Asoo Baebolo Ne Kilehile Kɛ Saa Awie Wu A Bɛsia Bɛwo Ye Fofolɛ Ɔ?
Baebolo ne bua kɛ
Kyɛkyɛ. Edwɛkɛkpɔkɛ “bɛsia bɛawo awie” yɛɛ zɔhane adwenle ne ɛnvinde Baebolo ne anu. Awie mɔɔ wu a bɛsia bɛwo ye fofolɛ diedi ne gyi ɛkɛla mɔɔ ɛnwu ɛlɛ ngilehilelɛ ne azo.a Noko akee, Baebolo ne kilehile kɛ, ɛkɛla ne gyi ɛkɛ maa sonlabaka ne yɛɛ ɔkola ɔwu. (Mɔlebɛbo 2:7; Yizikeɛle 18:4) Saa awie wu a, ɔnde aze bieko.—Mɔlebɛbo 3:19; Nolobɔvo ne 9:5, 6.
Ngakyile boni a wɔ awie mɔɔ wu a bɛsia bɛwo ye fofolɛ nee ewudwazo ne anu a?
Baebolo ngilehilelɛ mɔɔ fale ewudwazo nwo la ɛngyi ɛkɛla mɔɔ ɛnwu ɛlɛ la azo. Wɔ ewudwazo ne anu, Nyamenle balua ye tumi ne azo yeamaa menli mɔɔ ɛwu la azia adɛnla aze bieko. (Mateyu 22:23, 29; Gyima ne 24:15) Ewudwazo ne maa yɛnyia anyelazo kɛ menli mɔɔ bɛbadwazo bɛ la badɛnla azɛlɛ fofolɛ ne azo mɔɔ bɛnwu bieko a.—2 Pita 3:13; Yekile 21:3, 4.
Adalɛ edwɛkɛ mɔɔ fale awie mɔɔ wu a bɛsia bɛwo ye fofolɛ nee Baebolo ne anwo la
Adalɛ edwɛkɛ: Baebolo ne ka kɛ bɛziale bɛwole ngapezonli Yilaegya kɛ Dwɔn Sɔnevolɛ ne.
Nɔhalɛ edwɛkɛ: Nyamenle hanle kɛ: “Mebazoa Nyamenle kpɔmanvolɛ Yilaegya bɛ nwo,” yɛɛ Gyisɛse hilele kɛ Dwɔn Sɔnevolɛ ne a maanle zɔhane ngapezo ne rale nu a. (Malakae 4:5, 6; Mateyu 11:13, 14) Noko, ɛhye ɛngile kɛ Yilaegya a bɛzia bɛwo ye bieko kɛ Dwɔn Sɔnevolɛ ne a. Dwɔn mumua ne hanle kɛ ɔnle Yilaegya. (Dwɔn 1:21) Nɔhalɛ ne a le kɛ, Dwɔn yɛle gyima kɛ Yilaegya la, ɔhanle Nyamenle nrɛlaleɛ ne na ɔhanle kɛ menli ɛnlu bɛnwo. (1 Arelemgbunli 18:36, 37; Mateyu 3:1) Dwɔn eza hilele kɛ ɔlɛ “akɛnrasesebɛ kɛ ngapezonli Yilaegya la.”—Luku 1:13-17, Good News Translation.
Adalɛ edwɛkɛ: Baebolo ne fɛlɛ awie mɔɔ wu a bɛsia bɛwo ye bieko la kɛ “bɛwo ye fofolɛ.”
Nɔhalɛ edwɛkɛ: Baebolo ne maa yɛnwu kɛ, awie mɔɔ bɛwo ye fofolɛ la le sunsum nu awolɛ mɔɔ kɔ zo wɔ mekɛ mɔɔ ahenle de aze la. (Dwɔn 1:12, 13) Awolɛ fofolɛ ɛhye ɛnle awie ɛbɛla dɛba nwo anzohwenlɛ, emomu, ɔle nyilalɛ mɔɔ vi Nyamenle ɛkɛ mɔɔ maa menli nyia kenle bie anyelazo mɔɔ di munli la.—Dwɔn 3:3; 1 Pita 1:3, 4.
a Ɛkɛla mɔɔ ɛnwu ɛlɛ nee awie mɔɔ wu a bɛsia bɛwo ye bieko diedi ne abo vi tete Babelɔn. Nzinlii, Yendeama nrɛlɛbɛvoma bie hyehyɛle Karma ngilehilelɛ ne . Britannica Encyclopedia of World Religions ka kɛ, Karma mɛla ne kile kɛ, “mɔɔ awie bayɛ ye kɛkala la banyia ɔ nwo zo tumi wɔ ye azedɛnlanlɛ bieko anu.”—Mukelɛ 913.