MGBAVOLƐ NEE MBƐLƐRA BIZA KƐ
Kɛ Ɔkɛyɛ Na Meade Me Ɛvɛlɛ Zo Ɛ?
Asoo ɛta ɛte ɛvɛlɛ nganeɛ? Saa ɔle zɔ a, edwɛkɛ ɛhye baboa wɔ!
Deɛmɔti ɔba ye zɔ la
Gyima dɔɔnwo ɛyɛlɛ. Bɛlɛra bie mɔɔ bɛfɛlɛ ye Julie la ka kɛ, “Wɔ debie biala ɛyɛlɛ nu, bɛka bɛkile yɛ kɛ yɛbɔ mɔdenle, yɛnyia anyuhɔlɛ, yɛva bodane mgbole yɛzie yɛ nye zo na yɛpele yɛdwu nwo. Ɔnla aze kɛ yɛbagyinla ɛpiepianlɛ ɛhye anloa!”
Ɛlɛtɔlɔnek ninyɛne. Ɛnɛ, yɛfa ɛlɛtɔlɔnek ninyɛne yɛdi gyima dɔnehwele biala wɔ alehyenlɛ ko biala anu—nɔhalɛ nu, ɛhye kola maa yɛfɛ.
Nafelɛ mɔɔ bɛnyia bɛnla. Bɛlɛra bie mɔɔ bɛfɛlɛ ye Miranda la ka kɛ, “Ɔlua sukulu, gyima nee nwɔhoalilɛ ti, mgbavolɛ nee mbɛlɛra dɔɔnwo dwazo ndɛ yɛɛ bɛnla ndɛ. Ɛhye ɛmboa bɛ, noko ɛbaha kɛ ɔnlɛ ye sɔbelɛ biala. Ɛhye maa bɛfɛ.
Deɛmɔti ɔhyia la
Baebolo ne ka kɛ yɛyɛ gyima ɛsesebɛ. (Mrɛlɛbulɛ 6:6-8; Wulomuma 12:11) Noko ɔnga kɛ ɛhu ɛ nwo ɛyɛ gyima too ɛmaa ɔha ninyɛne gyɛne mɔɔ ɛyɛ wɔ ɛbɛlabɔlɛ nu nee wɔ kpɔkɛdelɛ.
“Mekɛ bie, menwunle ye kɛ meanli aleɛ wɔ kenle ne anu ɔluakɛ ɛnee me adwenle wɔ gyima mɔɔ melɛyɛ la azo somaa. Menzukoale kɛ ɔnle kpalɛ kɛ mebalie gyima dɔɔnwo meagua me nwo zo—wɔ mekɛ mɔɔ ɔbagyegye me kpɔkɛdelɛ la.”—Ashley.
Debie kpalɛ bie ati a, Baebolo ne ka kɛ: “Twea anyewɔzo tɛla awenade funli” la. (Nolobɔvo ne 9:4) Saa ɛku ɛ nwo ɛvɛlɛ a bie a ɔbamaa wɔade nganeɛ kɛ ɛlɛ anwosesebɛ kɛ awenade la wɔ mekɛ ɛkyi bie anu. Noko saa ɛta ɛfɛ a, ɔbahola yeamaa wɔanyia kpɔkɛdelɛ nu ngyegyelɛ.
Mɔɔ ɛbahola wɔayɛ la
Mmadie gyima dɔɔnwo ɛgua ɛ nwo zo. Baebolo ne ka kɛ: “Mɔɔ le bɛlɛvo la nwu nrɛlɛbɛ.” (Mrɛlɛbulɛ 11:2) Menli mɔɔ le bɛlɛvo la nwu mɔɔ bɛbahola ye yɛ la na bɛnyɛ mɔɔ bɛnrɛhola ye yɛ la.
“Debie ko mɔɔ maa menli dɔɔnwo fɛ la a le kɛ bɛngola bɛnga kyɛkyɛ, bɛyɛ gyima biala mɔɔ bɛfa bɛmaa bɛ la. Ɛhye ɛngile mɛlɛbɛnwoaze. Yɛɛ ɔngyɛ ɛnee yemaa bɛvɛ.”—Jordan.
Nyia mekɛ dɔɔnwo die ɛ menle. Baebolo ne ka kɛ: “Ɔle kpalɛ kɛ ɛkɛnyia ekyi na ɛkɛnyia anzonudwolɛ tɛla kɛ ɛkɛva ɛ sa nwiɔ ɛkɛhu ɛ nwo ɛvɛlɛ na ɛkɛpele kɛ ɛkye anwoma.” (Nolobɔvo ne 4:6) Bɛka kɛ nafelɛ le “adwenle ne aleɛ.” Noko mgbavolɛ nee mbɛlɛra dɔɔnwo ɛngola ɛnva dɔnehwele mɔtwɛ mɔɔ kɔ bulu la ɛnla kenle ko biala.
“Saa gyima bu me kɔme a, ɔmmaa mennyia mekɛ dɔɔnwo menla. Noko saa menvale zɔhane dɔnehwele ne menlale a anrɛɛ ɔbamaa meanyia anwosesebɛ wɔ alehyenlɛ ne anu na me nye alie”—Brooklyn.
Yɛ ngyehyɛleɛ. Baebolo ne ka kɛ: “Sonla mɔɔ anye bolo ye gyima nwo la adwenle ngyehyɛlɛ maa ɔnyia aleɛ dɔɔnwo.” (Mrɛlɛbulɛ 21:5) Saa ɛfa wɔ mekɛ ɛdi gyima kpalɛ a, wɔ wɔ ngoane mekɛ kɔsɔɔti anu ɔbaboa wɔ.
“Saa ɛyɛ ngyehyɛleɛ kpalɛ a ɛbahola wɔade wɔ ɛvɛlɛ zo. Saa ɛkɛlɛ wɔ ngyehyɛleɛ ne a ɔmmaa ɔnyɛ se kɛ ɛbanwu ɛleka mɔɔ ɔwɔ kɛ ɛyɛ nzenzaleɛ na wɔanvɛ la.”—Vanessa.