Bɛambɔ Bɛ Ti Aze

Mɔɔ Belemgbunli Nɛbukadenɛza hanle ananze ne anwo ɛlalɛ ne wiele la anzi, ɔyɛle nvutuke ananze kpole bie. Ɔziele ye wɔ Dula azɛlɛ sɛsɛ ne azo na ɔvɛlɛle menli titili mɔɔ wɔ maanle ne anu la dɔɔnwo nee Hyeedelake, Mihyake yɛɛ Abɛdenɛgo kɛ bɛrayia ɛkɛ. Belemgbunli ne hanle kɛ: ‘Saa bɛte kɛ bɛlɛbɔ aweɛne ndendenle ne mɔ, haape yɛɛ fulutu ne mɔ a, awie biala ɛbɔ ɔ ti aze ɛmaa nvutuke ananze ne! Awie biala mɔɔ yeambɔ ɔ ti aze la, bɛbado ye wɔ fonlomo mɔɔ ɛlɛsɔ la anu.’ Asoo Hibulu mgbavolɛ nsa ne babɔ bɛ ti aze amaa ananze ne, anzɛɛ bɛbazonle Gyihova angomekye?

Akee belemgbunli ne hanle kɛ bɛbɔ edwɛne ne. Awie biala bɔle ɔ ti aze zonlenle ananze ne, Hyeedelake, Mihyake nee Abɛdenɛgo ala a bɛanyɛ a. Awie mɔ nwunle bɛ yemɔti bɛhɔbɔle belemgbunli ne amaneɛ kɛ: ‘Zɔhane Hibulu mgbavolɛ nsa ne anzonle wɔ ananze ne.’ Nɛbukadenɛza maanle bɛhɔvɛlɛle bɛ bɛrale na ɔhanle kɛ: ‘Memaa bɛ adenle bieko kɛ bɛbɔ bɛ ti aze bɛzonle ananze ne. Saa bɛanyɛ a, mebavuandi bɛ meagua fonlomo ne anu. Nyamenle biala ɛnrɛhola ɛnrɛlie bɛ ɛnrɛvi me sa nu.’ Bɛbuale kɛ: ‘Mmamaa yɛ adenle bieko. Yɛ Nyamenle ne kola die yɛ. Noko saa yeanlie yɛ bɔbɔ a, yɛnrɛzonle ananze ne.’

Nɛbukadenɛza vale ɛya kpole. Ɔhanle ɔhilele ye menli ne kɛ: ‘Bɛmaa fonlomo ne ɛlɔ kpole ɛdɛla dɛba ne fane nsuu!’ Akee ɔzele ye sogyama ne kɛ: ‘Bɛkyekye menli ɛhye mɔ na bɛvuandi bɛ bɛgua fonlomo ne anu!’ Kɛmɔ ɛnee fonlomo ne ɛlɔ kpole kpalɛ la ati, mɔɔ sogyama ne bikyele nwolɛ la, bɛwule ɛkɛ ne ala. Ɛnee Hibulu mgbavolɛ nsa ne gua senle ne anu. Noko mɔɔ Nɛbukadenɛza nleanle nu la, ɔnwunle kɛ menli nna a luolua senle ne anu a, na tɛ menli nsa ɔ. Ɛzulolɛ hanle ye na ɔbizale ye mgbanyima ne mɔ kɛ: ‘Tɛ menli nsa a yɛvuandinle bɛ yɛguale senle ne anu ɔ? Menwu menli nna, na mɔɔ tɔ zolɛ nna la zɔho anwumabɔvolɛ!’

Nɛbukadenɛza bikyele fonlomo ne anloa na ɔdeanle nu kɛ: ‘Anwuma Anwuma Nyamenle ne sonvolɛma, bɛvinde bɛrɛla!’ Mɔɔ Hyeedelake, Mihyake nee Abɛdenɛgo vi senle ne anu vindele rale mɔɔ ɛhwee anyɛ bɛ la, ɔyɛle awie biala azibɛnwo. Bɛ nwo nane, bɛ ti enrinli nee bɛ adɛladeɛ ne anyela, yɛɛ bɛ nwo bɔbɔ ambɔnle esike.

Nɛbukadenɛza hanle kɛ: ‘Hyeedelake, Mihyake nee Abɛdenɛgo Nyamenle ne lɛ tumi kpole. Ɔzoanle ye anwumabɔvolɛ ɔmaanle ɔraliele bɛ. Nyamenle biala nee bɛ ɛdeɛ ne ɛnzɛ.’

Asoo wɔbɔ kpɔkɛ kɛ ɛbali nɔhalɛ wɔamaa Gyihova ɔnva nwo edwɛkɛ biala mɔɔ bazi la kɛ mɔɔ Hibulu mgbavolɛ nsa ne yɛle la ɔ?