Asoo Mɛle Le Nyamenle Mame?

Baebolo ne bua kɛ

Kyɛkyɛ, Baebolo ne ɛngilehile kɛ Mɛle le Nyamenle mame yɛɛ ɔnga kɛ Kilisienema ɛzonle ye anzɛɛ bɛli ye eni.a Suzu ɛhye anwo:

Mɛle anga ye ɛlɛ kɛ ɔle Nyamenle mame. Baebolo ne kilehile kɛ ɔwole “Nyamenle Ara ne” na tɛ Nyamenle mumua ne.—Maake 1:1; Luku 1:32.
Gyisɛse Kelaese anga ye ɛlɛ kɛ Mɛle le Nyamenle mame anzɛɛ ɔfɛta ɛzonlenlɛ titili bie. Nɔhalɛ nu, ɔdenrɛdenrɛle raalɛ bie mɔɔ vale ye adwenle ziele nwolɛ adenle mɔɔ Mɛle lɛ ye kɛ ye mame la azo. Ɔhanle kɛ: “Kyɛkyɛ, emomu, anyelielɛ a le bɛdabɛ mɔɔ bɛtie Nyamenle edwɛkɛ ne na bɛdi zo la!”—Luku 11:27, 28.
Edwɛkɛ agbɔkɛ “Nyamenle Mame” nee “Theotokos” (Nyamenle ɔ nli) ɛnle Baebolo ne anu.
Baebolo ne ɛnva edwɛkɛ “Anwomanyunlu Belemgbunli Raalɛ” ɛnvɛlɛ Mɛle, emomu ɔfa ɔfɛlɛ bozonle raalɛ bie mɔɔ ɛnee Yizilayɛma mɔɔ ɛkpɔkye la sonle ye la. (Gyɛlɛmaya 44:15-19) Bie a “Anwomanyunlu Belemgbunli Raalɛ” ne a le Babelonia bozonle raalɛ Ishtar (Astarte).
Alimoa Kilisienema anzonle Mɛle yɛɛ bɛanva enililɛ titili bie bɛammaa ye. Tetedwɛkɛ kɛlɛvolɛ bie ka kɛ alimoa Kilisienema “kpole kɛ bɛbazonle Mɛle yɛɛ bie a bɛzulole kɛ saa bɛtwe adwenle bɛkɔ ɔ nwo zo a ɔbahile kɛ bɛlɛsonle bozonle.”—In Quest of the Jewish Mary.
Baebolo ne ka kɛ Nyamenle wɔ ɛkɛ ne dahuu. (Edwɛndolɛ 90:1, 2; Ayezaya 40:28) Kɛmɔ ɔnlɛ mɔlebɛbo la ati ɔnrɛhola ɔnrɛnyia mame. Bieko, Mɛle ɛnrɛhola ɛnrɛnrenzɛ Nyamenle, Baebolo ne maa ɔda ali kɛ anwuma nehane bɔbɔ le ekyi maa ye.—1 Arelemgbunli 8:27.

Mɛle le Gyisɛse mame na tɛ “Nyamenle mame”

Ɛnee Mɛle le Dwuunli yɛɛ ɔvi Belemgbunli Devidi abusua nu. (Luku 3:23-31) Ye diedi nee ye anwofamaa ti Nyamenle hulole ye edwɛkɛ. (Luku 1:28) Nyamenle kpale ye kɛ ɔyɛ Gyisɛse mame. (Luku 1:31, 35) Mɛle nee ɔ hu Dwosefi wole mralɛ gyɛne.—Maake 6:3.

Ɔwɔ nuhua kɛ Baebolo ne maa ɔda ali kɛ Mɛle rayɛle Gyisɛse ɛdoavolɛ ɛdeɛ, noko ɔnga ɔ nwo edwɛkɛ dɔɔnwo.—Gyima ne 1:14.

Duzu ati a bie mɔ ka kɛ Mɛle le Nyamenle mame a?

Menli bɔle ɔ bo kɛ bɛsonle Mɛle wɔ ɛvoya mɔɔ tɔ zo nna ne awieleɛ. Kateleke asɔne ne rayɛle ɛzonlenlɛ titili wɔ maanle maanle mɔɔ Wulomu sie bɛ la anu. Ɛhye maanle menli dɔɔnwo mɔɔ ɛnee bɛsonle awozonle la rayɛle Kilisienema. Asɔne ne noko liele Nsa-Ko ngilehilelɛ ne mɔɔ ɛngyi ngɛlɛlera ne azo la dole nu.

Nsa-Ko ngilehilelɛ ne maanle menli dɔɔnwo liele dole nu kɛ saa Gyisɛse le Nyamenle ɛdeɛ a, ɛnee Mɛle le Nyamenle mame. Wɔ ɛvolɛ 431 Y.M., asɔne mgbanyima mɔɔ bɛwɔ Ɛfɛsɛse la liele dole nu kɛ Mɛle le “Nyamenle Mame.” Ɛzonlenlɛ mɔɔ bɛfa bɛmaa Mɛle la rayɛle kpole wɔ mekɛ mɔɔ mgbanyima ne mɔ hanle edwɛkɛ ɛhye wɔ Ɛfɛsɛse la. Mekɛ mɔɔ menli mɔɔ sonle awozonle rabokale asɔne ne anwo la, ngyikyi ngyikyi bɛvale Belamunli Mɛle abaaba nee ye nvoninli bɛziele bozonle raalɛ Aatɛmese (Wulomuma fɛlɛ ye Diana) nee Isis agyakɛ anu.

Wɔ ɛvolɛ 432 Y.M., Pope Sixtus III maanle bɛzile asɔne sua wɔ Wulomu bɛvale bɛwulale “Nyamenle Mame” anyunlunyia. Bɛzile bɛbikyele ɛleka mɔɔ ɛnee Wulomu bozonle raalɛ mɔɔ maa awolɛ Lucina, bozonle sua gyi la. Buluku kɛlɛvolɛ bie hanle asɔne sua ne anwo edwɛkɛ kɛ “Kilisienema mɔɔ wɔ Wulomu la ɛva Mɛle ɛzonlenlɛ ɛyɛ bozonle Mame Kpole ne ɛzonlenlɛ nwo sɛkɛlɛneɛ.”—Mary—The Complete Resource.

a Ɛzonlenlɛ dɔɔnwo kilehile kɛ Mɛle le Nyamenle mame. Ɔyɛ a bɛfɛlɛ ye “Anwomanyunlu Belemgbunli Raalɛ” anzɛɛ Theotokos, mɔɔ le Giliki edwɛkɛ kpɔkɛ mɔɔ kile “Nyamenle ɔ nli.”