Kakye Lɔɔto Aye Ne

Ɛnee Lɔɔto nee ye ankele Ebileham a de Keena azɛlɛ ne azo a. Nzinlii, Ebileham nee Lɔɔto nyianle nyɛmoa dɔɔnwo, yemɔti ɛnee bɛhyia ɛleka kpole mɔɔ bɛbadidi a. Ebileham zele Lɔɔto kɛ: ‘Yɛnrɛhola yɛnrɛdɛnla ɛleka ko. Mesɛlɛ wɔ, kɔ ɛleka mɔɔ ɛkulo la. Saa ɛfa bɛne zo a, mebava fema zo.’ Ebileham anyɛ angomedi, ɔnle zɔ ɔ?

Lɔɔto kpale azɛlɛ ne ɛleka mɔɔ le kɛnlɛma na ɔbikye Sodɔm la. Ɛnee nzule nee ndile dɔɔnwo wɔ ɛkɛ. Yemɔti ɔ nee ye abusua ne dule hɔdɛnlanle ɛkɛ.

Ɛnee menli mɔɔ wɔ Sodɔm nee Gomɔla mɔɔ bikye ɛleka mɔɔ bɛde la yɛ ninyɛndane. Nɔhalɛ nu, bɛyɛle ɛtane dedee bɛmaanle Gyihova hanle kɛ ɔsɛkye azua nwiɔ ne. Noko ɛnee Nyamenle kulo kɛ ɔdie Lɔɔto nee ye abusua ne, yemɔti ɔzoanle anwumabɔvolɛma nwiɔ kɛ bɛhɔze bɛ kɛ: ‘Bɛmaa ɔyɛ ndɛ! Bɛvi sua ɛhye azo! Gyihova bazɛkye suakpole ne.’

Lɔɔto angɔ ɛkɛ ne ala. Kɛmɔ ɛnee bɛlɛtwenlehwenle bɛ bo aze la ati, anwumabɔvolɛma ne zɔle Lɔɔto nee ɔ ye yɛɛ bɛ mra mraalɛ ne mɔ asa na bɛyele bɛ bɛvile sua ne azo. Bɛhanle bɛhilele bɛ kɛ: ‘Bɛnriandi bɛlie bɛ ti ngoane! Bɛmmato bɛ nye bɛ nzi. Saa bɛto bɛ nye bɛ nzi a bɛbawu!’

Mɔɔ bɛdwule sua bie mɔɔ bɛfɛlɛ ye Zowaa la azo la, Gyihova maanle senle nee sɔlefa dɔle Sodɔm nee Gomɔla. Bɛzɛkyele azua nwiɔ ne bɔkɔɔ. Lɔɔto aye ne yɛle anzosesebɛ dole ɔ nye ɔ nzi na ɛkɛ ne ala ɔhakyile ngyenle pila! Noko Lɔɔto nee ɔ mra ne mɔ nyianle ngoane ɔluakɛ bɛdiele Gyihova. Bie a ɔyɛle bɛ nyane kɛ Lɔɔto aye ne yɛle anzosesebɛ la. Noko bɛ nye liele kɛ bɛdiele Gyihova la.