Kɛzi Gyihova Alasevolɛ Bu Menli Dɔɔnwo Ne Mɔɔ Bɛhunle Bɛ La​—Duzu A Baebolo Ne Ka A?

Wɔ January 27, 2023, menli dɔɔnwo bali International Holocaust Remembrance Day ne. Bie a menli dɔɔnwo zɔhane mɔɔ Nazima hunle bɛ wɔ ɛvolɛ mɔɔ bo 75 mɔɔ ɛze ɛhɔ la bamaa wɔadwenle deɛmɔti Nyamenle maanle nwolɛ adenle la anwo.

• Amaa wɔanwu mɔɔ Baebolo ne ka la, kenga edwɛkɛ “Nzɔne Ati A Bɛhunle Menli Dɔɔnwo Zɔhane A? Kɛmɔti A Nyamenle Anzi Ye Adenle A?”

Dwuuma nwunle amaneɛ dɔɔnwo wɔ Nazima asa anu. Bɛhunle bɛ nuhua dɔɔnwo ne ala. Eza bɛhunle menli gyɛne noko wɔ mekɛ zɔhane. Bɛ nuhua bie mɔ a le Gyihova Alasevolɛ mɔɔ bɛ diedi ne mɔɔ gyi Baebolo ne azo la ati bɛyɛle bɛ kpɔdekpɔde na bɛhunle bɛ la.

• Amaa wɔanwu nwolɛ edwɛkɛ dɔɔnwo la, kenga edwɛkɛ “Duzu A Dole Gyihova Alasevolɛ Wɔ Ewiade Konle II La Anu A?”

“Kenle bie nee anyelazo”

Menli dɔɔnwo sulo kɛ bɛbahu menli dɔɔnwo zɛhae bieko. Noko, Baebolo ne ka kenle bie mɔɔ ninyɛndane zɛhae ɛnrɛsisi bieko la anwo edwɛkɛ.

• “‘Ɔluakɛ meze adwenle mɔɔ melɛdwenle ye wɔ bɛ nwo la,’ Gyihova a se a, ‘anzodwolɛ adwenle ɔ, na tɛ munzule adwenle, kɛ mebamaa bɛ kenle bie nee anyelazo.’”​—Gyɛlɛmaya 29:11.a

Anyelazo ɛhye bara nu wɔ mekɛ mɔɔ Gyihova Nyamenle baye ninyɛnedane nee ngyegyelɛ mɔɔ ɔfa ɔba la amuala yeavi ɛkɛ ne la. Ɔnrɛhyɛ:

• Ɔbaye amumuyɛma yɛavi ɛkɛ.​—Mrɛlɛbulɛ 2:22.

• Ɔbamaa nyanelilɛ avi ɛkɛ.​—Yekile 21:4.

• Ɔbadwazo menli mɔɔ ɛwu la yeamaa badɛnla aze bieko.​—Dwɔn 5:28, 29.

Ɛbahola wɔalie anyelazo edwɛkɛ mɔɔ wɔ Baebolo ne anu la wɔali. Amaa wɔalie wɔali la, yɛsɛlɛ wɔ maa yɛ nee wɔ ɛzukoa Baebolo ne mɔɔ ɛndua ɛhwee a.