Kpuyia Ɛleka
◼ Saa menli nwiɔ mɔɔ kulo kɛ gya la kpondɛ kɛ yɛ bɛ atɔfolɛlielɛ ne wɔ Belemgbunlililɛ Asalo ɛkɛ a, duzu edwɛkɛ a ɔwɔ kɛ bɛ nee mgbanyima ne mɔ suzu nwo a?
Agyalɛ ngyehyɛleɛ mɔɔ bɛmaa ɔ nee Baebolo ngyinlazo yɛ ko la wula Gyihova anyunlunyia. Ɛhye le nɔhalɛ titile wɔ atɔfolɛlielɛ mɔɔ bɛyɛ ye wɔ Belemgbunlililɛ Asalo la anwo, ɔluakɛ bɛbu ngyehyɛleɛ biala mɔɔ kɔ zo wɔ ɛkɛ ne la kɛ ɔka yɛ ahyehyɛdeɛ ne. Amaa yɛayɛ “debie biala pɛpɛ” la, ɔle kpalɛ kɛ mgbanyima mɔɔ wɔ ɛkɛ la nee menli mɔɔ kulo kɛ yɛ bɛ atɔfolɛlielɛ wɔ Belemgbunlililɛ Asalo ɛkɛ ne la suzu edwɛkɛ bie mɔ anwo.—1 Kɔl. 14:40.
Ɔwɔ kɛ menli nwiɔ mɔɔ kulo kɛ yɛ bɛ atɔfolɛlielɛ wɔ Belemgbunlililɛ Asalo ɛkɛ ne la kɛlɛ asafo ɛzonlenlɛ kɔmatii ne na bɛsɛlɛ asalo ne. Ɔwɔ kɛ bɛkɛlɛ bɛ kɛlata ne ndɛ na bɛkile mekɛ nee kenle mɔɔ bɛkulo kɛ bɛyɛ ye wɔ ɛkɛ ne la. Ɔwɔ kɛ bɛkakye kɛ mgbanyima ne mɔ ɛnrɛhakyi debiezukoalɛ nwo ngyehyɛleɛ ɔlua bɛ agyalɛ ne ati. Bieko, ɔwɔ kɛ nrenya ne nee raalɛ ne mɔɔ bɛlɛgya bɛ nwo la yɛ mɔɔ edwɛkɛ biala ɛnle bɛ nwo, mɔɔ bɛfa Baebolo ne nee Gyihova tenlene ngyinlazo ne mɔ bɛbɔ bɛ ɛbɛla a.
Amaa bɛanwu ye kɛ atɔfolɛlielɛ ne bali yɛ Nyamenle ne ɛnli la, ɔwɔ kɛ menli nwiɔ ne ka atɔfolɛlielɛ ne anwo ngyehyɛleɛ kile ɛzonlenlɛ kɔmati ne kolaa na bɛayɛ nwolɛ ngyehyɛleɛ ne bɛawie. Mgbanyima ne mɔ ɛnrɛbɔ mɔdenle kɛ bɛkile menli nwiɔ ne mɔɔ ɔwɔ kɛ bɛyɛ la ɛdeɛ, noko saa bɛka edwɛkɛ bie mɔɔ ɔ nee bɛ ɛdeɛ ne ɛnle ko la a, ɔwɔ kɛ bɛtie mgbanyima ne mɔ ɛdeɛ ne. Edwɛne mɔɔ bɛkpa wɔ Kingdom Melodies ne azo anzɛɛ mɔɔ wɔ yɛ edwɛne buluku ne anu la ala a bɛbahola bɛabɔ na bɛado a. Ɔwɔ kɛ mgbanyima ne mɔ die kɛzi bɛbaziezie Belemgbunlililɛ Asalo ɛkɛ ne nee kɛzi bɛbaziezie mbia la to nu. Saa bɛlɛkye nvoninli anzɛɛ bɛlɛye nwolɛ video a, ɔnle kɛ ɛhye twehwe adwenle fi ɛnililɛ mɔɔ wɔ gyimalilɛ ne anu la azo. Mgbanyima ne mɔ bamaa bɛayɛ mɔɔ bahɔ zo la bɛanlea wɔ Belemgbunlililɛ Asalo ɛkɛ ne wɔ mekɛ tendenle ala mɔɔ ɔnrɛgyegye asafo ne ngyehyɛleɛ biala la. Ɔnle kɛ bɛfa nwolɛ ɛsalɛdolɛ kɛlata biala bɛbɔ nolobɔlɛ ɛleka ne. Noko akee, mgbanyima ne mɔ bahola abɔ nwolɛ nolo sikalɛ wɔ Ɛzonlenlɛ Nyianu ne abo bɛamaa asafo ne ade kɛ bɛbalie atɔfolɛ wɔ Belemgbunlililɛ Asalo ɛkɛ.
Ɔwɔ nuhua kɛ bɛngile kɛ ɔwɔ kɛ awie biala mɔɔ boka atɔfolɛlielɛ ne anwo la yɛ mɔɔ bɛzɔne ye la ɛdeɛ, noko ɔnfɛta kɛ bɛmaa menli mɔɔ bɛ ɛbɛlabɔlɛ nee Baebolo ngyinlazo ɛnle ko anzɛɛ bɛ nyɛleɛ bagyegye awie mɔ adwenle la boka nwo. Saa ɔkɛyɛ boɛ a, ɔwɔ kɛ asafo nu kpanyinli a maa ɛdendɛlɛ ne a. Mgbanyima ne mɔ le Nyamenle Edwɛkɛ ne kilehilevolɛma mɔɔ bɔ mɔdenle, yemɔti, bɛmɛ a bɛfɛta kpalɛ kɛ bɛtwe adwenle bɛkɔ Ngɛlɛlera ne anu ngyinlazo mɔɔ fane mekɛ ɛhye mɔɔ hyia la azo a.—1 Tem. 3:2.
Kɛmɔ atɔfolɛlielɛ ne noko bamaa bɛanwu kpanyinli holɛ ko mɔɔ bamaa ɛdendɛlɛ ne la ati, ɔwɔ kɛ bɛmaa ɔdaye noko ɔnwu atɔfolɛlielɛ ne anwo ngyehyɛleɛ. Ɔ nee menli nwiɔ ne bayia na yeabiza bɛ nyɛleɛ mɔɔ bɛvale bɛ nwo bɛwulale nu wɔ mekɛ mɔɔ bɛlua la; ɔwɔ kɛ menli nwiɔ ne ka nɔhalɛ kile ye. Saa nrenya ne anzɛɛ raalɛ ne ɛhɔ agyalɛ ɛlɛ a, ɔwɔ kɛ ɔkile kɛ Ngɛlɛlera ne nee mɛla maa ye adenle kɛ ɔkola ɔgya bieko. (Mat. 19:9) Ɛhye kile kɛ ɔwɔ kɛ ɔfa ewolebɔlɛ nwo kɛlɛta mɔɔ ɔlɛ la ɔkile mgbanyima ne mɔ.
Na saa ɔba ye kɛ bɛyɛ ngyehyɛleɛ kɛ bɛgya wɔ sua nu bɛwie a bɛbadie Baebolo nu ɛdendɛlɛ ɛ? Saa bɛmaa ninyɛne nwiɔ ne bikye nwolɛ kpalɛ, titile kenle ko ne ala a, ɔboa ɔmaa menli nwu Keleseɛnema agyalɛ kɛ ɛnililɛ wɔ nu. Bieko, ɔnle kɛ tɛladeɛ mɔɔ bɛkɛwula nee ɛdendɛlɛ ne anwo ngyehyɛleɛ fofolɛ maa ɔyɛ kɛ bɛlɛyɛ arane nu agyalɛ. Saa amozii, agyalɛma ne si kpɔkɛ kɛ bɛkayɛ arane nu agyalɛ nwo kɛlata ɔlua adwenle bie ati a, ɔnrɛyɛ mekɛ mɔɔ bɛdi aleɛ, bɛmaa Baebolo nu ɛdendɛlɛ anzɛɛ bɛmaa asafo ne boka nwo wɔ adenle bie azo a.—km 4/06 m. 3-5.
Saa menli nwiɔ ne kilehile edwɛkɛ nu wienyi na bɛ nee mgbanyima ne mɔ yɛ ko a, atɔfolɛlielɛ ne bayɛ anyelielɛ mekɛ yeamaa bɛ muala.—Mrɛ. 15:22; Hib. 13:17.