Asoo Baebolo Ne Baboa Me Yeamaa Meanyia Abusua Asetɛnla Mɔɔ Yɛ Anyelielɛ Ɔ?

Baebolo ne bua kɛ

Ɛhɛe. Folɛdulɛ mɔɔ wɔ Baebolo ne anu mɔɔ ɛboa mrenyia nee mraalɛ dɔɔnwo yemaa bɛnyia anyelielɛ la bie mɔ ɛne:

1. Fa wɔ agyalɛ ne wula mɛla bo. Saa agyalɛ badɛnla ɛkɛ ne dahuu na yeayɛ anyelielɛ a ɔwɔ kɛ ɛfa ɛwula mɛla bo.​—Mateyu 19:4-6.

2. Da ɛlɔlɛ nee ɛbulɛ ali. Ɛhye kile kɛ ɔwɔ kɛ kunli yɛ maa ɔ ye kɛ mɔɔ ɔkulo kɛ ɔ ye yɛ maa ye la na zɔhane ala a ɔwɔ kɛ yelɛ ne noko yɛ a.​—Mateyu 7:12; Ɛfɛsɛsema 5:25, 33.

3. Mmaka edwɛkɛ mɔɔ wowɔ la. Saa ɛ ye anzɛɛ ɛ hu ka edwɛkɛ anzɛɛ yɛ debie mɔɔ yɛ wɔ nyane la a, tendɛ kɛnlɛma kile ye. (Ɛfɛsɛsema 4:31, 32) Baebolo ne ka ye wɔ Mrɛlɛbulɛ 15:1 kɛ: “Nyelebɛnloa bɛtɛɛ maa ɛya dwo, na ɛdendɛlɛ katekate ka ɛya.”

4. Bɛli nɔhalɛ bɛmaa bɛ nwo. Ɔwɔ kɛ ɛnyia ɛhulolɛ nee nla nwo atiakunluwɔzo ɛmaa ɛ ye anzɛɛ ɛ hu angome. (Mateyu 5:28) Baebolo ne ka kɛ: “Ɔwɔ kɛ bɛbu agyalɛ bie kpalɛ kpalɛ, na kunli nee yelɛ di nɔhalɛ maa bɛ nwo.”​—Hibuluma 13:4.

5. Fa ɛlɔlɛ tete ɛ mra. Mmayɛ kyengye somaa yɛɛ mmato ɛ nwo noko.​—Mrɛlɛbulɛ 29:15; Kɔlɔsaema 3:21.