Bɛbɔ nu Bɛzonle Gyihova kɛ Abusua
1 Wɔ Baebolo mekɛ zo, ɛnee mbusua bɔ nu yɛ ninyɛne. Bɛbɔle nu bɛyɛle sua nu gyima na ye titile ne bɛzonlenle Gyihova kɛ abusua. (Sɛlɛ. 10:12-14; Mɛla 31:12) Ɛnɛ, wɔ ɛleka dɔɔnwo ne ala, mbusua ɛnda ɛmbɔ nu ɛnyɛ ninyɛne. Noko akee, Keleseɛnema ze kɛ nvasoɛ wɔ zo kɛ mbusua kɛbɔ nu kɛyɛ ninyɛne, titile ne mɔɔ fane ɛzonlenlɛ nwo la. Nea kɛzi abusua Hyehyɛvolɛ ne anye balie saa ɔnwu kɛ mbusua ɛlɛbɔ nu azonle ye a!
2 Bɛbɔ nu Bɛhɔ Daselɛlilɛ: Saa mbusua bɔ nu ka edwɛkpa ne a, abusua koyɛlɛ ne anu mia. Ɛhye ati, ɔwɔ kɛ asafo nu kpanyinli nee asafo ne anu amra kɔ daselɛlilɛ na eza ɔ nee ɔ ye nee ɔ mra ta kɔ daselɛlilɛ. (1 Tem. 3:4, 5) Ɔnvane nwolɛ kɛ neavolɛ adenduvoma lɛ gyima dɔɔnwo la, bɛyɛ ngyehyɛleɛ bɛ nee bɛ ye mɔ kɔ daselɛlilɛ.
3 Awovolɛ mɔɔ nee bɛ mra kɔ daselɛlilɛ la kola boa bɛ maa bɛnyia anyuhɔlɛ wɔ edwɛkɛhanlɛ ne anu. Tɛ awovolɛ ne mɔ anyelielɛ nee ahunlundwolɛ wɔ ɛzonlenlɛ gyima ne anu angomekye a ngakula ne mɔ banwu ye a, na ɛlɔlɛ mɔɔ bɛ awovolɛ ne mɔ lɛ maa Gyihova nee bɛ gɔnwo mɔ la noko. (Mɛla 6:5-7) Ɔnle kɛ awovolɛ bu bɛ mra mɔɔ bɛ nee bɛ kɔ daselɛlilɛ la kɛ nwolɛ ɛngyia wɔ mekɛ mɔɔ ngakula ne mɔ ɛlɛnyi la. Agyalɛma bie mɔɔ lɛ ngakula mrenya nsa mɔɔ ɛli ɛvolɛ 15 mɔɔ kɔ 21 la ta nee bɛ mra ne mɔ bɔ nu kɔ daselɛlilɛ. Selɛ ne hanle kɛ: “Yɛkile bɛ debie fofolɛ mekɛ biala. Na yɛbɔ mɔdenle yɛmaa ɔyɛ mɔɔ wula anwosesebɛ na ɔyɛ anyelielɛ.”
4 Bɛbɔ nu Bɛziezie Bɛ Nwo: Mbusua ɛnwu kɛ nvasoɛ wɔ zo kɛ bɛbabɔ nu bɛaziezie bɛ nwo kolaa na bɛahɔ daselɛlilɛ. Saa ngakula nee abusua ne anu amra ɛlɛbɔ nu azukoa kɛzi bɛbali daselɛ, wɔ mekɛ mɔɔ bie yɛ suamenle na bie di daselɛ la a, bɛ nye die. Saa bie mɔ yɛ bɛ abusua debiezukoalɛ ne wie a bɛfa mekɛ ekyi bɛsukoa mɔɔ bɛbaha ye wɔ daselɛlilɛ nu la.
5 Saa yɛ nee yɛ alɔvolɛ bɔ nu yɛ gyima mɔɔ anwo hyia na ɔmaa ahunlundwolɛ la a, yɛ anyelielɛ yɛ kpole. Nea anyelielɛ mɔɔ ɔyɛ kɛ abusua ne kɛbɔ nu kɛyɛ sua nu nee sua nu daselɛlilɛ gyima ne, siakɔkpɔla nee Baebolo ɛzukoalɛ a! Saa ɛ nee wɔ abusua ne bɔ nu sonle Gyihova a ɛbahola wɔaha kɛ: “Mame, me nee me sua nu amra, yɛbazonle [Gyihova].”—Dwɔ. 24:15.