Gyihova Zoanle Gyɛlɛmaya Kɛ Ɔhɔha Edwɛkɛ Ne

Gyihova kpale Gyɛlɛmaya kɛ ɔyɛ ngapezonli ɔmaa Dwudama. Ɔhanle ɔhilele ye kɛ ɔha edwɛkɛ ne ɔhile menli ne na ɔbɔ bɛ kɔkɔ kɛ bɛgyakyi ɛtaneyɛlɛ. Gyɛlɛmaya hanle kɛ: ‘Gyihova, mele kakula. Menrɛhola tendɛ kile menli ne.’ Gyihova hanle hilele ye kɛ: ‘Mmasulo. Mebaha mɔɔ ɔwɔ kɛ ɛka la meahile wɔ. Mebaboa wɔ.’

Gyihova hanle hilele Gyɛlɛmaya kɛ ɔhɔyia mgbanyima ne mɔ na ɔbɔ buakɛ wɔ bɛ nyunlu ɛkɛ na ɔha kɛ: ‘Kɛ bɛbazɛkye Gyɛlusalɛm la ɛne.’ Mɔɔ Gyɛlɛmaya yɛle mɔɔ Gyihova hanle la, mgbanyima ne mɔ vale ɛya kpole. Ɛsɔfo bie mɔɔ bɛfɛlɛ ye Pahyɛ la bole Gyɛlɛmaya na ɔkyekyele ye ɔbɔle baka nu. Na Gyɛlɛmaya angola andu ɔ bo nɔe ne amuala. Aleɛ hyenle la Pahyɛ yele ye. Gyɛlɛmaya hanle kɛ: ‘Menrɛhola ɛhye anloa gyinla bieko. Mebagyakyi edwɛkɛ ne ɛhanlɛ.’ Noko asoo ɔgyakyile? Kyɛkyɛ. Mɔɔ Gyɛlɛmaya dwenlenle nwolɛ bieko la, ɔhanle kɛ: ‘Gyihova edwɛkɛ ne sɔ kɛ senle la wɔ me ahonle nu na menrɛhola menrɛgyakyi ye ɛhanlɛ.’ Gyɛlɛmaya hɔle zo bɔle menli ne kɔkɔ.

Ɛvolɛ dɔɔnwo pɛle nu la Dwudama nyianle belemgbunli fofolɛ. Ɛsɔfoma nee adalɛ ngapezoma ne mɔ anye anlie Gyɛlɛmaya edwɛkɛ ne anwo. Bɛhanle bɛhilele mgbanyima ne mɔ kɛ: ‘Nrenyia ɛhye fɛta ewule.’ Na Gyɛlɛmaya hanle kɛ: ‘Saa bɛku me a, ɛnee bɛha sonla mɔɔ ɛnze nwolɛ bie la mogya bɛgua. Gyihova edwɛkɛ a meka a, tɛ me edwɛkɛ ɔ.’ Mɔɔ mgbanyima ne mɔ dele ɛhye la, bɛhanle kɛ: ‘Ɔnfɛta kɛ bɛku nrenyia ɛhye.’

Gyɛlɛmaya hɔle zo hanle edwɛkɛ ne, na mgbanyima ne mɔ vale ɛya kpole. Bɛhanle bɛhilele belemgbunli ne kɛ ɔhu Gyɛlɛmaya. Belemgbunli ne hanle kɛ bɛyɛ Gyɛlɛmaya kɛ mɔɔ bɛdabɛ bɛkulo la. Yemɔti bɛhyele Gyɛlɛmaya na bɛdwulale ye wɔ bula mɔɔ anu wale na ndɛtɛlɛ wɔ nu la anu amaa yeawu. Na ɔbɔle ɔ bo kɛ ɔmi ndɛtɛlɛ ne anu.

Belemgbunli sua nu ɛkɛ ne sonvolɛ kpanyinli bie mɔɔ bɛfɛlɛ ye Yibɛdemɛlɛke la hɔhanle hilele belemgbunli ne kɛ: ‘Mgbanyima ne mɔ ɛdwula Gyɛlɛmaya wɔ bula ne anu! Saa yɛanye ye a, ɔbawu.’ Belemgbunli ne hanle hilele Yibɛdemɛlɛke kɛ ɔva mrenyia 30 ɔboka ɔ nwo na bɛhɔye Gyɛlɛmaya bɛvi bula ne anu. Asoo ɔnle kɛ yɛyɛ kɛ Gyɛlɛmaya mɔɔ yeammaa debie biala anzi ye adenle kɛ ɔbaha edwɛkɛ ne la ɔ?