Asoo “Ɛtane Mgbole Nsuu” A Wɔ Ɛkɛ A?

Baebolo ne bua kɛ

Baebolo ne ɛnga “ɛtane mgbole nsuu” ne anwo edwɛkɛ kpɔtee. Emomu, ɔkilehile kɛ awie mɔɔ yɛ ɛtane mgbole la ɛnrɛnyia ngoane. Kɛ neazo la, Baebolo ne ka ɛtane mgbole le kɛ “adwɔmane ɛbɛla, evinli nyɛleɛ, sunsum ɛtane nyɛleɛ, ɛya nee nzabolɛ anwo edwɛkɛ kɛ bɛle “sonla su ne gyima.” Akee ɔtoa zo kɛ: “Bɛdabɛ mɔɔ bɛyɛ ninyɛne ɛhye mɔ la ɛnrɛnwu Nyamenle Belemgbunlililɛ ne.”​—Galeehyeama 5:19-21.a

Sɛ Baebolo ne ka ‘ninyɛne nsuu mɔɔ Awulae kyi’ la anwo edwɛkɛ?

Ɛhɛe. King James Version ne ka ye wɔ Mrɛlɛbulɛ 6:​16 kɛ: “Ninyɛne nsia a wɔ ɛkɛ mɔɔ Awulae kyi a: ɛhɛe, ninyɛne nsuu a le ye kyibadeɛ a.” Noko, tɛ ɛtane ne amuala a bɛha nwolɛ edwɛkɛ wɔ Mrɛlɛbulɛ 6:​17-​19 a. Emomu, ɔmaa yɛnwu nyɛleɛ ngakyile mɔɔ ɛnle kpalɛ, mɔɔ bie a le ninyɛne mɔɔ yɛdwenle nwo, edwɛkɛ mɔɔ yɛka nee nyɛleɛ mɔɔ yɛda bɛ ali la.b

Duzu a edwɛkɛ “ɛtane kpole” kile a?

Baebolo ngilebɛbo bie mɔ fa di gyima wɔ 1 Dwɔn 5:​16. Kɛ neazo la, The New American Bible ne kenga kɛ: “Debie bie wɔ ɛkɛ ne mɔɔ le ɛtane kpole a.” Edwɛkɛ mɔɔ bɛhile ɔ bo kɛ “ɛtane kpole” la eza bahola ahile “ɛtane mɔɔ ɔwie ewule.” Ngakyile boni a wɔ “ɛtane mɔɔ ɛnwie ewule” nee “ɛtane mɔɔ ɔwie ewule” la anu a?​—1 Dwɔn 5:​16.

Baebolo ne maa ɔda ali wienyi kɛ ɛtane biala wie ewule nu. Noko bɛbahola bɛalie yɛ ngoane bɛavi ɛtane nee ewule nu ɔlua Gyisɛse Kelaese ɛkpɔnenlɛ afɔlebɔlɛ ne azo. (Wulomuma 5:12; 6:23) Yemɔti, “ɛtane mɔɔ ɔwie ewule” la a le ɛtane mɔɔ Kelaese ɛkpɔnedeɛ ne ɛngola ɛnlie awie ɛnvi nu la. Awie mɔɔ yɛ ɛtane ɛhye bie la ɛyɛ ye adwenle kɛ ɔnrɛhakyi ye subane anzɛɛ ye nyɛleɛ. Baebolo ne eza ka kɛ “bɛnrɛva bɛnrɛhyɛ” awie mɔɔ yɛ ɛtane ɛhye bie la.”​—Mateyu 12:31; Luku 12:10.