Ɛbahola Wɔayɛ Kilehilevolɛ!
1. Nwolɛ adenle titile boni a Belemgbunlililɛ nolobɔlɛnli biala lɛ a?
1 Debie ko mɔɔ yɛ anyelielɛ kpalɛ wɔ daselɛlilɛ nu la a le kɛ yɛkɛhilehile awie nɔhalɛ ne. Saa yɛnwu kɛ ɔlɛdi Belemgbunlililɛ nrɛlaleɛ ne azo na yɛboa ye yɛmaa ɔbikye aleɛabo Tumivolɛ ne a, ɔle debie mɔɔ yɛ nye die nwo a. (Gye. 4:8) Ɔwɔ kɛ Belemgbunlililɛ nolobɔlɛnli biala fa sie ɔ nye zo kɛ ɔkilehile awie mɔɔ nɔhalɛ ne anwo ɛhɔne ɛlɛku ye la yeamaa yeabɔ ɔ bo yeayɛ nzenzaleɛ mgbole wɔ ye subane, ninyɛne mɔɔ gyi ɔ nye zo nee ye nyɛleɛ nu.—Mat. 28:19, 20.
2. Kɛmɔti a bie mɔ sulo kɛ bɛkɛyɛ Baebolo ɛzukoalɛ a, na duzu a baboa bɛ yeamaa bɛali ngyegyelɛ ɛhye azo konim a?
2 Fa Ɛ Rɛle Wula Gyihova Anu: Tete ne, nɔhalɛ azonvolɛ dele nganeɛ kɛ bɛnrɛhola bɛ gyima ne yɛ. Gyihova Nyamenle mɔɔ Mosisi, Gyɛlɛmaya, Emɔso, yɛɛ menli gyɛne vale bɛ nwo dole ɔ nwo zo la manle bɛholale bɛlile ɛzulolɛ biala anwo zo konim na bɛyɛle gyima dɔɔnwo. (Ade. 4:10-12; Gyɛ. 1:6, 7; Emɔ. 7:14, 15) Ɛzoanvolɛ Pɔɔlo noko dendɛle “akɛnrasesebɛ” zo. Adenle boni azo? Ɔhanle kɛ ‘yɛ Nyamenle ne a manle’ ɔdendɛle zɔ a. (1 Tɛs. 2:2) Ɛhɛe, yɛ muala yɛbahola yɛava yɛ rɛle yɛawula Gyihova anu kɛ ɔbamaa yɛanyia moalɛ, nrɛlɛbɛ nee anwosesebɛ mɔɔ yɛhyia na yɛahola yɛayɛ Baebolo ɛzukoalɛ mɔɔ so ma la.—Aye. 41:10; 1 Kɔl. 1:26, 27; 1 Pita 4:11.
3, 4. Ndetelɛ boni a bɛyɛ kɛ bɛfa bɛaboa yɛ na yɛahola yɛahilehile Nyamenle Edwɛkɛ ne anu a?
3 Maa Bɛtete Wɔ: Gyihova Nyamenle, yɛ Kilehilevolɛ Kpole ne dua sunsum nu ngilehilelɛ ngyehyɛleɛ zo tete yɛ dahuu, amaa bɛaziezie yɛ bɔkɔɔ kɛ kilehilevolɛma. (Aye. 54:13; 2 Tem. 3:16, 17) Die ndetelɛ ɛhye to nu na yɛ mɔɔ ɛkɛhola biala la maa Ngɛlɛlera ne anu ndelebɛbo mɔɔ ɛlɛ la ɛyɛ kpole, amaa wɔanyia anyuhɔlɛ wɔ kɛzi ɛbɔ mɔdenle ɛkilehile Baebolo ne anu nɔhalɛ nu la. Ɔwɔ nuhua kɛ ɛhye a le bodane titile mɔɔ Teokelase Ɛzonlenlɛ Sukulu ne nee Ɛzonlenlɛ Nyianu ne gyi zolɛ ɛdeɛ, noko asafo nyianu kɔsɔɔti tete yɛ maa yɛkilehile Nyamenle Edwɛkɛ ne anu kpalɛ.
4 Bɔ mɔdenle sukoa ndenle sikalɛ mɔɔ bɛdua zo bɛkilehile sunsum nu ninyɛne mɔɔ anu yɛ se la. Ministry School buluku ne mukelɛ 227 ne kilehile nuhua kɛ: “Ɔwɔ kɛ ɛte wɔ edwɛkɛ ne abo wienyi na wɔahola wɔaboa awie mɔ wɔamaa bade ɔ bo.” Saa yɛmaa mualɛ wɔ debiezukoalɛ bo a, ɔboa ɔmaa edwɛkɛtitile bie mɔɔ yɛbava yɛali gyima kenlebie la ka yɛ adwenle nu. Yemɔti siezie ɛ nwo kpalɛ, na wɔanyia anwodozo kpole kɛ ɛbahola wɔahilehile.
5. Duzu ndetelɛ bieko a yɛnyia ye wɔ asafo ne anu mɔɔ baboa yɛ yeamaa yɛanyia anyuhɔlɛ kɛ kilehilevolɛma ɛ?
5 Mɔlebɛbo ne, Keleseɛne azonvolɛ zukoale kɛzi bɛ gɔnwo mɔ kilehile wɔ mekɛ mɔɔ bɛlɛyɛ ɛdoavolɛyɛlɛ gyima ne la. (Luku 10:1) Saa ɔkɛyɛ boɛ a, ɛ nee nolobɔlɛma mɔɔ bɔ mɔdenle mɔɔ dahuu adekpakyelɛma, mgbanyima nee neavolɛ adenduvoma boka nwo la ɛhɔ wɔ mekɛ mɔɔ bɛlɛyɛ Baebolo ɛzukoalɛ la. Yɛ kɛzi bɛfa neazo nee nvoninli mɔɔ wɔ buluku mɔɔ bɛlɛsukoa la anu bɛkilehile Ngɛlɛlera ne anu la nzonlɛ. Biza bɛ maa bɛmaa wɔ nzuzulɛ wɔ kɛzi ɛbahola wɔayɛ kilehilevolɛ kpalɛ la anwo. (Mrɛ. 1:5; 27:17) Kile anyezɔlɛ wɔ ndetelɛ zɛhae mɔ kɔsɔɔti anwo kɛ ɔle ndetelɛ mɔɔ vi Nyamenle ɛkɛ a.—2 Kɔl. 3:5.
6. Duzu a hyia kpalɛ na awie ayɛ Nyamenle Edwɛkɛ ne kilehilevolɛ a?
6 Fa ɛ rɛle wula Gyihova anu na nyia nvasoɛ fi ndetelɛ mɔɔ ɔfa ɔmaa la anu. Fa wɔ anyuhɔlɛ ne kɔ asɔneyɛlɛ nu. (Edw. 25:4, 5) Ɛdawɔ noko ɛ nye balie kɛ wɔboa awie wɔmaa yeyɛ kɛ ɛdawɔ, awie mɔɔ kilehile Nyamenle Edwɛkɛ ne anu la!