Sunsum nu Aleɛlilɛ nee Anyelielɛ Mekɛ
1. Kɛzi Gyihova di ye azonvolɛ sunsum nu ngyianlɛ nwo gyima ɛ?
1 Gyihova fi ɛlɔlɛ nu dwenle ye azonvolɛ sunsum nu ngyianlɛ nwo. Sunsum nu ɛhɔne ku ewiade ne anu amra ɛdeɛ, noko yɛmɛ yɛdi aleɛ yɛ ko yi. (Aye. 65:13) Adenle ko mɔɔ Gyihova dua zo maa yɛ sunsum nu aleɛ la a le yɛ ɛvolɛ ɛvolɛ maangyeba nyianu ne. Ɛlɛsiezie ɛ nwo kɛ ɛkɔ “Nyamenle Sunsum Kile Yɛ Adenle” Maangyeba Nyianu ne mɔɔ ɛlɛba la gyimalilɛ ne kɔsɔɔti ɔ? Bɛziezie sunsum nu aleɛ mɔɔ yɛ fɛ na ɔmaa anwosesebɛ la bɛmaa yɛ.
2. Nyianu ne mɔɔ yɛdumua yɛayɛ nwolɛ ngyehyɛleɛ la kile duzu?
2 Dumua Yɛ Ngyehyɛleɛ: “Sonla mɔɔ anye bolo ye gyima nwo la adwenle ngyehyɛlɛ maa ɔnyia aleɛ dɔɔnwo.” (Mrɛ. 21:5) Ɛhye ati, saa ɛlɛyɛ wɔ ngyehyɛleɛ mɔɔ bamaa wɔahɔ kenle nsa nyianu ne amuala bie a, ka nwolɛ edwɛkɛ kile wɔ gyimamenle na sɛlɛ adenle fi gyima nu. Saa ɛbahyia dabelɛ a, wɔyɛ nwolɛ ngyehyɛleɛ ɔ? Eza ɔwɔ kɛ ɛyɛ aleɛ nwo ngyehyɛleɛ na ɛ nee ɛ gɔnwo mɔ ali wɔ nyianu ne abo. Yɛ ngyehyɛleɛ kɔ nyianu ne abo ndɛ alehyenlɛ biala na kpondɛ ɛleka mɔɔ ɛbadɛnla la amaa wɔanyia edwɛne nee asɔneyɛlɛ mɔɔ bɛbava bɛabuke gyimalilɛ ne la anu kyɛfoa.
3. Tɛladeɛ boni a ɔwɔ kɛ yɛwula yɛkɔ nyianu ne abo a?
3 Yɛkulo kɛ yɛnea kɛ yɛ tɛladeɛ mɔɔ yɛbawula la le kɛnlɛma na ɔfɛta. (1 Tem. 2:9, 10) Maangyeba nyianu maa yɛnyia adenle kɛnlɛma yɛdi menli mɔɔ wɔ sua ne azo la daselɛ. Saa yɛsiezie yɛ nwo kɛnlɛma wɔ mekɛ mɔɔ yɛwɔ nyianu sua ne azo na yɛbɔ yɛ baagye ne mɔ a, ɔmaa yɛyɛ ngakyile yɛfi menli mɔɔ bɛnle diedima la anwo na ɔmaa menli mɔɔ kɛnwu yɛ la ka yɛ nwo edwɛkɛ kpalɛ.
4. Duzu a baboa yɛ nee yɛ mbusua yeamaa yɛanyia nvasoɛ yɛavi nyianu ne anu a?
4 Tie ye Boɛ: Yɛngulo kɛ sunsum nu aleɛ biala kpa yɛ ti wɔ nyianu ne abo! (Mrɛ. 22:17, 18) Yɛtɛnla ɔ nyunlu a ɔboa ɔmaa yɛtie edwɛkɛ ne boɛ. Ɛ nee wɔ abusua ne ɛbɔ mɔdenle ɛdɛnla ɔ nyunlu wɔ nyianu ɛhye abo. (Nea The Watchtower, September 15, 2002, mukelɛ 13.) Saa yɛbuke yɛ Baebolo ne anu wɔ mekɛ mɔɔ bɛlɛkenga tɛkese ne la na yɛkɛlɛ edwɛkɛ ekyi a, ɔbaboa yeamaa yɛava yɛ adwenle yɛahɔ gyimalilɛ ne azo na debie biala andwehwe yɛ. Akee nɔsolɛ nu yɛbahola yɛanlea mɔɔ yɛhɛlɛle la anu na yɛaha nuhua edwɛkɛ mɔɔ yɛ anyelielɛ la yɛahile awie mɔ. Kenle nsa ye, yɛnwu kɛ ngakula bie mɔ tɛnla ɛleka ko na bɛbɔ adawu wɔ mekɛ mɔɔ nyianu ne ɛlɛkɔ zo la na bɛkɛlɛ edwɛkɛ wɔ mobile zo bɛfa bɛnwa bɛ nwo. Saa yɛlɛ ngakula mɔɔ bie mɔ ɛtɛnyianle ɛvolɛ abulanwiɔ a, nvasoɛ wɔ zo kɛ yɛ nee bɛ bɔ nu tɛnla na yɛtie gyimalilɛ ne yɛbɔ nu kɛ abusua tɛla kɛ yɛkɛmaa ngakula ne mɔ nee bɛ gɔnwo mɔ ngakula kɛdɛnla ɛleka gyɛne la.
5. Kɛmɔti a bie mɔ kɔgyinla kpɔda ne anzi wɔ ewiazo ɛ, na duzu a bamaa yɛahoati ɛhye a?
5 Yɛnwu ye noko kɛ nlafelɛ ku menli wɔ ewiazo yemɔti bɛgyakyi bɛ mbia ɛkɛ na bɛkɔgyinla kpɔda ne anzi. Kɛmɔ ninyɛne dɔɔnwo twehwe bɛ adwenle wɔ ɔ nzi ɛkɛ ne la ati, menli zɛhae mɔ ɛndie edwɛkɛ ne kpalɛ. Bɔ mɔdenle da ndɛ amaa nlafelɛ angu wɔ wɔ ɛkɛ. Bieko ɔle kpalɛ kɛ ɛkɛli aleɛ mɔɔ anu ɛnyɛ ɛnlomboɛ la wɔ ewiazo ɛnwomenlelielɛ mekɛ ne anu amaa nlafelɛ angu wɔ.
6. Kɛ ɔkɛyɛ na yɛanyia anyelielɛ kpole wɔ nyianu ne abo ɛ?
6 Fa Agɔnwolɛ: Yɛ nee agɔnwolɛma di aleɛ mɔɔ yɛ fɛ a, ɔyɛ anyelielɛ. (Mrɛ. 15:17) Zɔhane ala a agɔnwolɛvalɛ mɔɔ yɛ nee yɛ mediema mraalɛ nee mrenya nyia wɔ nyianu ne abo la maa yɛ nye die kpole a. Ɛhye ati saa bɛtɛbɔle nyianu ne abo a, nea kɛzi ɔle kɛnlɛma kɛ yɛbava mediema mɔɔ rale nyianu ne bie la agɔnwolɛ a! (Edw. 133:1) Saa ebianutɛnlavolɛ ne to ɛsalɛ fɛlɛ yɛ kɛ yɛradɛnla aze kolaa na bɛabɔ edwɛne ne abo a, ɔwɔ kɛ yɛpɛ yɛ adwelielilɛ ne azo na yɛtɛnla aze yɛmaa gyimalilɛ ne bɔ ɔ bo.
7. Ka wɔ anwubielɛ mɔɔ kile kɛzi yɛbahola yɛali menli mɔɔ wɔ nyianu sua ne azo daselɛ la.
7 Dua Adenle Biala Azo Di Daselɛ: Nyianu maa yɛta yɛnyia adenle kɛnlɛma yɛdi daselɛ. Bɛta bɛbiza menli dɔɔnwo mɔɔ rale nyianu ne bie mɔɔ kɛhɔ ɛleka mɔɔ bɛdi aleɛ wɔ mekɛ mɔɔ bɛkɛkpɔne nyianu ne la edwɛkɛtile mɔɔ wɔ bɛ nyianu baagye ne azo la anwo edwɛkɛ. Ɛhye maa bɛ nee bɛ bɔ adawu na bɛdi nɔhalɛ ne anwo daselɛ kɛnlɛma. Bɛdole ɛsalɛ bɛvɛlɛle menli mɔɔ bizale edwɛkɛ zɛhae bie la na bɛhɔle nyianu ne bie.
8. Duzu ati a ɔwɔ kɛ yɛkɔ maangyeba nyianu ne mɔɔ ɛlɛba la bie ɛ?
8 Bɛva mekɛ dɔɔnwo bɛyɛ nyianu ne, ɛleka mɔɔ yɛbadɛnla, gyima ngakyile ne mɔ nee ɛdendɛlɛ ne mɔ anwo ngyehyɛleɛ. Ɛlɔlɛ nu mɔɔ mediema vi ɛdu bɛ nwo ɛmaa ɛziezie sunsum nu aleɛ ɛhye mɔ la kile kɛzi Gyihova fi ɛlɔlɛ nu dwenle ye menli ne anwo la. Ɔrɛla ye kɛ yɛ muala yɛbahɔ bie na yɛava anyelielɛ yɛali yɛamaa yɛ ko ayi! Mekɛ mɔɔ yɛlɛyɛ zɔ la, ɛhɔne ɛnrɛhu yɛ kɛ ewiade ne anu amra la na emomu yɛbava “fɛlɛkolilɛ yɛavi yɛ ahonle nu yɛado edwɛne.”—Aye. 65:14.
[Ɛlɛka wɔ mukelɛ 3]
Maangyeba Nyianu Ngakyelɛ
◼ Gyimalilɛ Mekɛ: Kenle nsa ne amuala bɛbabɔ gyimalilɛ ne abo nwonlomɔ 9:20. Saa mukenye edwɛne ne bɔ ɔ bo a, ɔwɔ kɛ yɛ kɔsɔɔti yɛtɛnla aze, amaa bɛahola bɛabɔ gyimalilɛ ne abo wɔ enililɛ nu. Wɔ Yalɛ nee Folɛ, yɛbakpɔne nɔsolɛ 4:55 na Molɛ noko yɛakpɔne nɔsolɛ 4:00.
◼ Ɛleka Mɔɔ Bɛfa Kale Bɛsie: Kyesɛ awie ɛnde kpɔkɛ anzɛɛ arɛlevilɛ nu edwɛkɛ bie si, tɛ ye zɔhane a dahuu ɔle kpalɛ kɛ yɛkɛdɛnla ɛleka mɔɔ yɛbahola yɛadie gyimalilɛ ne tɛla kɛ yɛkɛdɛnla kale nu ɛleka mɔɔ maa yɛ adwenle kola fi edwɛkɛ ne azo anzɛɛ yɛdafe la. Saa yɛtɛnla menli ne anu yɛtie edwɛkɛ ne mɔɔ debie ɛndwehwe yɛ adwenle la a, ɔle adenle mɔɔ yɛdua zo yɛkile anyezɔlɛ yɛmaa sunsum nu nziezielɛ mɔɔ vi Gyihova ɛkɛ ne la.
◼ Ebia Mɔɔ Bɛkpondɛ Bɛsie Awie: Ɛbahola wɔakpondɛ mbia wɔamaa menli mɔɔ ɛ nee bɛ vole kale anzɛɛ ɛ nee bɛ a wɔ sua ko anu la ala.
◼ Ewiazo Aleɛ: Yɛsɛlɛ wɔ fa ewiazo aleɛ bɛla tɛla kɛ ɛkɛvi nyianu ɛleka ne kɛ ɛkadɔ aleɛ wɔ ewiazo ɛnwomenlelielɛ mekɛ ne anu. Ɛbahola wɔava debie ekyi mɔɔ bɛgua aleɛ nu a ɔkola ɔkɔ ebia bo la wɔara. Bɛmmaa awie adenle kɛ ɔva debie kpole mɔɔ bɛfa menli dɔɔnwo aleɛ bɛgua nu, debie mɔɔ kola bɔ nee nza ɔrɛla nyianu ne abo.
◼ Buluku Fofolɛ Mɔɔ Bɛkɛye: Nyamenle edwɛkɛ ne tu yɛ folɛ kɛ ‘yɛva ɛhulolɛ yɛyɛ debie biala mɔɔ yɛyɛ la.’ (1 Kɔl. 16:14) Saa bɛye buluku bie wɔ nyianu ne abo a, ɛlɔlɛ nee awie mɔ mɔɔ yɛsuzu bɛ nwo la ɛnrɛmaa yɛnrɛnriandi yɛnrɛzuhuzuhu awie mɔ kɛ yɛdumua yɛalie buluku ne mɔɔ bɛye la bie. Ɔnle kɛ yɛgyakyi yɛ mbia ne mɔ ɛkɛ kɛ yɛkasolo kolaa na edwɛne nee asɔneyɛlɛ ne mɔɔ li awieleɛ la abɔ ɔ bo. Saa bɛyɛ asɔne bɛwie a, ɔwɔ kɛ yɛ kɔsɔɔti yɛyɛ yɛ ninyɛne pɛpɛɛpɛ na yɛto ɛlɔnwɔne yɛdie buluku ne mɔɔ bɛye la. Saa yɛto yɛ rɛle aze na yɛsi abotane zɛhae a, ɔkile kɛ yɛle Keleseɛnema mɔɔ yɛnyi, na ɔda yɛ mediemalɔlɛ mɔɔ yɛlɛ yɛmaa awie ko biala la ali.—Dwɔn 13:35.
◼ Ndoboa: Yɛbahola yɛaye ndoboa wɔ yɛ Belemgbunlililɛ Asalo ɛkɛ anzɛɛ nyianu ne abo yɛava yɛaboa ewiade amuala gyima ne yɛava yɛahile kɛzi yɛ nye sɔ nyianu ngyehyɛleɛ ne la. Ɔwɔ kɛ bɛtua kyɛɛke biala mɔɔ bɛye wɔ nyianu ne abo la bɛmaa “Watch Tower.”
◼ Esiane nee Edwɛkɛ Mɔɔ Hyia Ndɛndɛ: Saa awie hyia ayileyɛlɛ ndɛndɛ wɔ nyianu ne abo a, yɛsɛlɛ kɛ bɛnwu menli mɔɔ die nyɛvolɛ ne mɔ anu ko mɔɔ bikye bɛ la na ɔbamaa Ayilelielɛ Ɛleka ne anzo ade ye ndɛndɛ amaa yɛ menli mɔɔ bɔ mɔdenle mɔɔ bɛwɔ ɛkɛ la ahola anlea kɛzi ye gyinlabelɛ ne de la na bɛava nwolɛ moalɛ mɔɔ fɛta la bɛamaa ye.
◼ Bɔkɔbɔkɔyɛlɛ: Ɔwɔ kɛ menli mɔɔ bahɔ nyianu ne kɔsɔɔti la siezie mbia mɔɔ bɛkɛli debie wɔ zo la azo. Kɛmɔ bɛfa ninyɛne mɔɔ bɛgua ewula nu bɛsiezie nyianu biala abo la ati, bɛnlea kɛ bɛkɛva ngɛlata, aleɛ, nzule wolɔba nee ninyɛne gyɛne bɛkɛgua nu. Saa yɛyɛ ɛhye a ɔkile kɛ yɛle menli mɔɔ yɛyɛ yɛ nwo bɔkɔbɔkɔ a.
◼ Nvoninli Ɛpɛlɛ: Saa nyianu ne ɛlɛkɔ zo na ɛpɛ nvoninli a, mmafa flash ɛdi gyima. Kɛmɔ yɛmkpondɛ kɛ yɛsi kongo wɔ teokelase nyianu bo la ati, yɛngulo kɛ yɛpɛ nvoninli yɛdie ezukoa. Eza noko yɛngulo kɛ yɛka yɛkile menli mɔɔ pɛ nvoninli die ezukoa la kɛ bɛrapɛ mediema nvoninli wɔ nyianu ne abo bɛva bɛkpondɛ ezukoa.—w84 7/1 m. 25; eza nea Organized, mukelɛ 142, ɛdendɛkpunli 3.
◼ Bɛbɔ nu Bɛdɛnla kɛ Abusua: Ɔwɔ kɛ awovolɛ nee bɛ mra tɛnla ɛleka ko wɔ nyianu ne abo tɛla kɛ bɛkɛgyakyi bɛ mra, mɔɔ bɛdabɛ mɔɔ bɛtɛnyianle ɛvolɛ abulanwiɔ boka nwo la bɛkɛmaa bɛ nee bɛ gɔnwo mɔ ngakula gyɛne kɛdɛnla. Saa bɛ nee bɛ tɛnla a, bɛbahola bɛamaa bɛ anwosesebɛ bɛamaa bɛahɛlɛ nyianu ne anu debie mɔɔ bɛbava bɛali gyima la.
◼ Follow Up Kɛlata: Saa bɛdi awie mgbemgbɛnenu daselɛ wɔ nyianu mekɛ ne anu na ɔkile nwolɛ anyelielɛ a, bɛva Please Follow Up (S-43) ne na bɛli nwolɛ gyima bɛmaa ye. Ɔwɔ kɛ nolobɔlɛma fa Follow Up kɛlata ko anzɛɛ nwiɔ kɔ nyianu ne abo. Bɛbahola bɛava ngɛlata ne mɔɔ bɛhɛlɛ zolɛ bɛwie la bɛahɔ Bulukulielɛ Ɛleka ne anzɛɛ bɛava bɛamaa bɛ asafo ne anu kɛlɛhɛlɛvolɛ ne wɔ mekɛ mɔɔ bɛkɛzia bɛkɛhɔ la.—Nea March 2005 Our Kingdom Ministry, mukelɛ 4.
◼ Dabelɛ: (1) Saa ɛwɔ sua mɔɔ ɛbadua nwolɛ kakɛ la anu a, ɛ nee menli dodo mɔɔ bo zolɛ la mmada nu. (2) Saa ɛwɔ awie mɔ sua nu a, suzu ninyɛne nwo ɔlua ɛ nwo mɔɔ ɛbayɛ ye bɔkɔbɔkɔ, wɔayɛ wɔ ninyɛne pɛpɛɛpɛ na wɔahile nwolɛ anyezɔlɛ la azo. (3) Ɔnle kɛ mediema mrenya nee mraalɛ da sua ko anu kyesɛ bɛle abusua ko. (4) Mmato aleɛ wɔ sua mɔɔ bɛndo aleɛ wɔ nu la anu. (5) Amaa wɔ ɛbɛlabɔlɛ ayɛ mɔɔ fɛta la, ɔnle kɛ ɛbia alie nwo. Saa ɔkɛyɛ boɛ a ɔwɔ kɛ ɛfa ɛkpa anzɛɛ ɛdanlɛ ɛyɛ abialeɛ. (6) Kɛmɔ yɛle Keleseɛnema la ati, yɛngulo kɛ yɛfa ngyehyɛleɛ biala mɔɔ bɛyɛ bɛmaa nyɛvolɛ la yɛdi gyima wɔ adenle ɛtane zo. (7) Da sunsum ma ne ali wɔ kɛzi ɛ nee menli mɔɔ yɛ gyima wɔ hotɛle anzɛɛ mbusua mɔɔ ɛ nee bɛ de la yɛ la anu.