Fa Ngapezoma Ne Yɛ Neazo—Emɔso
1. Duzu ati a Emɔso neazo ne maa yɛ anwosesebɛ ɛ?
1 Asoo wɔde nganeɛ kɛ ɛnrɛhola ɛnrɛha edwɛkɛ ne ɔluakɛ wɔangɔ sukulu kpole anzɛɛ ezukoa ɛnle wɔ sua nu? Saa ye zɔhane a, ɛnee Emɔso neazo ne bakyekye ɛ rɛle. Ɛnee ɔka mboane yɛɛ ɔyɛ ɛbɔ nu gyima, noko Gyihova manle ɔhanle edwɛkɛ mɔɔ nwolɛ hyia la. (Emɔ. 1:1; 7:14, 15) Zɔhane ala a Gyihova fa menli mɔɔ le bɛlɛvo la di gyima wɔ yɛ mekɛ ye azo a. (1 Kɔl. 1:27-29) Yɛ ɛzonlenlɛ gyima ne anwo debie boni bieko a yɛbahola yɛazukoa yɛavi ngapezonli Emɔso ɛkɛ a?
2. Duzu ati a yɛbahola yɛagyinla dwazotia nloa kpundii wɔ ɛzonlenlɛ gyima ne anu ɛ?
2 Gyinla Kpundii Wɔ Dwazotia Mekɛ Nu: Mekɛ mɔɔ Amazaya mɔɔ sonle ɛnlankɛ ralɛ wɔ Yizilayɛ sɔlɔ mbusua bulu belemgbunlililɛ ne anu dele Emɔso ngapezo ne la, ɔhanle kɛ: ‘Wɔha bie a yeyɛ boɛ! Sia kɔ sua nu! Ɛke le yɛ ɛzonlenlɛ sua!’ (Emɔ. 7:12, 13) Amaa yeahola yɛaha yɛahile Belemgbunli Gyɛlɔbowam kɛ ɔmaa Emɔso ɛgyakyi gyima ne la, Amazaya doanle ngapezonli ne. (Emɔ. 7:7-11) Noko Emɔso ahonle andu. Ɛnɛ, ɛsɔfoma bie mɔ kpondɛ moalɛ fi maanyɛlɛ nu menli ɛkɛ na bɛdwazo bɛtia Gyihova menli. Noko akee, Gyihova ɛmaa yɛnyia anwodozo kɛ akodeɛ mɔɔ bɛbayɛ bɛatia yɛ la ɛnrɛli munli.—Aye. 54:17.
3. Edwɛkɛ nwiɔ mɔɔ yɛbɔ ye nolo ɛnɛ la a le boni?
3 Bɔ Nyamenle Ndɛnebualɛ Nee Nyilalɛ Mɔɔ Bara Kenlebie La Nolo: Emɔso hanle kɛ bɛbabua Yizilayɛ sɔlɔ mbusua bulu belemgbunlililɛ ne ndɛne ɛdeɛ, noko ɔhanle ɛwɔkɛ mɔɔ Gyihova ɛbɔ kɛ ɔbamaa bakyekye ninyɛne bieko na bɛanyia nyilalɛ dɔɔnwo la anwo edwɛkɛ wɔ Baebolo buluku ne mɔɔ ye duma la zo la anu ɔvale ɔdwulale ye edwɛkɛ ne. (Emɔ. 9:13-15) Yɛdayɛ noko yɛka Nyamenle “ndɛnebualɛ kenle ne” mɔɔ ɛlɛba la anwo edwɛkɛ, noko ɛhye le ‘belemgbunlililɛ edwɛkpa’ ne mɔɔ ɔwɔ kɛ yɛbɔ ye nolo la foa ala. (2 Pita 3:7; Mat. 24:14) Ɛtanevolɛma mɔɔ Gyihova bazɛkye bɛ wɔ Amagɛdɔn ne anu la babuke adenle yeamaa azɛlɛ ye azo paladaese ne ara.—Edw. 37:34.
4. Anwodozo boni a yɛlɛ kɛ yɛbahola yɛayɛ Gyihova ɛhulolɛdeɛ a?
4 Belemgbunlililɛ edwɛkɛ ne mɔɔ yɛka ye wɔ ewiade mɔɔ dwazotiama dɔɔnwo wɔ nu la maa kpɔkɛ mɔɔ yɛbɔ kɛ yɛbɔ ɛbɛla yeamaa ɔ nee yɛ nwo zo mɔɔ yɛyila ayɛ ko na yɛayɛ Gyihova ɛhulolɛdeɛ la yɛ se. (Dwɔn 15:19) Noko akee, yɛze ye wienyi kɛ Gyihova bamaa yɛafɛta na yɛahola yɛayɛ ye ɛhulolɛdeɛ kɛmɔ ɔyɛle ɔmanle Emɔso la.—2 Kɔl. 3:5.