Kɛzi Gyisɛse Die Ngoane Ɛ?
Baebolo ne bua kɛ
Gyisɛse liele alesama mɔɔ bɛdi nɔhalɛ la wɔ mekɛ mɔɔ ɔvale ye ngoane ɔbɔle ɛkpɔnedeɛ afɔle la. (Mateyu 20:28) Ɔti, Baebolo ne fɛlɛ Gyisɛse kɛ “ewiade ne Ngoanedievolɛ.” (1 Dwɔn 4:14) Eza ɔka kɛ: “Ngoanelielɛ ɛnrɛlua awie gyɛne biala anwo zo ɛnrɛra, ɔluakɛ duma bieko ɛnle aleɛabo mɔɔ yɛbalua zo yɛanyia ngoane a.”—Gyima ne 4:12.
Gyisɛse ‘zɔle ewule nleanle maanle menli kɔsɔɔti’ mɔɔ banyia diedi wɔ ye nu la. (Hibuluma 2:9; Dwɔn 3:16) Yemɔ anzi, “Nyamenle dwazole ye vile mowuamra anu,” na Gyisɛse ziale hɔle anwuma kɛ sunsum nu sonla. (Gyima ne 3:15) Wɔ ɛkɛ ne, Gyisɛse kola die “bɛdabɛ mɔɔ bɛdua ɔ nwo zo bɛbikye Nyamenle la bɔkɔɔ, ɔluakɛ ɔde aze dahuu mɔɔ ɔbazɛlɛ yeamaa bɛ a.”—Hibuluma 7:25.
Duzu ati a ɔwɔ kɛ Gyisɛse sɛlɛ maa yɛ a?
Yɛ muala yɛle ɛtanevolɛma. (Wulomuma 3:23) Ɛtane ɛmmaa yɛmbikye Nyamenle yɛɛ ɔmaa yɛwu. (Wulomuma 6:23) Noko Gyisɛse le “kamaavolɛ” maa bɛdabɛ mɔɔ bɛlɛ diedi wɔ ye ɛkpɔnedeɛ afɔle ne anu la. (1 Dwɔn 2:1, ɔbodwɛkɛ) Ɔsɛlɛ ɔmaa bɛ kɛ Nyamenle ɛdie bɛ asɔneyɛlɛ na ɔlua Gyisɛse ewule afɔlebɔlɛ ne azo ɔva bɛ ɛtane ɔhyɛ bɛ. (Mateyu 1:21; Wulomuma 8:34) Nyamenle tie Gyisɛse asɔneyɛlɛ ne ɔluakɛ ɔ nee Ye ɛhulolɛdeɛ yia. Nyamenle zoanle Gyisɛse wɔ azɛlɛ ye azo amaa ɔlua ‘ɔ nwo zo bɛalie ewiade ne ngoane.’—Dwɔn 3:17.
Yɛnyia diedi wɔ Gyisɛse anu ala a yɛbanyia ngoane ɔ?
Kyɛkyɛ. Ɔwɔ nuhua kɛ ɔwɔ kɛ yɛnyia diedi wɔ Gyisɛse anu amaa yɛanyia ngoane ɛdeɛ, noko dɔɔnwo wɔ ɛkɛ mɔɔ ɔwɔ kɛ yɛyɛ a. (Gyima ne 16:30, 31) Baebolo ne ka kɛ: “Kɛ mɔɔ sonlabaka mɔɔ sunsum ɛnle nu ɛwu la, zɔhane ala a diedi mɔɔ gyima ɛmboka nwo la le wulera a.” (Gyemise 2:26) Amaa yɛanyia ngoane la, ɔwɔ kɛ:
Yɛsukoa Gyisɛse nee ɔ Ze Gyihova anwo debie.—Dwɔn 17:3.
Yɛnyia diedi wɔ bɛ nu.—Dwɔn 12:44; 14:1.
Yɛdi bɛ mɛla zo yɛfa yɛda yɛ diedi ne ali. (Luku 6:46; 1 Dwɔn 2:17) Gyisɛse hilehilele kɛ tɛ awie biala mɔɔ kɛvɛlɛ ye kɛ “Awulae” la a banyia ngoane a, emomu mɔɔ “ɔyɛ mɔɔ [ɔ] Ze mɔɔ wɔ anwuma la kulo la.”—Mateyu 7:21.
Yɛkɔ zo yɛda yɛ diedi ali ɔnva nwo ngyegyelɛ mɔɔ yɛyia la. Gyisɛse maanle ɛhye lale ali wɔ mekɛ mɔɔ ɔhanle kɛ: “Mɔɔ kɛgyinla nu kɛhɔ awieleɛ la bɛbalie ye ngoane.”—Mateyu 24:13.