Maanzinli Nyianu Ngyehyɛleɛ Fofolɛ

Kɛzi yɛkola yɛgyinla kpundii yɛko yɛtia menli mɔɔ dwazo tia nɔhalɛ ɛzonlenlɛ wɔ adenle ɛtane zo la ɛ? Kɛzi yɛbahola yɛali konim wɔ ninyɛne mɔɔ kɔ zo twehwe yɛ kɔ ewiade ɛtane ne anu la azo ɛ? Ɛvolɛ 2009 maanzinli nyianu ne baye kpuyia ɛhye mɔ mɔɔ hyia la anloa. Ye edwɛkɛtile ne se “Bɛva Kpalɛyɛlɛ Bɛli Ɛtane nwo zo Konim.” (Wulo. 12:21) Nea mɔɔ yɛbazuzu nwolɛ la.

Maangyeba zo neavolɛ ne bamaa ɛdendɛlɛ mɔɔ se “Bɛziezie Yɛ Amaa Yɛava Kpalɛyɛlɛ Yɛali Ɛtane nwo zo Konim,” “Nea Boɛ na Wɔanlie Ɛ Nwo Wɔanli Somaa!,” “Ɛtane Kɔsɔɔti Awieleɛ Ɛbikye!,” yɛɛ “Bɛmaa Yɛmia Yɛ Diedi nu Yɛli Ewiade ne azo Konim.” Maanzinli zo neavolɛ ne baha edwɛkɛtile ne mɔɔ se “Ɛnɛ A Le Mekɛ Mɔɔ Ɔwɔ Kɛ Yɛfi Nlafelɛ nu Yɛdwazo A!,” mɔɔ gyi Wulomuma 13:11-13, yɛɛ “Mmamaa Ɛ Rɛle Bɔ wɔ Ngyegyelɛ Mekɛ Nu,” mɔɔ gyi Mrɛlɛbulɛ 24:10 azo la anwo edwɛkɛ ahile yɛ. Eza yɛbadie maanzinli zo neavolɛ ne foa ne mɔɔ se “Maanzinli ne anu Ngyianlɛ nwo Gyimalilɛ” la. Foa bieko mɔɔ bayɛ anyelielɛ la a le foa ne mɔɔ se “Asoo Ɛbahola Wɔayɛ ‘Ɛzonlenlɛ Gyima Ɛhye’—Ɔlua Adekpakyelɛ Mɔɔ Ɛbayɛ La Azo?” Ɛdendɛlɛ nwiɔ mɔɔ bɛhyehyɛ nu mɔɔ lumua la ati se “Gyinla Kpundii Ko Tia Abɔnsam Agyiba ne Mɔ.” Ɔbaboa yɛ yeamaa yɛanwu Abɔnsam agyiba ne mɔ wɔ ninyɛne mɔɔ bɛyɛ, nwɔhoalilɛ yɛɛ nwomazukoalɛ nu. Ɛdendɛlɛ mɔɔ bɛhyehyɛ nu mɔɔ se “Bɛmaa Bɛ Nwo Ɛyɛ Se na Bɛho Bɛtia Seetan wɔ Mekɛ Ɛtane Ɛhye Anu” la bamaa yɛanwu kɛzi yɛbahola yɛava folɛdulɛ ɛhye mɔɔ vi sunsum nu mɔɔ wɔ Ɛfɛsɛsema 6:10-18 la yɛali gyima la.

Koyɛlɛ la Belemgbunlililɛ nrɛlaleɛ ne nolobɔlɛ nee ɛtane zo konim mɔɔ yɛdi yɛadu ɔ bo la avinli. (Yek. 12:17) Ɔnyɛ nwanwane kɛ Seetan kɔ zo fa ngyegyelɛ ba Gyihova Alasevolɛ nwo zo a! (Aye. 43:10, 12) Noko Abɔnsam bakpo aze kolaa ɔluakɛ yɛbɔ kpɔkɛ kɛ yɛkɔ zo ‘yɛava kpalɛyɛlɛ yɛali ɛtane zo konim.’ Yɛ ngyehyɛleɛ fɔɔnwo mɔɔ bamaa wɔanyia maanzinli nyianu gyimalilɛ ne kɔsɔɔti azo nvasoɛ kpalɛ la.