Kenle Ko Nyianu Titile Ngyehyɛleɛ Fofolɛ

Kenle ko nyianu titile mɔɔ bɛbayɛ ye 2009 ɛzonlenlɛ ɛvolɛ ne anu la edwɛkɛtile ne se ‘Nea Maa Gyima ne Mɔɔ Wɔzɔ nu La Ɛli Munli’ mɔɔ gyi Kɔlɔsaema 4:17 azo la. Kɛ Keleseɛnema la, yɛbu folɛdulɛ ɛhye kɛ ɔle anyebolo edwɛkɛ. Yɛ bodane a le kɛ yɛyɛ yɛ ɛzonlenlɛ gyima ne bɔkɔɔ kɛmɔ Gyisɛse yɛle la. (Dwɔn 17:4) Ɛzoanvolɛ Pɔɔlo noko yɛle ɛhye anwo neazo kɛnlɛma manle yɛ. Ɔbɔle kpɔkɛ kɛ ɔyɛ ye ɛzonlenlɛ gyima ne yeawie.—Gyi. 20:24.

Maanzinli zo neavolɛ ne foa ne bahile kɛzi nolobɔlɛma ɛlɛdi ngyegyelɛ ngakyile zo konim wɔ daselɛlilɛ nu la. Akee ɛdendɛlɛ ne mɔɔ se “Siezie Mɔɔ Wɔlua La” bahwe adwenle ahɔ kɛzi yɛbahola yɛaboa ‘menli mɔɔ fɛta kɛ bɛnyia ngoane mɔɔ ɛnlɛ awieleɛ la’ azo. (Gyi. 13:48) Tendɛvolɛ ne mɔɔ bara la balumua azuzu 2 Kɔlentema 6:1-10 ngyehyɛnu ko biala anwo wɔ ɛdendɛlɛ ne mɔɔ se “Kɛzi Yɛkanvo Yɛ Nwo Kɛ Sonvolɛma” la anu. Wɔ ewiazo, ɔbaha edwɛkɛtile ne mɔɔ se “Bu Wɔ Ɛzonlenlɛ Gyima ne Kpole Kpalɛ” la anwo edwɛkɛ yeahile tievolɛma. Ɔda ali wienyi kɛ foa ne mɔɔ se “Mgbanyinli nee Ngakula Anye Die Ɛzonlenlɛ Gyima ne Anwo” yɛɛ “Ngakula Mɔɔ Maa Gyima ne Di Munli” la bamaa wɔ anwosesebɛ. Ɔwɔ kɛ menli mɔɔ kulo kɛ fa nzule nu ɛzɔnenlɛ yɛ bɛ nwo zo mɔɔ bɛyila la anwo sɛkɛlɛneɛ la ka nwolɛ edwɛkɛ kile ebianutɛnlavolɛ ne ndɛndɛ. Yɛ nyianu ngyikyi nee mgbole ne mɔ anu debie titile ko a le The Watchtower mɔɔ yɛsukoa la. Fa wɔ ɛdeɛ mɔɔ ɛbazukoa wɔ kenle ko nyianu titile dapɛne ne anu la kɔ.

Amaa yɛanlea kɛ gyima ne mɔɔ yɛzɔ nu la ɛli munli la, yɛbɔ mɔdenle kɛ yɛnrɛmaa ninyɛne mɔɔ yɛ nye die nwo nee gyima gyɛne ɛnrɛheda mɔɔ Gyihova ɛva ɛwula yɛ sa nu la azo. Ɔwɔ kɛ Ngɛlɛlera ne anu anwosesebɛ mɔɔ yɛbanyia wɔ kenle ko nyianu titile ɛhye anu la boa yɛ kɔsɔɔti maa yɛnwu mɔɔ ɔhyia kɛ yɛyɛ la amaa yɛ adwenle ahɔ yɛ ɛzonlenlɛ gyima ne azo kɛ yɛyɛ yɛawie.