Duzu A Nane Ati Nsuu Ne Mɔɔ Wɔ Yekile Tile 13 La Gyi Ɛkɛ Ne Maa A?
Baebolo ne bua kɛ
Nane anwo ɛzulolɛ ne mɔɔ lɛ mɛne nsuu mɔɔ bɛha ɔ nwo edwɛkɛ wɔ Yekile 13:1 la gyi ɛkɛ maa ewiade amuala maanyɛlɛ ngyehyɛleɛ ne.
Ɔlɛ tumi nee belemgbunli ebia, ɛhye kile kɛ ɔle maanyɛlɛ nu debie.—Yekile 13:2.
Ɔdi “maanle biala, aneɛ biala, abusua ekpunli biala nee menli ngakyile kɔsɔɔti anwo zo” tumi, yemɔti ɔle kpole ɔtɛla maanle ko anu arane.—Yekile 13:7.
Ɔlɛ nane mgbole nna ne mɔ mɔɔ bɛha bɛ nwo edwɛkɛ wɔ ngapezo nu wɔ Daneɛle 7:2-8 la biala subane ne bie. Ɔzɔho sobolɛ, ɔ gyakɛ le kɛ ezizile gyakɛ, ɔ nloa le kɛ awenade nloa yɛɛ ɔlɛ mɛne bulu. Nane ne mɔ mɔɔ bɛwɔ Daneɛle ngapezo ne anu la gyi ɛkɛ maa arelemgbunli titili bie anzɛɛ maanyɛlɛ nu belemgbunlililɛ mɔɔ bɛdoɔdoale zo bɛlile tumi la. (Daneɛle 7:17, 23) Ɛhye ati, nane anwo ɛzulolɛ ne mɔɔ wɔ Yekile tile 13 la gyi ɛkɛ maa maanyɛlɛ ngyehyɛleɛ mɔɔ lɛ afoa ngakyile la.
Ɔvi “nyevile ne anu” ɔvindele. Ɛhye kile kɛ alesama arane ne mɔ vi alesama mɔɔ bɛkpo Nyamenle na bɛ nye zo ɛda bɛ la anu.—Yekile 13:1; Ayezaya 17:12, 13.
Baebolo ne ka kɛ nane ne nɔma anzɛɛ ye duma 666 ne le “sonla duma.” (Yekile 13:17, 18) Zɔhane edwɛkɛ ne kile kɛ nane ne mɔɔ bɛha ɔ nwo edwɛkɛ wɔ Yekile tile 13 la le sonla ngyehyɛleɛ na ɔnle sunsum nu anzɛɛ sunsum ɛtane ngyehyɛleɛ.
Bie a maanle maanle ne mɔ adwenle bayɛ ko wɔ ninyɛne bie mɔ anwo, noko bɛyɛ ɛhye amaa bɛ tumi ne anvi bɛ sa, bɛmmaa bɛ adwenle ɛnyɛ ko kɛ bɛfa bɛ nwo bɛawula Nyamenle Belemgbunlililɛ ne abo. (Edwɛndolɛ 2:2) Eza bɛbaha bɛ sogyama bɛabɔ nu kɛ bɛ nee Nyamenle ɛlɔnema mɔɔ Gyisɛse Kelaese a li bɛ ti la kaho wɔ Amagɛdɔn, noko bɛbazɛkye maanle maanle ne mɔ wɔ konle ɛhye anu.—Yekile 16:14, 16; 19:19, 20.
“Mɛne bulu nee adile nsuu”
Bɛfa nɔma bie mɔ bɛdi gyima wɔ sɛkɛlɛneɛ adenle zo wɔ Baebolo ne anu. Kɛ neazo la, nɔma bulu nee nɔma nsuu kile debie mɔɔ di munli. Debie mɔɔ bamaa yɛade mɔɔ “mɛne bulu nee adile nsuu” ne mɔɔ wɔ Yekile tile 13 abo kpalɛ la a le “nane ne ananze ne” mɔɔ bɛhanle ɔ nwo edwɛkɛ nzinlii wɔ Yekile ne anu la. Ɔle kɔkɔlɛ, ɔ ti le nsuu yɛɛ ɔlɛ mɛne bulu. (Yekile 13:1, 14, 15; 17:3) Baebolo ne ka kɛ nane kɔkɔlɛ ɛhye ati ne mɔ nee ye mɛne ne mɔ gyi ɛkɛ maa “arelemgbunli” anzɛɛ arane ne mɔ.—Yekile 17:9, 10, 12.
Yemɔti nane ne mɔɔ bɛha ɔ nwo edwɛkɛ wɔ Yekile 13:1 la ati nsuu ne gyi ɛkɛ maa arelemgbunli nsuu: maanyɛlɛ tumi titili mɔɔ ɛli tumi wɔ tetedwɛkɛ nu na bɛtinlitinli Nyamenle menli nwo zo la—Yigyibiti, Aselea, Babelɔn, Midea nee Pɛhyea, Gilisi, Wulomu, yɛɛ Anglo-America. Saa yɛka kɛ mɛne bulu ne gyi ɛkɛ maa maanle mɔɔ di tumi la amuala, mgbole nee ngyikyi a, ɛnee abotile ne mɔɔ bɔ mɛne ko biala la kile kɛ maanle ko biala nee maanyɛlɛ nu tumi kpole ne mɔɔ wɔ ye mekɛ zo la di tumi wɔ mekɛ ko ne ala anu.