Gyɛlɛmaya Angyakyi Gyihova Anwo Edwɛkɛhanlɛ

Ɔdwu mekɛ ne bie na yɛka Gyihova anwo edwɛkɛ yɛkile menli a bɛgolo yɛ nwo anzɛɛ bɛfa yɛ nwo ɛya. Ɛhye kola maa yɛnyia adwenle kɛ yɛbagyakyi Nyamenle anwo edwɛkɛhanlɛ. Wɔde nganeɛ zɔhane ɛlɛ ɔ?— Baebolo ne ka kpavolɛ bie mɔɔ ɛnee kulo Gyihova noko asɛɛ ɔgyakyile ɔ nwo edwɛkɛhanlɛ la anwo edwɛkɛ kile yɛ. Bɛfɛlɛ ye Gyɛlɛmaya. Maa yɛzukoa ɔ nwo debie dɔɔnwo.

Mekɛ mɔɔ Gyɛlɛmaya le kpavolɛ la, Gyihova hanle hilele ye kɛ ɔwɔ kɛ ɔbɔ menli ne kɔkɔ ɔmaa bɛgyakyi ɛtaneyɛlɛ. Ɛnee ɛhye yɛ se maa Gyɛlɛmaya, yɛɛ ɛnee ɔsulo. Ɔhanle ɔhilele Gyihova kɛ: ‘Mele kakula. Me nloa ɛtɛtele.’ Na Gyihova hanle kɛ: ‘Mmasulo. Mebaboa wɔ.’

Yemɔti Gyɛlɛmaya akee bɔle menli ne kɔkɔ kɛ saa bɛangakyi a bɛbadea bɛ. Ɛdwenle kɛ menli ne yɛle mɔɔ Gyɛlɛmaya hanle la ɔ?— Kyɛkyɛ. Bɛgolole ɔ nwo anzɛɛ bɛvale ɔ nwo ɛya kpole. Ɛnee bie mɔ bɔbɔ kulo kɛ bɛku ye! Ɛnea a kɛzi Gyɛlɛmaya dele nganeɛ ɛ?— Ɛzulolɛ hanle ye na ɔhanle kɛ: ‘Menrɛha Gyihova anwo edwɛkɛ bieko.’ Noko asoo ɔgyakyile ɔ?— Kyɛkyɛ, yeangyakyi. Ɛnee ɔkulo Gyihova kpole yemɔti yeangola yeangyakyi kɛ ɔbaha ɔ nwo edwɛkɛ. Na kɛmɔ Gyɛlɛmaya angyakyi la ati, Gyihova bɔle ɔ nwo bane.

Kɛ neazo la, mekɛ bie menli bie mɔɔ ati yɛ se la dwulale Gyɛlɛmaya wɔ bula mɔɔ nuhua le ndɛtɛlɛ la anu. Ɛnee aleɛ anzɛɛ nzule biala ɛnle ɛkɛ. Ɛnee bɛkulo kɛ bɛgyakyi Gyɛlɛmaya wɔ ɛkɛ ne bɛmaa ɔwu. Noko ɔlua Gyihova moalɛ zo, bɛyele ye!

Duzu a ɛsukoa ɛfi Gyɛlɛmaya neazo ne anu a?— Ɔdwu mekɛ ne bie a ɛzulolɛ ka ye ɛdeɛ, noko yeangyakyi kɛ ɔbaha Gyihova anwo edwɛkɛ. Saa ɛka Gyihova anwo edwɛkɛ a, menli bagolo ɛ nwo anzɛɛ bɛbava ɛ nwo ɛya. Bie a ɛbaze nyiane anzɛɛ wɔazulo bɔbɔ. Noko mmagyakyi kɛ ɛbaha Gyihova anwo edwɛkɛ. Ɔbaboa wɔ dahuu, kɛmɔ ɔboale Gyɛlɛmaya la.