Watch Tower Bible and Tract Society Ne A Le Duzu?
Watch Tower Bible and Tract Society of Pennsylvania ne le ahyehyɛdeɛ mɔɔ bɛnva bɛmkpondɛ ezukoa mɔɔ bɛgyinlanle mɛla mɔɔ wɔ Commonwealth of Pennsylvania, U.S.A la azo a bɛvale bɛziele ɛkɛ wɔ 1884 a. Gyihova Alasevolɛ dua zo yɛ bɛ ewiade amuala gyima ne mɔɔ bie a le Baebolo nee mbulukuyɛlɛ la.
Ahyehyɛdeɛ ɛhye bodane fale “ɛzonlenlɛ, ndetelɛ nee moalɛ nwo,” titili ne a le kɛ ɔmaa “bɛabɔ edwɛkpa ne mɔɔ fale Nyamenle Belemgbunlililɛ ne mɔɔ Kelaese Gyisɛse ɛlɛdi zolɛ tumi la anwo nolo na bɛahilehile menli nwolɛ debie.” Kyesɛ bɛto ɛsalɛ bɛfɛlɛ awie na yeahola yearaboka ahyehyɛdeɛ ne anwo, na ɔngyi ndoboa mɔɔ awie baye la azo. Ahyehyɛdeɛ ne adekilevolɛma nee menli mɔɔ wɔ nu la boa Gyihova Alasevolɛ Neazo Eku ne.
Mɛla Adenle Zo Ngyehyɛleɛ Ngakyile
Saa ɛye Watch Tower Bible and Tract Society of Pennsylvania ne ɛsie ahane a, Gyihova Alasevolɛ lɛ mɛla adenle zo ngyehyɛleɛ dɔɔnwo wɔ maanle ngakyile nu. Wɔ maanle bie mɔ anu, bɛfa “Watch Tower,” “Watchtower,” anzɛɛ bɛkile ɔ bo bɛfa bɛboka bɛ duma ne anwo.
Mɛla adenle zo ngyehyɛleɛ ɛhye mɔ mɔɔ bɛyɛ la ɛboa yɛ yemaa yɛyɛ ninyɛne dɔɔnwo. Bie mɔ ɛne:
Mbulukuhɛlɛlɛ nee mbulukuyɛlɛ. Yɛyɛ Baebolo kɛyɛ mgbe 253. Yɛhile mbuluku bo yɛhɔ aneɛ mɔɔ bo 1,050 la anu. Menli kola kenga Baebolo ne wɔ jw.org wɛbsaete ne azo wɔ aneɛ mɔɔ bo 300 la anu mɔɔ bɛndua ɛhwee a, eza bɛnyia Baebolo ne anwo kpuya le kɛ, “Nyamenle Belemgbunlililɛ Ne A Le Duzu?” la anwo mualɛ.
Ndetelɛ. Yɛlɛ sukulu ngakyile mɔɔ yɛdua zo yɛmaa menli sukoa Baebolo ne a. Kɛ neazo la, ɔvi 1943 mɔɔ ba la, Gyihova Alasevolɛ kɛyɛ 10,000 ɛhɔ Ɛzinzalɛ Arane Geleade Baebolo Sukulu ne bie na bɛnyia ndetelɛ mɔɔ kɔ moa la azo nvasoɛ. Ɛhye ɛboa bɛ ɛmaa bɛlɛsonle kɛ edwɛkpatɛlɛvolɛma anzɛɛ bɛlɛboa bɛamaa ewiade amuala gyima ne anyia anyuhɔlɛ. Dapɛne biala bɛkilehile menli mgbe dɔɔnwo mɔɔ bie mɔ ɛnle Alasevolɛ la wɔ ayia mɔɔ yɛyɛ ye wɔ asafo ne mɔ anu la abo. Eza yɛkile menli mɔɔ bɛnze kenga la debie yɛɛ yɛhile buluku bo yɛhɔ aneɛ 136 anu mɔɔ boa menli maa bɛsukoa ɛgengalɛ nee ɛhɛlɛlɛ a.
Moalɛ. Yɛboa menli mɔɔ esiane ɛdo bɛ na bɛhyia nwonane afoa nu ninyɛne la—le kɛ menli ɛhunlɛ mɔɔ hɔle zo wɔ Rwanda wɔ 1994 yɛɛ azɛlɛkpusulɛ mɔɔ zile wɔ Haiti wɔ 2010 la.
Yɛlua ahyehyɛdeɛ ne nee mɛla adenle zo ngyehyɛleɛ ngakyile ne mɔ azo yɛyɛ ninyɛne dɔɔnwo ɛdeɛ, noko yɛ gyima ne ɛngyi bɛ nuhua ko biala azo. Ɔwɔ kɛ Kilisienenli ko biala di mɛla mɔɔ Nyamenle ɛva ɛmaa ye kɛ ɔbɔ edwɛkpa ne nolo na ɔhilehile awie mɔ la azo. (Mateyu 24:14; 28:19, 20) Yɛdie yɛdi kɛ Nyamenle gyi gyima mɔɔ yɛlɛyɛ la anzi na ɔbahɔ zo ‘yeamaa yeanyi.’—1 Kɔlentema 3:6, 7.