Asoo Ɔwɔ Kɛ Ɛdie Ɛzonlenlɛ Bie Ɛdi?

Saa ɛzonlenlɛ bie ɛmaa ɛ rɛle ɛbɔ a, ɔbayɛ se kɛ ɛbalie ɛzonlenlɛ biala wɔali. Noko nyia anwodozo kɛ ɛzonlenlɛ bie wɔ ɛkɛ mɔɔ ɔfɛta kɛ ɛnyia anwodozo wɔ nu a. Mekɛ mɔɔ Gyisɛse wɔ azɛlɛ ye azo la, ɔboɔboale ɛdoavolɛma ekpunli mɔɔ di nɔhalɛ la anloa na ɔhilele bɛ kɛ bɛva Nyamenle ngyinlazo bɛbɔ bɛ ɛbɛla. Kelaese nɔhalɛ ɛdoavolɛma—menli mɔɔ bɔ mɔdenle fa Keleseɛne ngyinlazo bɔ bɛ ɛbɛla la—tɛbɔ ɛkɛ. Ɛbanwu bɛ wɔ ni?

Estelle, mɔɔ yɛlumua yɛha ɔ nwo edwɛkɛ la ka kɛ: “Akee membɔle ɔ bo kɛ mesukoa Baebolo ne wɔ mekɛ mɔɔ me nee Gyihova Alasevolɛ zukoale debie la. Yeangyɛ biala yɛɛ mendele Dwɔn 8:32, mɔɔ kenga kɛ: ‘Bɛbanwu nɔhalɛ ne, na nɔhalɛ ne bamaa bɛanyia bɛ ti’ la abo a.”

Ray, mɔɔ yɛlumua yɛha ɔ nwo edwɛkɛ la noko ka kɛ: “Mekɛ mɔɔ me nee Gyihova Alasevolɛ zukoale Baebolo ne la, menwunle ye kɛ Nyamenle ɛnli alesama amaneɛnwunlɛ nwo ɛzonle. Me nye liele wɔ mekɛ mɔɔ menwunle ye kɛ ndelebɛbo kpalɛ bie ati a Nyamenle ɛmaa amumuyɛyɛlɛ nwo adenle kɛkala la, eza yebɔ ɛwɔkɛ kɛ ɔnrɛhyɛ ɔbaye yeavi ɛkɛ.”

Ɔda ali kɛ ɔnla aze kɛ awie bayɛ mɔɔ le kpalɛ wɔ ewiade mɔɔ menli dɔɔnwo ɛbɛla ɛzɛkye la anu. Noko yɛkola yɛyɛ zɔ. Menli dɔɔnwo hyia moalɛ amaa bɛade Baebolo ne abo na bɛava bɛabɔ bɛ ɛbɛla. Ɛhye ati a Gyihova Alasevolɛ nee menli mgbe dɔɔnwo mɔɔ wɔ ewiade ye anu la yɛ Baebolo ɛzukoalɛ mɔɔ bɛnlie ɛhwee la. Dapɛne biala, menli dɔɔnwo sukoa mɔɔ Baebolo ne kilehile amgba la. Ɔlua ɛhye ati, bɛlɛbikye bɛ Bɔvolɛ ne, na bɛanyia anyelielɛ wɔ bɛ ɛbɛlabɔlɛ nu.a

Saa ɛyia Gyihova Alasevolɛ mekɛ fofolɛ a, duzu ati a ɛmbiza bɛ deɛmɔti bɛdie bɛ ɛzonlenlɛ ne bɛdi la ɛ? Neɛnlea bɛ ngilehilelɛ nee bɛ edwɛkɛ nu. Akee si nwolɛ kpɔkɛ kɛ ɛzonlenlɛ bie wɔ ɛkɛ mɔɔ ɛbalie wɔali a.