Nane Kɔkɔlɛ Anwo Ɛzulolɛ Ne Mɔɔ Wɔ Yekile Tile 17 La A Le Duzu?
Baebolo ne bua kɛ
Nane kɔkɔlɛ anwo ɛzulolɛ mɔɔ bɛha ɔ nwo edwɛkɛ wɔ Yekile tile 17 la le ahyehyɛdeɛ bie mɔɔ ye bodane a le kɛ ɔka maanle maanle ne mɔ yeabɔ nu la anwo sɛkɛlɛneɛ. Mɔlebɛbo ne ɛnee bɛfɛlɛ ye Maanle Maanle Ngyekyeleɛ noko kɛkala bɛfɛlɛ ye Maamgbole Koyɛlɛ Eku.
Mɔɔ bamaa yɛanwu nane kɔkɔlɛ anwo ɛzulolɛ ne la
Ɔle maanyɛlɛ fane. Nane kɔkɔlɛ anwo ɛzulolɛ ne lɛ “adile nsuu” mɔɔ gyi ɛkɛ ne maa “awoka nsuu” nee “arelemgbunli nsuu,” anzɛɛ tumililɛ. (Yekile 17:9, 10) Wɔ Baebolo ne anu, bɛfa awoka nee nane bɛgyinla ɛkɛ ne bɛmaa arane.—Gyɛlɛmaya 51:24, 25; Daneɛle 2:44, 45; 7:17, 23.
Ɔzɔho ewiade amuala maanyɛlɛ ngyehyɛleɛ ne. Nane kɔkɔlɛ anwo ɛzulolɛ ne zɔho nane ati nsuu ne mɔɔ wɔ Yekile tile 13, mɔɔ gyi ɛkɛ ne maa ewiade amuala maanyɛlɛ ngyehyɛleɛ ne la. Nane nwiɔ ne amuala lɛ adile nsuu, mɛne bulu, nee munzule aluma. (Yekile 13:1; 17:3) Kɛzi bɛzɔho bɛ nwo kpalɛ la ɛnrɛhola ɛnrɛra mgbane. Nane kɔkɔlɛ anwo ɛzulolɛ ne zɔho anzɛɛ le ewiade amuala maanyɛlɛ ngyehyɛleɛ ne anwo sɛkɛlɛneɛ.—Yekile 13:15.
Ɔnyia tumi ɔfi tumivolɛma gyɛne ɛkɛ. Nane kɔkɔlɛ anwo ɛzulolɛ ne ‘vi’ anzɛɛ nyia ye tumi ne fi tumivolɛma gyɛne ɛkɛ.—Yekile 17:11, 17.
Ɔ nee ɛzonlenlɛ lɛ abusuabɔlɛ. Babelɔn Kpole ne, mɔɔ le ewiade amuala adalɛ ɛzonlenlɛ kɔsɔɔti ne la de nane kɔkɔlɛ anwo ɛzulolɛ ne azo, ɛhye kile kɛ ɛzonlenlɛ fane ne gyi nane ne anzi.—Yekile 17:3-5.
Ɔnli Nyamenle eni. Bɛhɛlɛ “aluma ɛtane ɛtane” wɔ nane ne anwo.—Yekile 17:3.
Ɔwule mekɛ bie. Nane kɔkɔlɛ anwo ɛzulolɛ ne bahɔ “azɛlɛ kuma ne anu,”a anzɛɛ bavi ɛkɛ ne mekɛ bie noko ɔbadwazo yeara bieko—Yekile 17:8.
Baebolo ngapezo rale nu
Suzu kɛzi Maanle Maanle Ngyekyeleɛ ne nee Maamgbole Koyɛlɛ Eku ne mɔɔ ralile ɔ gyakɛ anu la maanle Baebolo ngapezo mɔɔ fale nane kɔkɔlɛ anwo ɛzulolɛ ne anwo la rale nu la anwo.
Maanyɛlɛ fane. Maamgbole Koyɛlɛ Eku ne gyinla maanyɛlɛ ngyehyɛleɛ ne anzi ɔlua “maanle maanle mɔɔ wɔ fane ne anu mɔɔ ɔnea kɛ bɛ muala bɛsɛ wɔ tumililɛ nu la azo.”b
Ɔzɔho ewiade amuala maanyɛlɛ ngyehyɛleɛ ne. Wɔ ɛvolɛ 2011 ne anu, maanle mɔɔ tɔ zo 193 la rabokale Maamgbole Koyɛlɛ Eku ne anwo. Yemɔti, ɔka kɛ ɔgyi ɛkɛ ne ɔmaa maanle nee menli dɔɔnwo mɔɔ wɔ ewiade la.
Ɔnyia tumi ɔfi tumivolɛma gyɛne ɛkɛ. Maanle maanle mɔɔ wɔ Maamgbole Koyɛlɛ Eku ne anu la a maa ɔnyia tumi a.
Ɔ nee ɛzonlenlɛ lɛ abusuabɔlɛ. Ɛzonlenlɛ ngakyile mɔɔ ewiade ye amuala la ɛhɔ zo ɛboa Maanle Maanle Ngyekyeleɛ ne nee Maamgbole Koyɛlɛ Eku ne.c
Ɔnli Nyamenle eni. Bɛdele Maamgbole Koyɛlɛ Eku ne kɛ ɔmaa “anzodwolɛ nee banebɔlɛ ɛrɛla maanle maanle avinli.”d Bie a ɛbaha kɛ bodane ɛhye le kpalɛ, noko Maamgbole Koyɛlɛ Eku ne ɛnli Nyamenle eni ɔluakɛ ɔse ɔlɛyɛ debie mɔɔ Nyamenle Belemgbunlililɛ ne ala a bahola ayɛ la.—Edwɛndolɛ 46:9; Daneɛle 2:44.
Ɔwule mekɛ bie. Maanle Maanle Ngyekyeleɛ ne mɔɔ bɛdele ye wɔ Ewiade Konle I la anzi kɛ ɔmaa anzodwolɛ ara la angola anye maanle maanle avinli konle anvi ɛkɛ. Mekɛ mɔɔ Ewiade Konle II bɔle ɔ bo wɔ 1939 la, yeanyɛ gyima bieko. Mɔɔ Ewiade Konle II rale awieleɛ wɔ 1945 la, bɛdele Maamgbole Koyɛlɛ Eku ne. Eku ne bodane, kɛzi ɔyɛ ye gyima nee ye ngyehyɛleɛ zɔho Maanle Maanle Ngyekyeleɛ ne ɛdeɛ ne.
a Kɛ mɔɔ Vine Expository Dictionary of Old and New Testament Words ne ka la, Giliki edwɛkɛkpɔkɛ mɔɔ bɛhile ɔ bo “azɛlɛ kuma” la kile “kuma mɔɔ nuhua wale la.” King James Version ne hilele edwɛkɛkpɔkɛ ne abo kɛ “kuma mɔɔ ɛnlɛ ɔ bo.” Wɔ Baebolo ne anu, ɔkile ɛleka anzɛɛ tɛnlabelɛ mɔɔ bɛngola bɛnyɛ ɛhwee la.
b Nea Charter of the United Nations Article 2 ne anu.
c Kɛ neazo la, Protɛstantma eku mɔɔ ɛzonlenlɛ dɔɔnwo wɔ nu mɔɔ wɔ America la hanle ye wɔ 1918 kɛ Maanle Maanle Ngyekyeleɛ ne bayɛ “maanyɛlɛ fane mɔɔ gyi Nyamenle belemgbunlililɛ ne agyakɛ anu wɔ azɛlɛ ye azo a.” Wɔ ɛvolɛ 1965, menli mɔɔ gyi Buddha, Kateleke, Aduduleɛ Ɛzonlenlɛ, Hindu, Ngɛnlamo, Dwuuma nee Protɛstantma ɛzonlenlɛ ne ati la yiale wɔ San Francisco na bɛzɛlɛle bɛmaanle Maamgbole Koyɛlɛ Eku ne. Yɛɛ wɔ 1979, Pope John Paul II hanle anyelazo mɔɔ ɔlɛ ye wɔ Maamgbole Koyɛlɛ Eku ne anu la anwo edwɛkɛ kɛ “ɔbahɔ zo yeayɛ anzodwolɛ nee pɛlepɛlelilɛ nwo fane kpole.”
d Nea Charter of the United Nations Article 1 ne anu.