Kɛzi Yɛtua Yɛ Ɛzonlenlɛ Gyima Ne Anwo Kakɛ Ɛ?

Ɛvolɛ biala, yɛpelente Baebolo nee mbuluku mgbe dɔɔnwo na yɛfa yɛmaa awie mɔ. Yɛsi azua na yɛnea ɔfese dɔɔnwo nee ɛleka mɔɔ bɛpelente mbuluku ne mɔ mɔɔ wɔ ewiade amuala la azo. Asafo dɔɔnwo yia ɛleka ngɛnlɛma mɔɔ bɛfɛlɛ ye Belemgbunlililɛ Asalo la anu na bɛsonle. Nwane a tua ɛhye mɔ kɔsɔɔti anwo kakɛ a?

Ndoboa mɔɔ bɛfi ahonle nu bɛye la a yɛfa yɛtua yɛ gyima ne anwo kakɛ a. (2 Kɔlentema 9:7) Wɔ 1879, magazine ɛhye mɔɔ tɔ zo nwiɔ la hanle kɛ: “‘Zion’s Watch Tower’ [duma mɔɔ ɛnee bɛfa bɛfɛlɛ magazine ɛhye la] se, yɛdie yɛdi kɛ GYIHOVA a gyi ɔ nzi a zɔhane ati ɔnrɛzɛlɛ anzɛɛ ɔnrɛkpa menli kyɛlɛ kɛ bɛboa ye.” Yɛtɛkakyile ngyehyɛleɛ ɛhye.

Bɛfa ndoboa ne mɔ bɛnwa yɛ ɔfese ne mɔ anzɛɛ bɛfa bɛto ndoboa ɛlɛka mɔɔ gyi yɛ Belemgbunlililɛ Asalo ɛkɛ ne la ko anu. Noko yɛnlie ɛkpɔ ko ngyɛnu bulu, yɛnlielie ezukoa, anzɛɛ yɛmmaa bɛndua gyima mɔɔ yɛyɛ anzɛɛ yɛ mbuluku ne mɔ anwo kakɛ. Bɛndua yɛ kakɛ na yɛaha edwɛkɛ ne, yɛahilehile wɔ asafo ne anu anzɛɛ yɛaboa yɛamaa bɛasisi azua mɔɔ yɛsonle nu la. Gyisɛse hanle kɛ: ‘Bɛnyia ye mgbane, bɛva bɛmaa mgbane mɔɔ bɛnlie ɛhwee a.’ (Mateyu 10:8) Bɛndua azonvolɛ mɔɔ yɛ gyima wɔ yɛ ɔfese ne mɔ anu yɛɛ yɛ ewiade amuala gyima ne ati, mɔɔ Gyihova Alasevolɛ Neazo Eku ne anu amra boka nwo la kakɛ.

Eza yɛfa ndoboa mɔɔ yɛye la yɛboa wɔ mekɛ mɔɔ esiane kɛzi la. Ɛnee alimoa Kilisienema anye die kɛ bɛbaboa bɛ mediema mɔɔ anwo ɛhyele bɛ la. (Wulomuma 15:26) Yɛdayɛ noko yɛboa mɔɔ ɛlɛnwu amaneɛ la ɔlua bɛ azua nee ɛleka mɔɔ bɛsonle mɔɔ yɛsi yɛmaa bɛ la. Eza yɛmaa bɛ aleɛ, adɛladeɛ nee nyile.