Nzɔne Ati A Bɛhunle Menli Dɔɔnwo Zɔhane A? Kɛmɔti A Nyamenle Anzi Ye Adenle A?

Menli dɔɔnwo mɔɔ biza kpuya ɛhye mɔ la ɛlɛdi bɛ alɔvolɛ mɔɔ ɛwu la anwo nyane na bɛmkpondɛ mualɛ ala emomu bɛkpondɛ arɛlekyekyelɛ. Bie mɔ nwu menli dɔɔnwo ne mɔɔ bɛhunle bɛ la kɛ ɔle munzule kpole wɔ alesama tetedwɛkɛ nu na ɔmaa ɔyɛ se kɛ bɛbalie Nyamenle bɛali.

Adalɛ edwɛkɛ mɔɔ bɛka ye wɔ Nyamenle nee menli dɔɔnwo ne mɔɔ bɛhunle bɛ la anwo la

Adalɛ edwɛkɛ: Ɔle nvonleɛ kɛ ɛbabiza Nyamenle deɛmɔti ɔmaanle bɛhunle menli dɔɔnwo ne la.

Nɔhalɛ edwɛkɛ: Menli mɔɔ ɛnee lɛ diedi la bizale Nyamenle deɛmɔti ɔmaa amaneɛnwunlɛ nwo adenle la. Kɛ neazo la, ngapezonli Habakɛke bizale Nyamenle kɛ: “Duzu ati a ɛmaa me nye nwu nvonleɛ nee ngyegyelɛ ɛ?” (Habakɛke 1:3) Nyamenle andea Habakɛke emomu ɔmaanle bɛhɛlɛle ye kpuya ne wɔ Baebolo ne anu bɛmaanle yɛ.

Adalɛ edwɛkɛ: Nyamenle ɛndwenle alesama amaneɛnwunlɛ nwo.

Nɔhalɛ edwɛkɛ: Nyamenle kyi amumuyɛ nee mɔɔ fa amumuyɛ ba la. (Mrɛlɛbulɛ 6:16-19) Mekɛ mɔɔ amumuyɛyɛlɛ bule zo wɔ azɛlɛ ye azo wɔ Nowa mekɛ zo la, ‘ɔyɛle Nyamenle nyane somaa.’ (Mɔlebɛbo 6:5, 6) Kpolerazulɛ biala ɛnle nwo kɛ ɔyɛle Nyamenle nyane kɛ bɛhunle menli dɔɔnwo ne la.​—Malakae 3:6.

Adalɛ edwɛkɛ: Nyamenle vale menli dɔɔnwo ne mɔɔ bɛhunle bɛ la hwenle Dwuuma anzo.

Nɔhalɛ edwɛkɛ: Nyamenle maanle Wulomuma zɛkyele Gyɛlusalɛm wɔ ɛvoya mɔɔ limoa la. (Mateyu 23:37–24:2) Ɔvi zɔhane ne mekɛ ne, Nyamenle ɛtɛkpale menli ekpunli bie mɔɔ ɔ nye die bɛ nwo anzɛɛ ɔtwe bɛ nzo a. Wɔ Nyamenle anye zo, “ngakyile biala ɛnle Dwuuma nee bɛdabɛ mɔɔ bɛnle Dwuuma la avinli.”​—Wulomuma 10:12.

Adalɛ edwɛkɛ: Saa Nyamenle mɔɔ lɛ ɛlɔlɛ nee tumi kpole la wɔ ɛkɛ a, anrɛɛ bɛangu menli dɔɔnwo ne.

Nɔhalɛ edwɛkɛ: Ɔwɔ nuhua kɛ tɛ Nyamenle a fa amaneɛnwunlɛ ba a, noko ɔmaa nwolɛ adenle wɔ mekɛ ezinraa bie anu.​—Gyemise 1:13; 5:11.

Nzɔne ati a Nyamenle maanle adenle maanle bɛhunle menli dɔɔnwo ne ɛ?

Deɛmɔti Nyamenle ɛmaa alesama amaneɛnwunlɛ nwo adenle la nee deɛmɔti ɔmaanle adenle ɔmaanle bɛhunle menli dɔɔnwo ne la le ko: yemɔ a le kɛ amaa yeali edwɛkɛ bie mɔɔ dwazole la anwo gyima. Baebolo ne kile kɛ Abɔnsam a di ewiade ne azo kɛkala a na tɛ Nyamenle ɔ. (Luku 4:1, 2, 6; Dwɔn 12:31) Nɔhalɛ edwɛkɛ nwiɔ bie mɔɔ wɔ Baebolo ne anu la bamaa yɛanwu deɛmɔti Nyamenle maanle adenle maanle bɛhunle menli dɔɔnwo ne la.

1. Nyamenle vale fanwodi ahyɛlɛdeɛ bɔle alesama. Nyamenle hanle mɔɔ ɔkpondɛ yeavi Adam nee Yive ɛkɛ la ɔhilele bɛ, noko yeatinlitinli bɛ nwo zo kɛ bɛdie ye. Bɛkpale kɛ bɛbazi mɔɔ le kpalɛ nee ɛtane la anwo kpɔkɛ, noko bɛanzi kpɔkɛ kpalɛ​—na zɔhane ala noko a menli dɔɔnwo ɛsisi kpɔkɛ ɛtane wɔ alesama tetedwɛkɛ nu a​—ɛhye ɛva ngyegyelɛ mgbole dɔɔnwo ɛrɛlɛ alesama. (Mɔlebɛbo 2:17; 3:6; Wulomuma 5:12) Ɔle kɛ mɔɔ Statement of Principles of Conservative Judaism buluku ne ka la. Ɔse: “Adenle mɔɔ yɛlɛ yɛkpa mɔɔ yɛkulo mɔɔ yɛnva yɛnli gyima kpalɛ la a ɛva amaneɛnwunlɛ dɔɔnwo ɛra ewiade a.” Nyamenle anlie adenle mɔɔ yɛlɛ yɛkpa mɔɔ yɛkulo la emomu yemaa alesama mekɛ kɛ bɛli bɛ ti anwo na bɛnlea bɛ nwo zo.

2. Nyamenle bahola yɛɛ ɔbaye ngyegyelɛ mɔɔ menli dɔɔnwo ne mɔɔ bɛhunle bɛ la ɛva ɛra la yeavi ɛkɛ. Nyamenle ɛbɔ ɛwɔkɛ kɛ ɔbamaa menli mgbe dɔɔnwo mɔɔ ɛwu la azia ara ngoane nu bieko mɔɔ menli dɔɔnwo ne mɔɔ bɛhunle bɛ la boka nwo a. Eza ɔbaye nyane mɔɔ menli mɔɔ nyianle bɛ ti wɔ menli dɔɔnwo ɛhunle ne anu la dele la yeavi bɛ adwenle nu. (Ayezaya 65:17; Gyima ne 24:15) Ɛlɔlɛ mɔɔ Nyamenle lɛ maa alesama la maa yɛnwu kɛ ɔbali ɛwɔkɛ ɛhye mɔ azo.​—Dwɔn 3:16.

Menli mɔɔ nyianle bɛ ti la holale gyinlanle bɛ diedi nu na bɛnyianle ɛbɛlabɔlɛ nwo adwenle kpalɛ ɔlua ndelebɛbo mɔɔ bɛnyianle wɔ deɛmɔti Nyamenle maa amaneɛnwunlɛ nwo adenle nee kpɔkɛ mɔɔ yebɔ kɛ ɔbaye mɔɔ yeva yera la yeavi ɛkɛ ne la azo.