Belemgbunlililɛ Mɔɔ Bɛnrɛzɛkye Ye Ɛlɛ

Kenle ko nɔɔzo bie, Belemgbunli Nɛbukadenɛza hanle ɛlalɛ ɛzulolɛ bie. Ɔgyegyele ye kpalɛ yemɔti yeangola da. Ɔvɛlɛle ye ngonyiama ne na ɔzele bɛ kɛ: ‘Bɛhile me ɛlalɛ ne abo bɛhile me.’ Bɛhanle kɛ: ‘O belemgbunli, ka wɔ ɛlalɛ ne kile yɛ.’ Noko Nɛbukadenɛza hanle kɛ: ‘Kyɛkyɛ! Bɛha me ɛlalɛ ne bɛhile me, anrɛɛ mebahu bɛ.’ Eza bɛhanle bɛhilele ye bieko kɛ: ‘Ka wɔ ɛlalɛ ne kile yɛ, na yɛbahile ɔ bo.’ Belemgbunli ne hanle kɛ: ‘Bɛ muala bɛkpondɛ kɛ bɛbɛlɛbɛla me. Bɛha ɛlalɛ ne mɔɔ menganle la bɛhile me!’ Bɛzele belemgbunli ne kɛ: ‘Awie biala ɛnle ɛkɛ mɔɔ ɔbahola yeayɛ zɔ a. Mɔɔ wɔbiza la yɛ se.’

Nɛbukadenɛza vale ɛya kpole yemɔti ɔhanle kɛ bɛhu nrɛlɛbɛvolɛma mɔɔ wɔ maanle ne anu la kɔsɔɔti. Daneɛle, Hyeedelake, Mihyake yɛɛ Abɛdenɛgo boka nwo. Daneɛle zɛlɛle belemgbunli ne kɛ ɔmaa ye mekɛ ekyi. Akee ɔ nee ɔ gɔnwo mɔ yɛle asɔne na bɛzɛlɛle Gyihova kɛ ɔboa bɛ. Duzu a Gyihova yɛle a?

Gyihova yele Nɛbukadenɛza ɛlalɛ ne nee mɔɔ ɔkile la hilele Daneɛle wɔ ɛnyelɛzodeɛnwunlɛ nu. Aleɛ hyenle la, Daneɛle hɔhanle hilele belemgbunli ne sonvolɛ ne kɛ: ‘Mmaku nrɛlɛbɛvolɛma ne anu biala. Mebahola meahile belemgbunli ne ɛlalɛ ne abo.’ Sonvolɛ ne vale Daneɛle hɔle Nɛbukadenɛza ɛkɛ. Daneɛle hanle hilele belemgbunli ne kɛ: ‘Nyamenle ɛye mɔɔ bazi kenle bie la ɛhile wɔ. Wɔ ɛlalɛ ne ɛne: Ɛnwunle ananze totohyia bie mɔɔ ɔ ti le nvutuke, ɔ kɛnra nee ɔ sa ne mɔ le dwɛtɛ fufule, ɔ ko nee ye ɛzɔlɛ le kɔbele, ɔ gyakɛ le mbulalɛ, yɛɛ ɔ gyakɛ taboa ne mɔ le bulalɛ nee ndɛtɛlɛ mɔɔ ɛli afonla la. Akee bolɛ vi boka bie azo rabɔle ananze ne agyakɛ dinle ye motomoto kɛ munlutu la na anwoma ne bɔle ye hɔle. Bolɛ ne yɛle kpole kɛ boka la na ɔhedale azɛlɛ ye azo.’

Akee Daneɛle hanle kɛ: ‘Mɔɔ wɔ ɛlalɛ ne abo kile la ɛne: Wɔ belemgbunlililɛ ne a le nvutuke etile ne. Bieko mɔɔ bara la a le dwɛtɛ fufule ne. Mɔɔ tɔ zolɛ nsa la a le kɔbele ne, ɔdaye noko ɔbali tumi wɔ azɛlɛ ye amuala azo. Akee bieko mɔɔ anwo yɛ se kɛ bulalɛ la bara. Belemgbunlililɛ ne mɔɔ li awieleɛ la anu bahyɛ nwiɔ. Foa ko bayɛ se kɛ bulalɛ na foa ko ayɛ bɛtɛɛ kɛ ndɛtɛlɛ. Bolɛ ne mɔɔ yɛle kpole kɛ boka la a le Nyamenle Belemgbunlililɛ ne. Ɔbazɛkye belemgbunlililɛ ɛhye mɔ amuala na yeali tumi dahuu.’

Nɛbukadenɛza butule Daneɛle anyunlu ɛkɛ. Ɔhanle kɛ: ‘Wɔ Nyamenle ne a ɛye ɛlalɛ ɛhye ɛhilele wɔ a. Nyamenle biala nee ye ɛnzɛ.’ Nɛbukadenɛza angu Daneɛle, emomu ɔmaanle ɔyɛle amɛnladoma nee nrɛlɛbɛvolɛma mɔɔ wɔ Babelɔn la kɔsɔɔti kpanyinli. Wɔnwu kɛzi Gyihova buale Daneɛle asɔneyɛlɛ ne la ɔ?