Gyekɔbo Asa Hanle Agyapadeɛ Ne

Ayezeke lile ɛvolɛ 40 la yɛɛ ɔgyale Relɛbɛka a. Ɛnee ɔkulo Relɛbɛka kpalɛ. Mekɛ hɔle bie la, bɛwole ngakula mrenyia nwiɔ​—ɛnee bɛle ndalɛ.

Bɛfɛlɛ kpanyinli ne Yisɔ yɛɛ kakula ne Gyekɔbo. Ɛnee Yisɔ kulo ɛvindelɛ yɛɛ ɛnee ɔze ɛbɔlɛ nye zo kpalɛ. Noko ɛnee Gyekɔbo ɛngulo ɛvindelɛ.

Tete ne, ɛnee saa papa wu a, bɛfa ye azɛlɛ nee ye ezukoa ne anu dɔɔnwo bɛmaa ɔ ra nrenyia kpanyinli ne. Bɛfɛlɛ ɛhye agyapadeɛ. Wɔ Ayezeke abusua nu, ɛwɔkɛ mɔɔ Gyihova bɔle Ebileham la boka agyapadeɛ ne anwo. Ɛnee ɛwɔkɛ ɛhye mɔ anwo edwɛkɛ ɛngyia Yisɔ noko ɛnee Gyekɔbo ze kɛ ɔhyia kpalɛ.

Kenle ko bie mɔɔ Yisɔ vi ɛbɔlɛlilɛ rale la ɛnee yevɛ kpalɛ. Mekɛ mɔɔ ɔdele aleɛ ne mɔɔ Gyekɔbo ɛlɛto evuanlɛ la, ɔhanle kɛ: ‘Ɛhɔne ɛlɛku me! Maa me sutulu kɔkɔlɛ ne bie.’ Gyekɔbo hanle kɛ: ‘Mebamaa wɔ bie, noko dimoa bɔ me ɛwɔkɛ kɛ wɔ agyapadeɛ ne bayɛ me ɛdeɛ.’ Yisɔ hanle kɛ: ‘Mengyia agyapadeɛ! Ɛbahola wɔava. Aleɛ a mekpondɛ meali a.’ Asoo nrɛlɛbɛ wɔ mɔɔ Yisɔ yɛle la anu? Kyɛkyɛ. Yisɔ vale debie mɔɔ hyia kpalɛ la maanle liele sutulu ala.

Mɔɔ Ayezeke yɛle ɛrelera la, ɛnee mekɛ ɛdwu kɛ ɔyila ɔ ra kpanyinli ne. Noko Relɛbɛka boale ɔ ra kakula ne maanle ɔliele nyilalɛ ne. Mɔɔ Yisɔ dele la, ɔvale ɛya na ɔhanle kɛ ɔku ɔ diema ne. Ɛnee Ayezeke nee Relɛbɛka kulo kɛ bɛbɔ Gyekɔbo anwo bane, yemɔti bɛzele ye kɛ: ‘Nriandi kɔ wɔ mame adiema Leeban anwo lɔ kɔkpula kɛ Yisɔ ɛya ne kɛha aze.’ Gyekɔbo diele bɛ folɛdulɛ ne na ɔnriandile ɔhɔle.