Kpuyia Ɛleka

◼ Asoo ɔfɛta kɛ asafo anzɛɛ menli kɛhɛlɛ sɛkɛlɛneɛ mɔɔ Gyihova Alasevolɛ mɛla adenle zo ahyehyɛdeɛ ne fa di gyima la wɔ bɛ ninyɛne zo ɔ?

Sɛkɛlɛneɛ le duma mɔɔ bɛfa bɛkile debie anzɛɛ bɛyɛ ye nzonlɛ bɛmaa bɛnwu ye ndɛndɛ a. Bɛfa Watch Tower sɛkɛlɛneɛ ne bɛgyinla ɛkɛ bɛmaa Watch Tower Bible and Tract Society of Pennsylvania nee gyima ngakyile mɔɔ ahyehyɛdeɛ ne dua zo yɛ ye ninyɛne la. Christian Congregation of Jehovah’s Witnesses fa Baebolo mɔɔ bɛbuke nuhua la yɛ sɛkɛlɛneɛ wɔ ye ngɛlata zo. Gyihova Alasevolɛ gyimalilɛ ɛleka ngakyile lɛ bɛ sɛkɛlɛneɛ ɛdeɛ.

Ɔnle kɛ asafo anzɛɛ menli kɛlɛ sɛkɛlɛneɛ anzɛɛ aluma mɔɔ ahyehyɛdeɛ ne mɛla adenle zo gyima ne mɔ dua zo yɛ bɛ ninyɛne anzɛɛ debie biala mɔɔ zɔho ye la wɔ bɛ Belemgbunlililɛ Asalo nwo, bɛfa bɛkile Belemgbunlililɛ Asalo bie adenle, bɛkɛlɛ wɔ kɛlata bie azo, bɛ ti anwo debie nwo anzɛɛ ɛleka gyɛne bie. Ahyehyɛdeɛ ne sɛkɛlɛneɛ ne mɔɔ bɛkɛlɛ la kola gyegye maanle mgbanyima, nolobɔlɛma nee menli gyɛne wɔ kɛzi ahyehyɛdeɛ ne mɛla adenle zo gyima ɛhye mɔ nee asafo ne avinli edwɛkɛ de la anwo. Zɔhane ala a bɛkola bɛbu kɛlata bie mɔɔ awie kɛhɛlɛ la kɛ ɔvi asafo ti anzɛɛ ɔfese ne ko ɛkɛ a.

Ɔnle kɛ bɛkɛlɛ Watch Tower sɛkɛlɛneɛ ne anzɛɛ ye ngakyile bie wɔ Belemgbunlililɛ Asalo mɔɔ bɛkɛzi ye kenlebie la anwo, saa bɔbɔ Watch Tower ahyehyɛdeɛ ne a manle bɛzile Belemgbunlililɛ Asalo ne a. Asafo mɔɔ sɛkɛlɛneɛ ne bie wɔ bɛ Belemgbunlililɛ Asalo anzɛɛ debie gyɛne nwo la bahola agyakyi ye zɔ wɔ mekɛ ɛhye anu, ɔluakɛ bie a ɔwɔ kɛ bɛyɛ nzenzaleɛ mgbole wɔ sua ne anwo mɔɔ balie mekɛ, mɔdenlebɔlɛ na yeazɛkye ezukoa dɔɔnwo la. Noko akee, saa ɔnrɛhyia kɛ bɛyɛ nzenzaleɛ kpole na ɔnrɛzɛkye ezukoa dɔɔnwo a, bɛbahola bɛazuzu nwolɛ. Saa nzenzaleɛ ne le ekyi bie a, bɛbahola bɛali nwolɛ gyima wɔ mekɛ mɔɔ bɛlɛyɛ sua ne anzɛɛ deɛ ne mɔɔ bɛfa bɛkile adenle ne boɛ la.