie mɔ wɔ awie mɔ sua nu. Ɔbahola yeayɛ yɛ mediema anzɛɛ awie mɔ gyɛne sua nu. Bɛva sua ɛhye mɔ bɛmaa wɔ nyianu mekɛ ne anu ALA. Menli mɔɔ bahɔ sua ɛhye mɔ anu la ɔwɔ kɛ nea kɛ bɛ nee bɛ mra ne mɔ bavi ɛbulɛ nu bɛ nee suamenle ne adɛnla, na bɛnrɛluolua sua ne anu anzɛɛ bɛnrɛzɛkye suamenle ne debie, bɛnrɛvo bɛnrɛgyinla mbia zo anzɛɛ bɛnrɛwolo sua biala mɔɔ bɛanva bɛamba bɛ la anu. Yɛbahola yɛali yɛ sua ne anu eni na yɛamaa ɛkɛ ne ade alehyenlɛ biala yɛava yɛahile kɛ yɛbu debie. Saa suamenle ne mɔ nwu ngyegyelɛ bie a, ɔwɔ kɛ bɛbɔ adiema ne mɔɔ nea dabelɛ zo wɔ nyianu ne abo la amaneɛ na ɔkɛhulo kɛ ɔkɛboa. Saa yɛle nyɛvolɛ kpalɛ a yɛnrɛmaa yɛ suamenle ɛnrɛyɛ debie biala ɛnrɛmaa yɛ.
11. Saa yɛla hotɛle anzɛɛ nyɛvolɛsua nu a, kɛzi yɛkola yɛda Keleseɛne ɛlɔlɛ ali na yɛbu awie mɔ ɛ?
11 Saa ɛkulo kɛ ɛda Hotɛle anzɛɛ nyɛvolɛsua bie anu a, kakye kɛzi ɔhyia kɛ ɛdua wɔ ɛbɛla, ɛdendɛlɛ nee tɛladeɛ zo ɛdi daselɛ kɛnlɛma la. Yɛngulo kɛ yɛda subane bie ali mɔɔ kile kɛ yɛmbu menli mɔɔ bɛye bɛ kɛ bɛmaa yɛ aleɛ anzɛɛ bɛziezie yɛ sua nu la. Ɔwɔ nuhua kɛ yɛtua bɛ kakɛ ɛdeɛ, noko ɔwɔ kɛ yɛbu gyimayɛvoma ɛhye mɔ na yɛdi bɛ eni. Ɛhye maa bɛnwu kɛ saa ɛfa Gyihova menli ɛto bɛdabɛ mɔɔ bɛnde Baebolo ne abo mɔɔ bɛnlɛ ɛlɔlɛ na bɛmbu awie mɔ la anwo a bɛle ngakyile.
12. (a) Duzu a ɔwɔ kɛ menli mɔɔ bahɔ nyianu ne la fa kɔ kenle nsa ne amuala a, na duzu ati ɔ? (b) Duzu a yɛbahola yɛava ewiazo ɛnwomenlelielɛ mekɛ ne yɛayɛ a, na kɛzi ɛhye baboa yɛ ɛ?
12 Ewiazo Ɛnwomenlelielɛ: Ɔwɔ kɛ menli mɔɔ bahɔ nyianu ne la kɔsɔɔti fa aleɛ mɔɔ anu ɛnyɛ ɛlomboɛ la fi sua nu kɔ na bɛdi bɛno wɔ ewiazo ɛnwomenlelielɛ mekɛ ne anu. Ɛhye maa yɛnyia mekɛ yɛtɛnla nyianu ne abo na yɛfa yɛ nwo agɔnwolɛ na eza yɛmaa yɛ nwo anwosesebɛ tɛla kɛ yɛkɛvinde kɛ yɛkɔ yɛahɔkpondɛ aleɛ yɛadɔ ɔluakɛ yɛava debie yɛamba la ati. Saa yɛdu adenle yɛhɔ nyianu bɔbɔ a, ɔwɔ kɛ alehyenlɛ biala yɛyɛ ngyehyɛleɛ mɔɔ bamaa yɛanyia debie mɔɔ anu ɛnyɛ ɛlomboɛ la yɛali na yɛava bie yɛamaa anyelielɛma mɔɔ boka yɛ nwo la wɔ ewiazo ɛnwomenlelielɛ mekɛ ne anu. Ɛhye bamaa yɛaha nyianu ne abo na yɛ nee yɛ mediema ava agɔnwolɛ. Saa yɛyɛ ɛhye a, ɔmaa yɛnyia anyezɔlɛ yɛmaa sunsum nu ninyɛne.
13. (a) Ndenle boni azo a yɛkola yɛwula Gyihova anyunlunyia wɔ mekɛ mɔɔ yɛlɛkɔ yɛ nyianu ne la ɛ? (b) Kɛmɔ yɛ mediema ne mɔ da subane kpalɛ ali la ati, edwɛkɛ boni a menli mɔɔ nea hotɛle zo la ɛha a?
13 Gyima Kpalɛ: Gyihova mɛla mɔɔ se yɛyia nu yɛzonle mɔɔ yɛtie la ‘maa yɛyɛ kpalɛ.’ Mɔɔ hyia la, ɔmaa yɛnyia adenle yɛwula Gyihova duma ne anyunlunyia. (Aye. 48:17) Menli dɔɔnwo nwu yɛ ‘nyɛleɛ kpalɛ biala wienyi’ wɔ maangyeba nyianu ne mɔ abo na ɛhye ɛha menli dɔɔnwo ɛmaa bɛha nwolɛ edwɛkɛ. (1 Tem. 5:25) Wɔ sua ko mɔɔ bɛyɛ nyianu wɔ ɛkɛ ɛvolɛ dɔɔnwo la azo, hotɛle zo neavolɛ bie hanle kɛ: “Menli dɔɔnwo ka Gyihova Alasevolɛ nee mɔɔ bɛ nyianu ne kile maa yɛ la anwo edwɛkɛ wɔ sua ye azo. Yɛnwu kɛzi bɛ menli ne siezie ɛleka mɔɔ bɛyia la, na yɛnwu kɛ bɛlɛsiezie ɛleka mɔɔ bɛfa kale bɛsia la. Yɛ nye die kɛ ɔdwu mekɛ ɛhye anu a bɛ menli ne ba ɛke a. Yɛ nye la kɛ yɛ nee bɛ agɔnwolɛvalɛ ne bahɔ zo wɔ mekɛ mɔɔ ɛlɛba la anu.” Mekɛ mɔɔ nrenya bie mɔɔ nea hotɛle zo hanle ngyegyelɛ mɔɔ bɛfa ɛkɛ bɛmaa menli gyɛne a ɔba la anwo edwɛkɛ ɔwiele la, ɔhanle kɛzi mediema da hotɛle ɛkɛ a bɛ nee bɛ yɛ ko na bɛsi abotane la anwo edwɛkɛ. Ɔhanle kɛ, “Yɛ kunlu a, anrɛɛ yɛ nyɛvolɛ ne mɔ kɔsɔɔti le kɛ Gyihova Alasevolɛ!” Nea kɛzi yɛ mediema ne mɔ subane mɔɔ manle bɛhanle edwɛkɛ ɛhye mɔ la bamaa Gyihova Nyamenle anye alie a!
14. Kɛzi Mateyu 4:4 si nvasoɛ mɔɔ wɔ zo kɛ yɛtie nyianu ne foa biala kpalɛ la azo ɛ?
14 Gyisɛse hanle kɛ yɛ ngoane gyi “Nyamenle anloa edwɛkɛ biala” mɔɔ yɛbadie la azo. (Mat. 4:4) Ɛvolɛ biala yɛkɔ nyianu a, Gyihova maa yɛ “aleɛ wɔ mekɛ ne anloa” mɔɔ ‘sonvolɛ nɔhavo mɔɔ ze nrɛlɛbɛ eku ne’ ɛziezie la. (Mat. 24:45) Bɛyɛ gyima dɔɔnwo a bɛziezie sunsum nu aleɛ ɛhye a. Ɔrɛla ye kɛ yɛkɛhile anyezɔlɛ yɛkɛmaa ɛlɔlɛ nu mɔɔ Gyihova fi dwenle yɛ nwo la ɔlua kenle nsa ne amuala mɔɔ yɛkɛhɔ na yɛkɛdie nyianu ne foa biala kpalɛ la azo.
[Ɛlɛka wɔ mukelɛ 3]
Gyimalilɛ Mekɛ:
Yalɛ nee Folɛ
Nwonlomɔ 9:20 kɔdwu nɔsolɛ 4:55
Molɛ
Nwonlomɔ 9:20 kɔdwu nɔsolɛ 4:00
[Ɛlɛka wɔ mukelɛ 5]
Bɔ Ɔ Bo Yɛ Nyianu ne Anwo Ngyehyɛleɛ Ɛnɛ
• Yɛ ngyehyɛleɛ kpalɛ amaa wɔahola wɔahɔ kenle nsa ne amuala.
• Sɛlɛ adenle fi wɔ gyimamenle ɛkɛ kɛkala.
• Bɔ ɔ bo siezie nyianu ne anwo ezukoa mɔɔ hyia la.
• Kenle ko biala fa ewiazo aleɛ mɔɔ nuhua ɛnyɛ ɛlomboɛ nee nzule mɔɔ ɛbanlo la amaa wɔanvi nyianu ne abo kɛ ɛkadɔ aleɛ nee nzule.
• Yɛ ngyehyɛleɛ amaa wɔ abusua ne KƆSƆƆTI ahɔ nyianu ne amuala.