Duzu A Baebolo Ne Ka Ye Wɔ Ɛ Nwo Mɔɔ Ɛkulo La Anwo A?
Baebolo ne bua kɛ
Baebolo ne ka kɛ ɔle kpalɛ yɛɛ nwolɛ hyia kɛ yɛbahulo yɛ nwo noko ɔmaa yɛ ɛweɛne. Ɛlɔlɛ ɛhye maa ɛnea ɛ nwo boɛ, ɛbu ɛ nwo na ɛte nganeɛ kɛ ɛ nwo hyia. (Mateyu 10:31) Baebolo ne ɛnganvo angomedi subane, emomu ɔmaa ɛnyia ɛ nwo mɔɔ ɛkulo la anwo adwenle kpalɛ.
Nwane mɔ a ɔwɔ kɛ yɛdimoa yɛkulo bɛ a?
Ɔwɔ kɛ yɛdimoa yɛkulo Nyamenle wɔ yɛ ahonle nu. Baebolo ne kilehile kɛ mɛla kpole kpalɛ ne a le: “Fa wɔ ahonle muala . . . . kulo Gyihova wɔ Nyamenle ne.”—Maake 12:28-30; Mɛla ne 6:5.
Mɛla kpole kpalɛ mɔɔ tɔ zo nwiɔ la a le: “Kulo ɛ gɔnwo kɛ ɛ nwo.”—Maake 12:31; Sɛlɛvolɛma 19:18.
Ɔwɔ nuhua kɛ Baebolo ne ɛnva ɛ nwo mɔɔ ɛkulo la anwo mɛla titili ɛmmaa ɛdeɛ, noko mɛla mɔɔ se “kulo ɛ gɔnwo kɛ ɛ nwo” la maa ɔda ali kɛ nvonleɛ ɛnle nwo kɛ ɛbahulo ɛ nwo na wɔabu ɛ nwo yɛɛ nvasoɛ wɔ zo.
Nwane mɔ a Gyisɛse limoale hulole bɛ a?
Gyisɛse maanle adwenle kpalɛ mɔɔ ɔwɔ kɛ yɛnyia wɔ ɛlɔlɛ mɔɔ yɛnyia yɛamaa Nyamenle, yɛ gɔnwo mɔ, nee yɛ nwo la lale ali na ɔhilehilele ye ɛdoavolɛma ne kɛ bɛzukoa ye neazo ne.—Dwɔn 13:34, 35.
Ɔlimoale ɔhulole Gyihova Nyamenle na ɔdule ɔ nwo ɔmaanle Ye gyima ne. Ɔhanle kɛ, “amaa ewiade ne anwu kɛ mekulo Selɛ ne la, melɛyɛ mɔɔ Selɛ ne ɛha ɛhile me kɛ menyɛ la ala.”—Dwɔn 14:31.
Gyisɛse hulole ɔ gɔnwo mɔ, ɔlile awie mɔ ngyianlɛdeɛ nwo gyima bɔbɔ ɔvale ye ngoane ɔmaanle ɔvale ɔlale ɛhye ali.—Mateyu 20:28.
Ɔhulole ɔ nwo ɔlua ɔ menle mɔɔ ɔliele, aleɛ mɔɔ ɔlile yɛɛ menli mɔɔ lile ɔ nzi nee bɛdabɛ mɔɔ bɛbahola bɛrayɛ ye ɛdoavolɛma mɔɔ ɔ nee bɛ bɔle nu liele bɛ nye la azo.—Maake 6:31, 32; Luku 5:29; Dwɔn 2:1, 2; 12:2.
Saa ɛkulo awie mɔ ɛtɛla ɛ nwo a, asoo ɔbamaa wɔ anyelielɛ anzɛɛ ɛbulɛ mɔɔ bɛlɛ bɛmaa wɔ la azo ade?
Kyɛkyɛ, ɔluakɛ bɛbɔle yɛ wɔ Nyamenle ne mɔɔ ye subane titili a le ɛlɔlɛ mɔɔ angomedi ɛnle nu la ɛsaso zo. (Mɔlebɛbo 1:27; 1 Dwɔn 4:8) Ɛhye kile kɛ bɛbɔle yɛ kɛ yɛhulo awie mɔ. Yɛ nwo mɔɔ yɛkulo la lɛ ye ɛweɛne, noko saa yɛkulo Nyamenle yɛtɛla debie biala na yɛfa yɛ adwenle yɛsie kpalɛ mɔɔ yɛyɛ yɛamaa awie mɔ la azo a, yɛ nye die kpalɛ. Kɛ mɔɔ Baebolo ne ka la, “anyelielɛ dɔɔnwo wɔ ɛmaanlɛ nu tɛla ɛlielɛ.”—Gyima ne 20:35.
Ɛnɛ, menli dɔɔnwo ka kɛ saa yɛdimoa yɛkulo yɛ nwo a yɛɛ yɛ nye balie a. Wɔ bɛ afoa nu, bɛva “kulo ɛ nwo” bɛzie “kulo ɛ gɔnwo” agyakɛ anu. Noko akee, anwubielɛ ma ɔda ali kɛ bɛdabɛ mɔɔ bɛdi Baebolo folɛdulɛ mɔɔ se: “Awie biala mmakpondɛ ɔ ngome ye boɛyɛlɛ, ɔkpondɛ awie mɔ ɛdeɛ noko” azo la nyia kpɔkɛdelɛ kpalɛ nee anyelielɛ.—1 Kɔlentema 10:24.