Bodane Mɔɔ Sonle Bolɛ wɔ Ɛzonlenlɛ Ɛvolɛ Fofolɛ ne Anu
1 Saa yɛkulo kɛ yɛnyia sunsum nu anyuhɔlɛ a ɛnee ɔwɔ kɛ yɛfa ninyɛne bie yɛsie yɛ nye zo. Duzu a wɔva wɔzie ɛ nye zo wɔ ɛzonlenlɛ ɛvolɛ fofolɛ ne anu a? Adekpakyelɛ boavolɛ mɔɔ ɛbayɛ ye siane ko anzɛɛ mɔɔ bo la le bodane kpalɛ. Kɛmɔ gyima kɛnlɛma ɛhye hyia ngyehyɛleɛ mɔɔ yɛbalumua yɛayɛ la ati, ɛnɛ a le mekɛ kpalɛ mɔɔ ɔwɔ kɛ yɛbɔ ɔ bo yɛdwenle nwo a. Duzu ati a adekpakyelɛ boavolɛ le bodane kpalɛ mɔɔ ɔwɔ kɛ yɛfa yɛsie yɛ nye zo a?
2 Mɔɔ Ɔti Yɛyɛ Adekpakyelɛ Boavolɛ La: Adekpakyelɛ boavolɛ boa maa yɛdua dɔɔnwo mɔɔ yɛyɛ wɔ edwɛkɛhanlɛ gyima ne anu la azo yɛsɔ yɛ anwuma Selɛ ne anye “molozo” anzɛɛ kpalɛ. (1 Tɛs. 4:1) Saa yɛdwenle mɔɔ Gyihova ɛyɛ ɛmaa yɛ la kɔsɔɔti anwo a, yɛ ahonle ka yɛ maa yɛka ɔ nwo edwɛkɛ yɛkile awie mɔ. (Edw. 34:1, 2) Gyihova nwu na ɔ nye sɔ afɔle mɔɔ yɛbɔ yɛyɛ dɔɔnwo wɔ ɛzonlenlɛ gyima ne anu la. (Hib. 6:10) Kɛmɔ yɛze kɛ yɛ mɔdenlebɔlɛ sɔ Gyihova anye la ati, yɛ nye die kpole.—1 Edk. 29:9.
3 Saa ɛta ɛyɛ debie bie a, yɛɛ ye ɛyɛlɛ ɛnyɛ wɔ se bieko na ɛ nye die nwo a. Saa ɛta ɛyɛ edwɛkɛhanlɛ gyima ne a ɔmaa ɛnyia anwodozo ɛdi daselɛ wɔ sua nu nee sua nu. Ɛbayɛ nla kpalɛ wɔ adwelie bo ɛbɔlɛ nee kɛzi ɛfa Baebolo ne ɛdi gyima la anu. Mekɛ mɔɔ ɛlɛka wɔ diedi ne anwo edwɛkɛ dɔɔnwo la yɛɛ nuhua barayɛ se kpalɛ a. Menli dɔɔnwo mɔɔ ɛnee ɛngola ɛnyɛ Baebolo ɛzukoalɛ la ɛhola ɛbɔ bie abo wɔ mekɛ mɔɔ bɛlɛyɛ adekpakyelɛ boavolɛ la.
4 Adekpakyelɛ boavolɛ eza kola wula yɛ anwosesebɛ maa yɛkpazi sunsum nu. Adiema nrenya bie mɔɔ gyakyile dahuu adekpakyelɛ gyima ne la dele nganeɛ kɛ ɔlɛfa ye mekɛ dɔɔnwo yeayɛ ewiade gyima yemɔti ɔzile kpɔkɛ kɛ ɔbayɛ adekpakyelɛ boavolɛ siane ko. Ɔhanle kɛ: “Sunsum nu anwosesebɛ mɔɔ menyianle ye siane ko zɔhane anu la zinli me nwo! Menyɛle ngyehyɛleɛ mendoale adekpakyelɛ boavolɛ ne azo na ɛhye manle membanyɛle dahuu adekpakyelɛnli bieko.”
5 Di Ngyegyelɛ ne Azo: Bie mɔ ɛnyɛ adekpakyelɛ boavolɛ ɔluakɛ bɛte nganeɛ kɛ bɛnze daselɛ di kpalɛ. Saa ɛhye a ɛlɛtwe wɔ azia a, Gyihova bahola aboa wɔ kɛmɔ ɔboale Gyɛlɛmaya la. (Gyɛ. 1:6-10) Mosisi hanle kɛ “me nloa ɛnde, yɛɛ me ɛdendɛlɛ le bɛtɛɛ,” noko Gyihova luale ɔ nwo zo manle Ye ɛhulolɛdeɛ yɛle ɛkɛ. (Ade. 4:10-12) Saa ɛte nganeɛ kɛ ɛnfɛta a, sɛlɛ Gyihova ɛkɛ akɛnrazilɛ.
6 Asoo ɛmaa kpɔkɛdelɛ nwo ngyegyelɛ anzɛɛ mekɛ mɔɔ ɛnlɛ la si wɔ adenle? Saa ɛnlɛ anwosesebɛ kpalɛ a, ngyehyɛleɛ mɔɔ bali aboa wɔ mɔɔ ɛbayɛ la baboa amaa wɔayɛ adekpakyelɛ boavolɛ ne bie. Saa ɛnlɛ mekɛ noko a, ɛbahola wɔadu ninyɛne mɔɔ nwolɛ ɛngyia kpalɛ la wɔazie siane fofolɛ. Menli mɔɔ fa bɛ mekɛ kɔsɔɔti yɛ gyima la bie mɔ ɛhola ɛdɔ mekɛ ɛyɛ adekpakyelɛ boavolɛ ɔlua kenle ko anzɛɛ kenle nwiɔ adenle mɔɔ bɛzɛlɛle ye wɔ gyima nu la azo.—Kɔlɔ. 4:5.
7 Kɛzi Ɛbayɛ Ye La: Yɛ ɛhulolɛ mɔɔ ɛlɛ kɛ ɛyɛ adekpakyelɛ boavolɛ la anwo asɔne. Sɛlɛ Gyihova kɛ ɔyila mɔdenle mɔɔ ɛbɔ kɛ ɛtɛlɛ wɔ ɛzonlenlɛ gyima ne anu la azo. (Wulo. 12:11, 12) Ɔbahola yeamaa wɔ nrɛlɛbɛ amaa wɔayɛ ngyehyɛleɛ kpalɛ. (Gye. 1:5) Saa ɛnlɛ nwolɛ ɛhulolɛ a, sɛlɛ Gyihova kɛ ɔboa wɔ ɔmaa ɛ nye ɛlie edwɛkɛhanlɛ gyima ne anwo.—Luk. 10:1, 17.
8 Ɛ nee wɔ abusua ne ɛzuzu adekpakyelɛ boavolɛ gyima ne anwo. (Mrɛ. 15:22) Bie a abusua ne bahola aboa bɛ nuhua ko amaa yeayɛ adekpakyelɛ boavolɛ. Ka ɛhulolɛ mɔɔ ɛlɛ la anwo edwɛkɛ kile asafo ne anu amra, titile menli mɔɔ nee wɔ tɛnlabelɛ le ko la. Ɛhye bamaa menli dɔɔnwo anye alie adekpakyelɛ boavolɛ gyima ne anwo.
9 Mekɛ mɔɔ ɛlɛyɛ wɔ ɛzonlenlɛ gyima ne anwo ngyehyɛleɛ wɔamaa ɛzonlenlɛ ɛvolɛ fofolɛ ne la, mekɛ boni a ɛbahola wɔayɛ adekpakyelɛ boavolɛ a? Saa ɛfa mekɛ dɔɔnwo ɛyɛ gyima, anzɛɛ ɛkɔ sukulu a, ɛbahola wɔakpa siane mɔɔ ɛnwomenlelielɛ kenle wɔ nu anzɛɛ lɛ Folɛ anzɛɛ Molɛ nnu la. Kɛ neazo la, September, December, March, nee August lɛ Folɛ nnu yɛɛ Molɛ nnu. May lɛ Folɛ nnu yɛɛ June lɛ Molɛ nnu. Saa ɛlɛ kpɔkɛdelɛ nwo ngyegyelɛ a ɛbahola wɔakpa siane mɔɔ manle nu le kpalɛ la. Eza ɛbahola wɔayɛ adekpakyelɛ gyima ne wɔ siane mɔɔ maanzinli zo neavolɛ ne barakpɔla bɛ asafo ne la anu. Wɔ zɔhane mekɛ ne, ɛbanyia adenle wɔahɔ ayia mɔɔ ɔ nee dahuu adekpakyelɛma bayɛ la foa ne mɔɔ lumua la. Kɛmɔ ɛvolɛ bieko Ngakyelɛlilɛ ne bazi March 22 la ati, March, April, yɛɛ May le mekɛ kpalɛ. Saa ɛkpa siane ko anzɛɛ mɔɔ bo mɔɔ ɛkulo kɛ ɛfa ɛyɛ adekpakyelɛ boavolɛ a, bɔ ɔ bo yɛ ngyehyɛleɛ mɔɔ bamaa wɔadwu dɔnehwele mɔɔ bɛkpondɛ la anwo a.
10 Saa ɛte nganeɛ kɛ ɛnrɛhola adekpakyelɛ boavolɛ yɛ wɔ ɛzonlenlɛ ɛvolɛ ne mɔɔ ɛlɛba la anu bɔbɔ a, ɛbahola wɔayɛ dɔɔnwo wɔ daselɛlilɛ gyima ne anu. Bɔ mɔdenle yɛ mɔɔ ɛbahola la, na nyia anwodozo kɛ Gyihova anye sɔ ahonle nu mɔɔ ɛfi ɛyɛ dɔɔnwo wɔ ye ɛzonlenlɛ nu la. (Gal. 6:4) Boa menli mɔɔ ɛlɛyɛ adekpakyelɛ boavolɛ la, na wula bɛ anwosesebɛ. Ɛbahola wɔayɛ ngyehyɛleɛ wɔava kenle mɔɔ bɛfa bɛkɔ gyima la ko wɔ dapɛne ne anu ɛ nee bɛ ahɔ daselɛlilɛ.
11 Gyihova menli ze kɛ ɔwɔ kɛ bɛyɛ ninyɛne ndɛndɛ. Bɛlɛ gyima bɛyɛ—edwɛkpa ne nolobɔlɛ. Menli ngoane la esiane nu, yɛɛ mekɛ ne asɛɛ ɛwie. (1 Kɔl. 7:29-31) Ɛlɔlɛ mɔɔ yɛlɛ yɛmaa Nyamenle nee yɛ gɔnwo mɔ la baha yɛ amaa yɛayɛ dɔɔnwo wɔ ɛzonlenlɛ gyima ne anu. Saa yɛmia yɛ nwo na yɛyɛ ngyehyɛleɛ kpalɛ a, yeanyɛ boɛ fee la, yɛbahola yɛayɛ adekpakyelɛ boavolɛ siane ko wɔ ɛzonlenlɛ ɛvolɛ fofolɛ ne anu—bodane ɛhye sonle bolɛ amgba!
[Debiezukoalɛ kpuyia ne mɔ]
1. Duzu bodane a yɛbahola yɛava yɛazie yɛ nye zo wɔ ɛzonlenlɛ ɛvolɛ fofolɛ ne anu a?
2. Duzu ati a adekpakyelɛ boavolɛ le bodane kpalɛ mɔɔ ɔwɔ kɛ yɛfa yɛsie yɛ nye zo a?
3, 4. Duzu nvasoɛ a yɛnyia ye wɔ adekpakyelɛ boavolɛ ɛyɛlɛ nu a?
5. Saa yɛte nganeɛ kɛ yɛnfɛta a, duzu a ɔwɔ kɛ yɛyɛ a?
6. Kɛzi menli mɔɔ lɛ kpɔkɛdelɛ nwo ngyegyelɛ anzɛɛ ɛnlɛ mekɛ la bahola ayɛ adekpakyelɛ boavolɛ ɛ?
7. Duzu ati a ɔle kpalɛ kɛ yɛbayɛ adekpakyelɛ boavolɛ gyima ne anwo asɔne dahuu a?
8. Kɛzi edwɛkɛ mɔɔ wɔ Mrɛlɛbulɛ 15:22 mɔɔ ɛbava wɔali gyima la baboa amaa wɔayɛ adekpakyelɛ boavolɛ ɛ?
9. Siane ne mɔ boni anu a ɛbahola wɔayɛ adekpakyelɛ boavolɛ a?
10. Saa ɛnrɛhola adekpakyelɛ boavolɛ yɛ a duzu a ɛbahola wɔayɛ a?
11. Duzu ati a ɔwɔ kɛ yɛyɛ ninyɛne ndɛndɛ a?