Kɛzi Bɛkɛlɛ Yɛ Mbuluku Ne Mɔ Na Bɛkile Ɔ Bo Ɛ?

Amaa yɛahola yɛabɔ “edwɛkpa ne” nolo yɛahile “maanle nee mbusua nee aneɛ nee menli kɔsɔɔti” la, yɛyɛ mbuluku wɔ aneɛ mɔɔ bo 900 la anu. (Yekile 14:6) Kɛzi yɛkola yɛyɛ gyima kpole ɛhye ɛ? Yɛdua kɛlɛvolɛma mɔɔ vi maanle ngakyile nu nee edwɛbohilelɛma mɔɔ bɛdu bɛ nwo bɛmaa la moalɛ zo a yɛyɛ zɔ a​—bɛ muala bɛle Gyihova Alasevolɛ.

Bɛdimoa bɛkɛlɛ edwɛkɛ ne wɔ Nrelenza nu. Neazo Eku ne nea Kɛlɛvolɛma Gyimayɛlɛleka ne mɔɔ wɔ yɛ ewiade amuala gyima ne ati la azo. Gyimayɛlɛleka ɛhye noko nea kɛlɛvolɛma mɔɔ sonle wɔ ewiade amuala gyima ne ati nee ɔfese bie mɔ anu la gyima ne azo. Kɛmɔ kɛlɛvolɛma ne vi ɛleka ngakyile la ati, ɔmaa yɛkola yɛka amaamuo biala anu edwɛkɛ na ɔmaa maanle biala anu amra anye die yɛ mbuluku ne mɔ anwo.

Bɛfa edwɛkɛ ne bɛkɔmaa edwɛbohilelɛma ne. Saa bɛneɛnlea edwɛkɛ ne anu bɛwie na bɛdie bɛto nu a, bɛfa bɛdua kɔmpita zo bɛnwa edwɛbohilelɛma ekpunli ngakyile mɔɔ wɔ ewiade amuala, mɔɔ bɛkile edwɛkɛ bo, bɛneɛnlea nu, na bɛkenga nuhua kpalɛ la. Bɛbɔ mɔdenle bɛkpondɛ “nɔhalɛ edwɛkɛ mɔɔ le pɛpɛɛpɛ” mɔɔ bamaa Nrelenza ne anu ala ɛkɛ wɔ bɛ aneɛ ne anu la.​—Nolobɔvo 12:10.

Kɔmpita maa gyima ne kɔ zo ndɛndɛ. Yɛnrɛhola yɛnrɛva kɔmpita yɛnrɛzie menli mɔɔ kɛlɛ edwɛkɛ ne nee bɛdabɛ mɔɔ bɛkile ɔ bo la agyakɛ anu. Noko saa bɛfa kɔmpita zo edwɛbohilelɛ buluku nee zolɛ ninyɛne ngakyile bɛyɛ neɛnleanu a, ɔmaa bɛ gyima ne kɔ zo ndɛndɛ. Gyihova Alasevolɛ a yɛle Multilanguage Electronic Publishing System (MEPS) ne, mɔɔ maa bɛkola bɛkile edwɛkɛ bo bɛkɔ aneɛ dɔɔnwo anu, na bɛfa nvoninli bɛboka nwo na bɛsiezie ye bɛmaa bɛpelente la a.

Duzu ati a yɛbɔ mɔdenle yɛyɛ ɛhye mɔ kɔsɔɔti, bɔbɔ wɔ aneɛ mɔɔ menli ekyi bie a ka la anu ɛ? Ɔluakɛ Gyihova kpondɛ kɛ “ɔdie menli ngakyile kɔsɔɔti na bɛnyia nɔhalɛ ne anwo nɔhalɛ ndelebɛbo.”​—1 Timote 2:3, 4.

• Adenle boni a bɛdua zo bɛkɛlɛ yɛ mbuluku ne mɔ a?

• Duzu ati a yɛkile yɛ mbuluku ne mɔ abo yɛkɔ aneɛ dɔɔnwo anu ɛ?