Foa 2
Azɛlɛ Mɔɔ Amaneɛnwunlɛ Ɛnle Zo
1, 2. Adwenle ngakyile boni a menli bie mɔ lɛ a?
NOKO akee, menli mɔɔ wɔ ewiade la anu mgbe dɔɔnwo bie lɛ adwenle ngakyile. Bɛnwu kɛ kenlebie alesama banyia asetɛnla mɔɔ yɛ anyelielɛ. Bɛse ɔnrɛhyɛ amaneɛnwunlɛ nee amumuyɛ kɔsɔɔti bavi azɛlɛ ye azo. Bɛlɛ anwodozo kɛ ɔnrɛhyɛ ninyɛndane kɔsɔɔti bavi ɛkɛ na bɛava ewiade fofolɛ bɛazie ɛkɛ. Bɛkile bɔbɔ kɛ bɛlɛto ewiade fofolɛ ɛhye adiabo ɛnɛ!
2 Menli ɛhye mɔ die di kɛ konle, atisesebɛyɛlɛ, ɛtanelilɛ, nzisi, nee ehyia ɛnrɛdɛnla ewiade fofolɛ ne anu. Ɔbayɛ ewiade mɔɔ anwodolɛ, alɔbɔlɛlilɛ, ɛzunlɛ, nee ewule ɛnle nu a. Wɔ zɔhane mekɛ ne, menli bali munli na badɛnla aze anyelielɛ nu dahuu wɔ paladaese azɛlɛ zo. Bɛbadwazo mɔwuamra bɔbɔ bɛavi ewule nu na bɛanyia nwolɛ adenle bɛadɛnla azɛlɛ ye azo dahuu!
3, 4. Duzu ati a menli zɛhae mɔ lɛ bɛ diedi ne anu anwodozo a?
3 Asoo zɛhae adwenle mɔɔ menli lɛ ye wɔ mɔɔ bara kenlebie anwo la le ɛlalɛ anzɛɛ adwenle nzuzulɛ mgbane ala? Kyɛkyɛ, ɔnle zɔ fee. Ɔle diedi mɔɔ si pi mɔɔ yemɔ a le kɛ, kɛ ɔde ye biala la Paladaese ne bara. (Hibuluma 11:1) Duzu ati a bɛlɛ anwodozo zɛhae a? Ɔluakɛ maanzaleɛ Bɔvolɛ kpole ne a ɛbɔ ɛwɔkɛ ɛhye a.
4 Baebolo ne ka Nyamenle ɛwɔkɛ ne mɔ anwo edwɛkɛ kɛ: “[Gyihova] bɛ Nyamenle ne ɛva ninyɛne kpalɛ ne mɔɔ ɔvale ɔbɔle bɛ ɛwɔkɛ la ɛmaa bɛ. Ɛwɔkɛ biala mɔɔ ɔbɔle la yeli zolɛ; kokye anga nu.” “Nyamenle ɛnle kɛ sonla na yeabɔ adalɛ . . . Ye ɛwɔkɛ biala, ɔdi zo; Ɔka, na ɔyɛ zɔ.” “Tumivolɛ [Gyihova] ɛha ndane kɛ, ‘Kɛmɔ mehyehyɛ la, zɔhane ala a ɔbayɛ a, yɛɛ kɛmɔ mezuzu la, zɔhane ala a ɔbagyinla a.’”—Dwɔhyua 23:14; Ɛdianlɛ 23:19; Ayezaya 14:24.
5. Kpuyia boni mɔ a ɔwɔ kɛ yɛnyia nwolɛ mualɛ a?
5 Noko, saa ɛnee ɔle Nyamenle atiakunlukpɔkɛ kɛ ɔbamaa azɛlɛ ye ayɛ paladaese mɔɔ amaneɛnwunlɛ ɛnle zo a, ɛnee duzu ati a ɔmanle ninyɛndane nwo adenle a? Duzu ati a yehendɛ toonwo ɛvolɛ apenle nsia kolaa na yeayɛ nwolɛ debie a? Asoo amaneɛnwunlɛ mɔɔ ɛhɔ zo wɔ zɔhane ɛvoya ne mɔ anu la kile kɛ Nyamenle ɛndwenle yɛ nwo anzɛɛ ɔnle ɛkɛ ɔ?