Nyamenle Agɔnwo Mɔ Badɛnla Paladaese

Paladaese ɛnrɛyɛ kɛ ewiade ne mɔɔ yɛde nu kɛkala la. Ɛnee Nyamenle ɛngulo kɛ ngyegyelɛ nee alɔbɔlɛ, nyane yɛɛ amaneɛnwunlɛ babu azɛlɛ ye azo. Nyamenle bamaa azɛlɛ ne ayɛ paladaese kenle bie. Kɛzi Paladaese bayɛ ɛ? Maa yɛnlea mɔɔ Baebolo ne ka la:

Menli mgbalɛ. Paladaese bayɛ Nyamenle agɔnwo mɔ sua nu. Bɛbayɛ ninyɛne mgbalɛ bɛamaa bɛ nwo. Bɛbava Nyamenle tenlene ndenle ne mɔ bɛabɔ bɛ ɛbɛla.​—Mrɛlɛbulɛ 2:21.

Aleɛ babu. Ɛhɔne ɛnrɛra Paladaese. Baebolo ne se: “Aleɛ [babu] azɛlɛ ne azo.”​—Edwɛndolɛ 72:16.

Azua mgbalɛ nee gyima mɔɔ anyelielɛ wɔ nu. Wɔ Paladaese azɛlɛ ne azo, abusua biala banyia ɔ ti anwo awuke. Awie biala bayɛ gyima mɔɔ bamaa ɔ nye alie kpalɛ a.​—Ayezaya 65:21-23.

Anzodwolɛ bara ewiade amuala. Menli ɛnrɛho na bɛawu wɔ konle nu bieko. Nyamenle Edwɛkɛ ne se: “[Nyamenle maa] bɛgyakyi konle.”​—Edwɛndolɛ 46:8, 9.

Kpɔkɛdelɛ kpalɛ. Baebolo ne bɔ ɛwɔkɛ kɛ: “Awie biala [mɔɔ wɔ Paladaese] la ɛnrɛha kɛ: ‘Me nwo ɛdo me.’” (Ayezaya 33:24) Eza noko, awie biala ɛnrɛyɛ abubura anzɛɛ anyezinlira yɛɛ anzondilira anzɛɛ mumule.​—Ayezaya 35:5, 6.

Nyane, alɔbɔlɛ, nee ewule bara awieleɛ. Nyamenle Edwɛkɛ ne se: “Ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko. Alimoa ninyɛne ne ɛpɛ nu.”​—Yekile 21:4.

Ɛtanevolɛma bavi ɛkɛ. Gyihova ɛbɔ ɛwɔkɛ kɛ: “Bɛbaye amumuyɛma bɛavi azɛlɛ ne azo; na bɛadu nguzima bɛavi zolɛ.”​—Mrɛlɛbulɛ. 2:22.

Menli bahulo bɛ nwo na bɛahile ɛbulɛ bɛamaa awie mɔ. Nzisi, anyebolo, yɛɛ ɛkpɔlɛ bavi ɛkɛ. Menli babɔ nuhua adɛnla kɛ mɔɔ Nyamenle tenlene ndenle ne mɔ kile la.​—Ayezaya 26:9.