Asoo Baebolo Ne Kilehile Kɛ ‘Bɛdie Wɔ Ko Ala A Ɛnee Yewie Ɔ’?
Baebolo Ne Mualɛ
Kyɛkyɛ, ɔngilehile kɛ bɛdie wɔ ko ala a ɛnee yewie. Awie mɔɔ ɛlua Gyisɛse Kelaese anwo zo ɛnyia diedi la bahola aminli ye diedi nee ye ngoane ne. Baebolo ne ka kɛ yɛbanyia diedi a ɔhyia mɔdenlebɔlɛ, ɔwɔ kɛ ‘yɛsi yɛ ahonle yɛko.’ (Dwuudu 3, 5) Bɛhanle bɛhilele alimoa Kilisienema mɔɔ ɛnee bɛlie Kelaese la kɛ: “Bɛva ɛzulolɛ nee anwowozolɛ bɛli bɛ ngoanelielɛ ne anwo gyima bɛhɔ awieleɛ.”—Felepaema 2:12.
Baebolo ngyɛnu mɔɔ kile kɛ ‘bɛdie wɔ ala a ɛnee ɔtɛwiele la’
Baebolo ne bɔ yɛ kɔkɔ wɔ ɛtane mgbole mɔɔ awie yɛ a ɔnrɛnyia Nyamenle Belemgbunlililɛ ne la anwo. (1 Kɔlentema 6:9-11; Galeehyeama 5:19-21) Saa bɛdie yɛ ko ala a ɛnee yewie a anrɛɛ nvasoɛ ɛnle kɔkɔbɔlɛ ɛhye azo. Emomu, Baebolo ne kile kɛ awie mɔɔ bɛlie ye la bahola azia ahɔyɛ ɛtane kpole. Kɛ neazo la, Hibuluma 10:26 ka kɛ: “Ɔluakɛ kɛkala mɔɔ yɛnwu nɔhalɛ ne la, saa yɛ nye fuu yɛkɔ zolɛ yɛyɛ ɛtane a, [afɔlebɔlɛ] bieko ɛnle ɛkɛ mɔɔ kɛhola kɛye yɛ ɛtane ne mɔ a.”—Hibuluma 6:4-6; 2 Pita 2:20-22.
Gyisɛse zile kɛzi diedi mɔɔ awie banyia anwo hyia la azo ɔlua vanye baka nee ye ngane mɔɔ ɔvale ɔtotole ɔdaye nee ye ɛdoavolɛ ne mɔ anwo la azo. Bie da ye ali kɛ ɔlɛ diedi wɔ ye nu ɔlua ma mɔɔ ɔso anzɛɛ ye nyɛleɛ zo, noko akee nzinlii ɔnyɛ zɔ bieko na “bɛfuandi ye bɛto kɛ baka ɛhane mɔɔ bɛpɛ la” na bɛminli bɛ ngoane. (Dwɔn 15:1-6) Ɛzoanvolɛ Pɔɔlo yɛle ndonwo mɔɔ zɔho ɛhye la, ɔhanle ɔhilele Kilisienema mɔɔ bɛgyakyile bɛ diedi nu la kɛ “ɔbakpanekpane bɛdabɛ noko yeagua.”—Wulomuma 11:17-22.
Bɛze Kilisienema kɛ “bɛzinza.” (Mateyu 24:42; 25:13) Bɛdabɛ mɔɔ bɛdafe wɔ sunsum nu, bie a bɛyɛ “awozinli nu nyɛleɛ” anzɛɛ bɛnyɛ gyima mɔɔ Gyisɛse zele bɛ kɛ bɛyɛ la, ɛnrɛnyia ngoane.—Wulomuma 13:11-13; Yekile 3:1-3.
Ngɛlɛlera dɔɔnwo da ye ali kɛ ɔwɔ kɛ menli mɔɔ bɛlie bɛ la kɔ zo nyia diedi kɔdwu awieleɛ. (Mateyu 24:13; Hibuluma 10:36; 12:2, 3; Yekile 2:10) Alimoa Kilisienema lale anyelielɛ ali mekɛ mɔɔ bɛdele kɛ bɛ gɔnwo mɔ diedima gyi bɛ diedi nu kpundii la. (1 Tɛsalonaekama 1:2, 3; 3 Dwɔn 3, 4) Saa menli mɔɔ angyinla bɛ diedi nu la banyia ngoane a, asoo anrɛɛ nrɛlɛbɛ wɔ nu kɛ Baebolo ne bazi diedi mɔɔ yɛgyinla nu la azo ɔ?
Mekɛ mɔɔ Pɔɔlo nwunle kɛ ɔnrɛhyɛ na yeawu la yɛɛ ɔhanle kɛ ɔbanyia ngoane a. (2 Temɔte 4:6-8) Alimoa ne, ɔliele ɔdole nu kɛ saa ɔdi nwonane nu atiakunluwɔzo nzi a ɔnrɛnyia ngoane. Ɔhɛlɛle kɛ: “Mebɔ mɔdenle mesɔ me nwo na megyinla me ti koonwu medie abotokuma kpalɛ, amaa mame mɔɔ mebɔ edwɛkɛ ne nolo la meandɔ sinli wɔ sɔnea ne anu.”—1 Kɔlentema 9:27; Felepaema 3:12-14.