Foa 1
Asoo Nyamenle Dwenle Yɛ Nwo Amgba?
1, 2. Nyamenle anwo kpuyia boni a menli biza a, na duzu ati ɔ?
BIE a wɔbiza ɛ nwo ɛlɛ kɛ: ‘Saa Nyamenle bie mɔɔ dwenle yɛ nwo amgba la wɔ ɛkɛ a, ɛnee duzu ati a yemaa amaneɛnwunlɛ dɔɔnwo nwo adenle a?’ Yɛ muala yɛnwu amaneɛ ɛlɛ anzɛɛ yɛze awie mɔɔ ɛnwu bie a.
2 Nɔhalɛ nu, ɔbɔ ye tete ne toonwo mɔɔ ba la konle, atisesebɛyɛlɛ, ɛtanelilɛ, nzisi, ehyia, anwodolɛ, yɛɛ alɔvolɛ mɔɔ bɛwu la ɛmaa menli ɛnwu amaneɛ na bɛli nyane kpole. Wɔ ɛvoya 20 ne angome anu, menli mɔɔ bo mgbe 100 la wule wɔ konle nu. Bɛbodɛbodale menli mgbe dɔɔnwo na bie mɔ ɛminli bɛ awuke nee bɛ anwonyia. Ninyɛndane dɔɔnwo ɛsisi yɛ mekɛ ye anu yemaa menli ɛli nyane kpole, ɛzu dɔɔnwo, na bɛde nganeɛ kɛ bɛnlɛ anyelazo biala.
3, 4. Kɛzi menli dɔɔnwo te nganeɛ wɔ amaneɛnwunlɛ mɔɔ Nyamenle ɛmaa nwolɛ adenle la anwo ɛ?
3 Bie mɔ di nyane na bɛte nganeɛ kɛ saa Nyamenle wɔ ɛkɛ ne bɔbɔ a, ɔndwenle yɛ nwo. Bɛsuzu bɔbɔ kɛ Nyamenle ɛnle ɛkɛ ne kolaa. Kɛ neazo la, nrenya ko mɔɔ ɔlua mbusua avinli konle ti ɔ gɔnwo mɔ nee ye mbusua wule wɔ Ewiade Konle I anu la bizale kɛ: “Nienwu a ɛnee Nyamenle wɔ wɔ mekɛ mɔɔ ɛnee yɛhyia ɔ nwo la ɛ?” Awie noko mɔɔ nyianle ɔ ti wɔ mekɛ mɔɔ Nazima huhunle menli mgbe dɔɔnwo wɔ Ewiade Konle II ne anu la lile amaneɛ mɔɔ menli nwunle ye la anwo nyane kpole na ɔhanle kɛ: “Saa ɛkola wɔatafe me ahonle nwo a, anrɛɛ nuhua bɔlɔ bahu wɔ.”
4 Ɔlua ɛhye ati, menli dɔɔnwo ɛnde deɛ mɔɔ ɔti Nyamenle mɔɔ yɛ ninyɛne kpalɛ la maa ninyɛndane nwo adenle a. Yemɔti bɛnnwu ye saa ɔdwenle yɛ nwo amgba anzɛɛ ɔwɔ ɛkɛ ne bɔbɔ a. Na bɛ nuhua dɔɔnwo te nganeɛ kɛ yɛbahɔ zo yɛanwu amaneɛ dahuu.
[Nvoninli wɔ mukelɛ 2, 3]
Asoo ewiade fofolɛ bie mɔɔ amaneɛnwunlɛ ɛnle nu la ɛbikye?