Kɛzi Yɛtua Yɛ Ewiade Amuala Gyima Ne Anwo Kakɛ Ɛ?

Yɛ ahyehyɛdeɛ ne yɛ Baebolo nee mbuluku gyɛne mgbe dɔɔnwo ɛvolɛ biala na ɔfa ɔmaa mɔɔ bɛndɔne ye a. Yɛsisi Belemgbunlililɛ Asalo nee ɔfese ngakyile na yɛnea zolɛ boɛ. Yɛboa Bɛtɛlema nee edwɛkpatɛlɛvolɛma apenle apenle yɛɛ yɛfa moalɛ yɛmaa wɔ esiane mekɛ nu. Yemɔti bie a ɛbabiza kɛ, ‘Kɛzi yɛnyia ezukoa yɛyɛ ɛhye mɔ kɔsɔɔti ɛ?’

Yɛnlie taete, adwule anzɛɛ collection. Kakɛ mɔɔ yɛbɔ ye wɔ edwɛkɛhanlɛ gyima ne anwo la le kpole ɛdeɛ, noko yɛnlielie ezukoa. Mɔɔ bo ɛvolɛ ɛya ko mɔɔ ɛze ɛhɔ la, Ɛzinzalɛ Arane ne mɔɔ tɔ zo nwiɔ la hanle kɛ yɛdie yɛdi kɛ Gyihova gyi yɛ nzi yemɔti “yɛnrɛzɛlɛ ɛlɛ anzɛɛ yɛnrɛkpa menli kyɛlɛ kɛ bɛboa yɛ”​—na yɛtɛyɛle zɔ ɛlɛ!​—Mateyu 10:8.

Ndoboa a yɛfa yɛyɛ yɛ gyima ne a. Menli dɔɔnwo anye die yɛ Baebolo ngilehilelɛ gyima ne anwo na bɛye ndoboa bɛboa. Alasevolɛ ne mɔ fi anyelielɛ nu fa bɛ mekɛ, bɛ anwosesebɛ, bɛ ezukoa nee ninyɛne gyɛne boa maa bɛyɛ Nyamenle ɛhulolɛdeɛ wɔ azɛlɛ ye kɔsɔɔti azo. (1 Edwɛkɛsisilɛ 29:9) Wɔ Belemgbunlililɛ Asalo nee yɛ nyianu ngyikyi yɛɛ mgbole bo, ndoboa nlɛka wɔ ɛkɛ amaa bɛdabɛ mɔɔ bɛkulo kɛ bɛye ndoboa la ayɛ zɔ. Anzɛɛ ɛbahola wɔalua yɛ wɛbsaete, jw.org azo wɔaye ndoboa. Fane dɔɔnwo ne ala, menli mɔɔ ye ndoboa la ɛnle sukoavolɛma, bɛle kɛ kunlavolɛ raalɛ ehyianli ne mɔɔ vale ngapɛlɛ nwiɔ guale ɛzonlenlɛsua ne ezukoa nlɛka ne mɔ anu mɔɔ Gyisɛse hanvole ye la. (Luku 21:1-4) Ɔti, awie biala bahola ‘aye mɔɔ yenyia ye la bie ado ahane’ kɛ ɔfa yeamaa kɛ mɔɔ “yezuzu nwo wɔ ye ahonle nu la.”​—1 Kɔlentema 16:2; 2 Kɔlentema 9:7.

Yɛdie yɛdi kɛ Gyihova bahɔ zo aha menli mɔɔ kulo kɛ fa bɛ ‘ninyɛne mɔɔ sonle bolɛ di ye eni’ la ahonle yeamaa bɛaboa Belemgbunlililɛ gyima ne, amaa ye ɛhulolɛdeɛ ayɛ ɛkɛ.​—Mrɛlɛbulɛ 3:9.

• Kɛzi yɛ ahyehyɛdeɛ ne le ngakyile fi ɛzonlenlɛ mɔɔ ɛha la anwo ɛ?

• Kɛzi bɛfa ndoboa mɔɔ bɛye la bɛdi gyima ɛ?